អង្គការសហប្រជាជាតិជម្លៀសជាបន្ទាន់មន្រ្តីរបស់ខ្លួនចេញពីយេម៉ែន
ស្ថានការណ៍កាន់តែច្របូកច្របល់ក្នុងប្រទេសយេម៉ែន នៅបីថ្ងៃក្រោយ អារ៉ាប៊ី សាអូឌីត បើកការវាយប្រហារតាមជើងអាកាសទៅលើក្រុមឧទ្ទាម ហ៊ូទី្ស ដែលរហូតមកដល់ពេលនេះ បានប្រើកម្លាំងយោធា ចូលកាន់កាប់ទឹកដី យេម៉ែនមួយផ្នែកធំ។ នៅល្ងាចថ្ងៃសៅរ៍ទី ២៨ មីនា បុគ្គលិករបស់អង្គការសហប្រជាជាតិ និងមន្រ្តីទូតបរទេស ប្រមាណ២០០នាក់ ត្រូវបានជម្លៀស ដឹកចេញជាបន្ទាន់ពីអាកាសយានដ្ឋាន ទីក្រុងសាណា។ ចំណែកលោកមែនស៊ូ ហាឌី ប្រធានាធិបតីស្របច្បាប់យេម៉ែនបានសម្រេចមិនទាន់ត្រលប់ចូលប្រទេសវិញ និងបន្តស្ថិតនៅទីក្រុងរីយ៉ាដ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៥
នៅក្នុងជំនួបកំពូលនៃក្រុមប្រទេសអារ៉ាប់ ក្នុងប្រទេសអេហ្ស៊ីប ព្រះចៅ សាល់ម៉ាន ស្តេចប្រទេសអារ៉ាប៊ី សាអូឌីតបាននិយាយថា ប្រតិបត្តិការទ័ពអាកាសដែលដឹកនាំដោយអារ៉ាប៊ី សាអូឌីត និងចូលរួមពីប្រទេសអារ៉ាប់ចំនួន៩នឹង បន្តធ្វើ នៅក្នុងយេម៉ែន រហូតដល់សន្តិសុខត្រូវបានធានាឡើងវិញ ក្នុងប្រទេសនេះ។
តាំងពីថ្ងៃព្រហស្បតិ៍ ទីក្រុងរីយ៉ាដ ដែលមានព្រំដែនយ៉ាងវែងជាមួយប្រទេសយេម៉ែន បានបើកប្រតិបត្តិការយោធា វាយប្រហារទៅលើទីតាំងសំខាន់ៗរបស់ពួកឧទ្ទាមហ៊ូទី្ស ដែលទើបចូលគ្រប់គ្រងទីក្រុងសាណា និងបណ្តេញប្រធានាធិបតី ទទួលស្គាល់ដោយអង្គការសហប្រជាជាតិ ចេញពីអំណាច កាលពីដើមឆ្នាំនេះ។ ពួកឧទ្ទាមហ៊ូទី្សដែលធ្លាប់កាន់កាប់ទឹកដីប៉ែកខាងជើងយេម៉ែន ជាប់ព្រំដែន អារ៉ាប៊ី សាអូឌីត ជាក្រុមប្រដាប់អាវុធ និកាយស្ហ៊ីអ៊ីត ដែលតែងប្រយុទ្ធប្រឆាំងនឹងរដ្ឋាភិបាល ក្នុងបុព្វេហេតុប្រឆាំងអំពើពុករលួយ និងបក្សពួកនិកាយស៊ុននីតនិយម។
តាំងពីខែកញ្ញាឆ្នាំមុន ក្រុមឧទ្ទាមហ៊ូទី្ស បានត្រូវរ៉ូវគ្នាឡើងវិញ ជាមួយអតីតសត្រូវរបស់ខ្លួន គឺអតីតប្រធានាធិបតី យេម៉ែន លោកសាឡេស។ ក្រុមហ៊ូទី្សវាយចូលកាន់កាប់ទីក្រុងបានយ៉ាងឆាប់រហ័ស ដោយសារតែក្រុមទាហានរដ្ឋាភិបាល ដែលនៅតែស្ម័គ្រស្មោះនឹងអតីតប្រធានាធិបតីសាឡេសបើកដៃឲ្យដែរ។
មានហេតុផលច្រើនយ៉ាង ដែលធ្វើឲ្យអារ៉ាប៊ី សាអូឌីតបើកការវាយប្រហារនៅក្នុងប្រទេសយេម៉ែន។ ដោយប្រកាសបើកប្រតិបត្តិការ មួយដែលមានឈ្មោះ ថា ព្យុះផ្តាច់ព្រ័ត្រ អារ៉ាប៊ី សាអូឌីត ចង់ទប់ទល់នឹងការឈ្លានពានរបស់អ៊ីរ៉ង់ ដែលទីក្រុងរីយ៉ាដចោទថា បានជួយ គាំទ្រក្រុមហូទី្ស ដើម្បីពង្រីកដែនអំណាចអ៊ីរ៉ង់ ក្នុងប្រទេសយេម៉ែន។ ការពង្រីកឥទ្ធិពលរបស់អ៊ីរ៉ង់ នៅក្នុងប្រទេសជិតខាងរបស់ខ្លួន កំពុងក្លាយជាកង្វល់របស់អារ៉ាប៊ី សាអូឌីត មិនចាញ់នឹងការគំរាមកំហែងរបស់ក្រុមជីហាត និងពួកអាល់កៃដា ដែលកំពុងមានវត្តមានក្នុងប្រទេសយេម៉ែន។ តាមអ្នកទទួលខុសត្រូវផ្នែកការទូតរបស់ប្រទេសអារ៉ាប់ នៅសមុទ្រពែរ្ស៍ អារ៉ាប៊ី សាអូឌីត សម្រេចធ្វើអន្តរាគមន៍ ទ័ពនៅយេម៉ែន បន្ទាប់ពីផ្កាយរណបរបស់ខ្លួនបង្ហាញពីការតាំងទី កាន់តែច្រើន នៃកាំជ្រួច មីស៊ីល នៅក្នុងទឹកដីយេម៉ែន ក្បែរព្រំដែនភាគខាងត្បូង របស់អារ៉ាប៊ី សាអូឌីត និងបន្ទាប់ពី ប្រធានាធិបតីយេម៉ែន គឺលោកហាឌី ដែលខ្លួនគាំទ្រ ត្រូវបានផ្តួលចេញពីអំណាច។
ម្យ៉ាងទៀត គេប៉ាន់ប្រមាណថា មានកងទ័ពអ៊ីរ៉ង់ សមាជិកអេស្បូឡា និងពួកជីវពល អ៊ីរ៉ាក់ និកាយស្ហ៊ីអ៊ីត ប្រមាណ ៥ពាន់នាក់ កំពុងប្រយុទ្ធជួយក្រុមឧទ្ទាមហ៊ូទី្ស។ មន្រ្តីទូតរបស់ក្រុមប្រទេសអារ៉ាប់ ដែលសុំមិនបញ្ចេញឈ្មោះ បាននិយាយថា គេអាចធ្វើប្រតិបត្តិការយោធាវាយទៅលើក្រុមហ៊ូទី្សដល់ទៅ ៦ខែ និងបានត្រៀមរួចហើយ ដើម្បីទប់ទល់នឹងប្រតិកម្មយោធាណាមួយពីប្រទេសអ៊ីរ៉ង់។ ប្រទេសអ៊ីរ៉ង់ មិនដែលបានប្រកាសជាផ្លូវការគាំទ្រក្រុមហ៊ូទី្ស ប៉ុន្តែ បានចេញមុខបរិហាអន្តរាគមន៍ទ័ពអាកាសរបស់ប្រទេសអារ៉ាប់ ចំនួន ៩ នៅក្នុងប្រទេសយេម៉ែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ