អតីតស្រីទាសករផ្លូវភេទសម័យសង្គ្រាមលោក ទាមទារសំណងពីជប៉ុន
អតីតស្ត្រីទាសករផ្លូវភេទ ៦នាក់ ដែលបានមកចូលរួមប្រជុំជាមួយសកម្មជនអន្តរជាតិ នៅទីក្រុងតូក្យូ ថ្ងៃសៅរ៍ទី ៣១ឧសភានេះ បានទាមទារឱ្យជប៉ុនសុំទោសជាផ្លូវការ ចំពោះទោសកំហុសអតីតកាល របស់ពលទាហានក្នុងសម័យសង្គ្រាម។ សំណុំរឿងដែលបន្តបំពុលទំនាក់ទំនងជប៉ុន ជាមួយបណ្តាប្រទេសជិតខាង ជាពិសេសកូរ៉េខាងត្បូង ឱ្យល្អក់កករមិនចេះចប់មិនចេះហើយ។
ចុះផ្សាយនៅថ្ងៃ៖
ស្តាប់ - ០២:០៥
សន្និសីទសាមគ្គីអាស៊ី បានរៀបចំឡើង ១២ដងរួចមកហើយ គិតចាប់តាំងពីឆ្នាំ១៩៩២មក ដើម្បីដាក់សម្ពាធលើរដ្ឋាភិបាលជប៉ុន ឱ្យទទួលស្គាល់កំហុសរបស់ទាហានជប៉ុនក្នុងសម័យសង្គ្រាម ដែលបានចាប់បង្ខំស្ត្រី ក្នុងប្រទេសក្រោមអាណានិគម មកធ្វើជាទាសករបំរើផ្លូវភេទ និងដើម្បី ស្វែងរកវិធីសាស្ត្រ ជួយរដ្ឋាភិបាលជប៉ុនឱ្យទទួលស្គាល់កំហុស និង វិធានការដែលនាំឱ្យការសុំទោសក្លាយជាសកម្មភាពពិត។
នៅលើកនេះ មានស្ត្រីជាអតីតទាសករ ៦រូប មកពីកូរ៉េខាងត្បូង ហ្វីលីពីន ឥណ្ឌូណេស៊ី និងម្នាក់ជាកូនស្រីរបស់អតីតទាសករជាតិចិន បានមកជួបជុំគ្នានៅទីក្រុងតូក្យូ ក្នុងថ្ងៃសៅរ៍ទី ៣១ឧសភា ដើម្បីទាមទារការសុំទោស និង ប្រាក់សំណង ដល់អតីតទាសករផ្លូវភេទទាំងឡាយ។ កាលពីឆ្នាំ១៩៩៣ រដ្ឋាភិបាលជប៉ុនបានចេញសេចក្តីប្រកាសសុំទោស ចំពោះ ទង្វើចាប់បង្ខំស្ត្រីឱ្យបំរើផ្លូវភេទទាហាន ប៉ុន្តែមិនទទួលស្គាល់ជាដាច់ខាតថារដ្ឋាភិបាលមានពាក់ព័ន្ធក្នុងសំណុំរឿងទាសករផ្លូវភេទ។ ជាហេតុធ្វើឱ្យភាគីរងគ្រោះយល់ថាជាការសុំទោសមិនស្មោះត្រង់។
សំណុំរឿងទាសករផ្លូវភេទ ដ៏ចម្រូងចម្រាសនេះ ចាប់កកើកឡើងវិញ បន្ទាប់ពីរដ្ឋាភិបាលអភិរក្សនិយមជប៉ុន ក្រោមការដឹកនាំរបស់លោកនាយករដ្ឋមន្ត្រីល្បីខាងជាតិនិយម ស៊ីនហ្សូ អាបេ បានប្រកាស កាលពីខែកុម្ភៈ ថាចង់សើរើមើលឡើងវិញ ថាតើគួរកែប្រែការសុំទោស ធ្វើឡើងនៅឆ្នាំ១៩៩៣ ឬយ៉ាងណា។ បន្ថែមពីលើនេះទៀត នៅថ្ងៃពុធសប្តាហ៍នេះ លោក អាបេ បានបង្កើតក្រុមអ្នកឯកទេសមួយ ដើម្បីសិក្សា សេចក្តីថ្លែងការណ៍សុំទោសជាផ្លូវការ ឆ្នាំ១៩៩៣ ថាពិតជាឈរលើមូលដ្ឋានច្បាស់លាស់ ត្រឹមត្រូវ តាមប្រវត្តិសាស្ត្រនិងតាមហេតុការណ៍មែនឬអត់។
គេមិនទាន់អាចដឹងបានទេ ថាតើការសិក្សារបស់តូក្យូ ដែលផ្អែកលើសក្ខីកម្មរបស់ស្ត្រីជាទាសករផ្លូវភេទ ១៦រូប ភាគច្រើនបានស្លាប់បាត់ជីវិតទៅហើយ នឹងមានលទ្ធផលបញ្ច្រាសនឹងសេចក្តីប្រកាសសុំទោសកាលពីឆ្នាំ១៩៩៣ឬយ៉ាងណាទេ។ ប៉ុន្តែប្រហែលជាដល់ពេលវេលាត្រូវជម្រះបញ្ជីឱ្យដាច់ស្រលះហើយ ព្រោះកាលពីខែមុន នាឱកាសទស្សនកិច្ចនៅអាស៊ី លោកប្រធានាធិបតីអាមេរិក បានប្រកាសចាត់ទុក ការចាប់បង្ខំស្ត្រីឱ្យបម្រើផ្លូវភេទ ថាជាការរំលោភសិទ្ធិមនុស្ស ដ៏សាហាវព្រៃផ្សៃមួយ។ អ្នកប្រវត្តិសាស្រ្តសំខាន់ៗជាច្រើនយល់ថា នៅក្នុងសម័យសង្រ្គាមលោក មានស្រ្តីប្រមាណជា ២០ម៉ឺននាក់ ចិន ឥណ្ឌូណេស៊ី ហ្វីលីពីន តៃវ៉ាន់ និងភាគច្រើនមកពីកូរ៉េ ត្រូវបានជប៉ុនចាប់បង្ខំឲ្យធ្វើជាទាសករបម្រើផ្លូវភេទដល់ទាហាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ