ជម្លោះសមុទ្រចិនខាងត្បូង៖ តុលាការក្រុងឡាអេប្រកាសសាលក្រមថ្ងៃអង្គារ
តុលាការក្រុងឡាអេនឹងប្រកាសសេចក្តីសម្រេចរបស់ខ្លួន នៅថ្ងៃអង្គារសប្តាហ៍ក្រោយ ជុំវិញបណ្តឹងរបស់ហ្វីលីពីន ដែលប្តឹងចិនក្នុងជម្លោះនៅសមុទ្រចិនខាងត្បូង។ សេចក្តីសម្រេចដែលគេកំពុងតែទន្ទឹងរង់ចាំ ហើយដែលអាចនឹងធ្វើឲ្យភាពតានតឹងនៅក្នុងតំបន់កាន់តែកើនឡើងថែមទៀត។
ចុះផ្សាយនៅថ្ងៃ៖
ស្តាប់ - ០២:០២
៣ឆ្នាំក្រោយពីបានចាប់ផ្តើមនីតិវិធី ទៅតាមបណ្តឹងរបស់ហ្វីលីពីន និងក្រោយពីបានបើកសវនាការចំនួន ២លើក ព្រមទាំងពិនិត្យឯកសារភស្តុតាងប្រមាណជាជិត ៤ពាន់ទំព័រ
តុលាការអចិន្ត្រៃយ៍នៃអាជ្ញាកណ្តាល ដែលមានទីស្នាក់ការនៅក្នុងទីក្រុងឡាអេ ហើយដែលជាតុលាការអន្តរជាតិចំណាស់ជាងគេបំផុតនោះ គ្រោងនឹងប្រកាសសេចក្តីសម្រេចរបស់ខ្លួន នៅថ្ងៃអង្គារ វេលាម៉ោង ១១ព្រឹកម៉ោងក្នុងប្រទេសហូឡង់ ត្រូវនឹងម៉ោង ៤រសៀល ម៉ោងនៅក្នុងប្រទេសកម្ពុជា។
អ្នកជំនាញខាងច្បាប់សមុទ្រអន្តរជាតិ ហើយដែលបានតាមដានរឿងក្តីនេះ បានប្រាប់ទីភ្នាក់ងារព័ត៌មានបារាំងអាអែហ្វប៉េថា តុលាការក្រុងឡាអេទំនងជានឹងកាត់សេចក្តីឲ្យហ្វីលីពីនជាអ្នកឈ្នះចិន បើទោះបីជាមិនគ្រប់ចំណុចទាំងអស់ ក៏ទៅលើចំណុចភាគច្រើនដែរ នៅក្នុងចំណោមការទាមទាររបស់ហ្វីលីពីន។
សំណួរដែលកំពុងតែចោទឡើងនៅពេលនេះ គឺនៅត្រង់ថា តើនឹងមានអ្វីកើតឡើង នៅក្រោយការប្រកាសសេចក្តីសម្រេចនេះ?
ជាគោលការណ៍ច្បាប់ ទាំងហ្វីលីពីន និងទាំងចិន សុទ្ធតែមានកាតព្វកិច្ចគោរពទៅតាមសេចក្តិសម្រេចរបស់តុលាការក្រុងឡាអេ ក៏ប៉ុន្តែ នៅក្នុងការអនុវត្តជាក់ស្តែងវិញ វាគឺជារឿងស្មុគស្មាញ ដោយសារតែតុលាការមិនមានយន្តការក្នុងការចាប់បង្ខំឲ្យរដ្ឋគោរពទៅតាមសេចក្តីសម្រេចរបស់ខ្លួន។
កាលពីថ្ងៃអង្គារដើមសប្តាហ៍នេះ លោក ឌុយទែរតេ ប្រធានាធិបតីថ្មីរបស់ហ្វីលីពីន បានព្យាយាមបន្ធូរបន្ថយភាពតានតឹងជាមួយចិនទុកជាមុន ដោយបានលើកឡើងថា ហ្វីលីពីនត្រៀមខ្លួនចរចាជាមួយចិន នៅក្នុងករណីដែលតុលាការក្រុងឡាអេសម្រេចឲ្យហ្វីលីពីនឈ្នះ។ រដ្ឋមន្រ្តីការបរទេសហ្វីលីពីនវិញអះអាងថា ហ្វីលីពីននឹងសុខចិត្តសហការជាមួយចិន ដើម្បីចែកគ្នាធ្វើអាជីវកម្មលើធនធាន នៅក្នុងតំបន់ជាប់ជម្លោះ។
ក៏ប៉ុន្តែ ចិនវិញបានប្រកាសតាំងពីដើមរួចជាស្រេចទៅហើយថា ខ្លួននឹងមិនទទួលស្គាល់សេចក្តីសម្រេចរបស់តុលាការក្រុងឡាអេនោះទេ ដោយនៅតែអះអាងដោយទទូចថា តំបន់ដែលហ្វីលីពីនទាមទារនោះ គឺជាទឹកដីរបស់ចិន ដោយគ្មានជាប់ជម្លោះអ្វីទាំងអស់ ហើយ នៅមុនពេលដែលតុលាការប្រកាសសាលក្រម ចិនបានបញ្ចេញសាច់ដុំ តាមរយៈសមយុទ្ធទ័ពជើងទឹកទ្រង់ទ្រាយធំ ដែលបើកធ្វើ តាំងពីថ្ងៃសៅរ៍ម្សិលមិញ នៅក្នុងតំបន់សមុទ្រចិនខាងត្បូង ដែលជាប់ជម្លោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ