ក្រុមអធិការកិច្ច៖មានបញ្ហាសន្តិសុខនៅគ្រប់រោងចក្រផលិតសម្លៀកបំពាក់ក្នុងប្រទេសបង់ក្លាដែស
នៅក្នុងប្រទេសបង់ក្លាដែស ក្រុមអធិការកិច្ចដែលបានចុះទៅធ្វើការស៊ើបអង្កេតនៅក្នុងរោងចក្រតូច ធំផ្នែកផលិតសម្លៀកបំពាក់ទើបបានបញ្ចប់បេសកកម្មរបស់ខ្លួន និងបានចេញផ្សាយរបាយការណ៍មួយដោយបញ្ជាក់ថា មានការធ្វេសប្រហែសលើផ្នែកសនិ្តសុខជាច្រើនករណីនៅក្នុងរោងចក្រទំាងអស់។ គួររម្លឹកជូនថា ក្រុមអធិការកិច្ចនេះត្រូវបានបញ្ជូនដោយក្រុមហ៊ុនសម្លៀកបំពាក់ម៉ាកល្បីៗនៅក្នុងទ្វីបអឺរ៉ុប និងដែលបានធ្វើឡើង ក្រោយពីមានគ្រោះថ្នាក់បាក់រលំអាគាររោងចក្រមួយនៅបង់ក្លាដែសកាលពីឆ្នំា ២០១៣ ដោយបណ្តាលឲ្យមានអ្នកស្លាប់ និងរបួសជាច្រើននាក់។
ចុះផ្សាយនៅថ្ងៃ៖
ស្តាប់ - ០២:១១
នៅក្នុងរបាយការណ៍នោះ ក្រុមអធិការកិច្ចបានរកឃើញបញ្ហាសន្តិសុខប្រមាណជា ៨០ ០០០ករណីនៅតាមរោងចក្រផលិតសម្លៀកបំពាក់ចំនួន ១ ១០៦រោងចក្រនៅក្នុងប្រទេសបង់ក្លាដែស និយាយជារួម គឺគ្មានរោងចក្រណាមួយដែលមានកម្រិតសន្តិសុខតាមបទដ្ឋានអន្តរជាតិទេ។ លោកប្រាដ ឡូវែន ប្រធានក្រុមអធិការកិច្ចបានបញ្ជាក់ថា នៅគ្រប់រោងចក្រទំាងអស់ តំាងពីខ្នាតតូច ដល់ខ្នាតធំសុទ្ធតែមានបញ្ហាសន្តិសុខដូចគ្នា ដូចជារចនាសម្ព័ន្ធអគារផុយស្រួយ និងគ្មានបំពាក់ដោយប្រព័ន្ធពន្លត់អគ្គិភ័យទេ។ យោងតាមលោកប្រាដ ឡូវែន បញ្ហាសន្តិសុខបានចាប់ផ្តើមតំាងពីការដំឡើងម៉ាស៊ីនផលិតសម្លៀកបំពាក់មានទម្ងន់ធ្ងន់ដាក់នៅលើជាន់អគារដែលមានគ្រោងឆ្អឹងដែកតូចៗ ប្រព័ន្ធអគ្គិសនីប្រកបដោយគ្រោះថ្នាក់ និងគ្មានច្រកចេញនៅពេលមានអាសន្នទេ។ គួររម្លឹកជូនថា ក្រុមអធិការកិច្ចនេះត្រូវបានបញ្ជូនដោយក្រុមហ៊ុនសម្លៀកបំពាក់ម៉ាកល្បីៗនៅអឺរ៉ុប និងដែលបានធ្វើឡើង បន្ទាប់ពីមានគ្រោះថ្នាក់បាក់រលំអគារមួយនៅរ៉ាណា ប្លាហ្សាកាលពីខែមេសា ឆ្នំា ២០១៣ ដោយបានបណ្តាលឲ្យស្លាប់កម្មករ កម្មការនី ១ ១៣៨នាក់ និងរបួសជាង ២ ០០០នាក់។
អ៊ីចឹងហើយបានជានៅពេលនេះ ក្រុមអធិការកិច្ចបានចេញអនុសាសន៍ឲ្យម្ចាស់រោងចក្រទំាងអស់ផ្តើមរៀបចំរឿងសន្តិសុខនៅតាមរោងចក្ររបស់ខ្លួនដែលនឹងត្រូវការចាយប្រាក់សរុបជាង ១ ០០០លានដុល្លារ។ គឺជាកាតព្វកិច្ចមួយដែលមិនអាចចៀសរួច បើក្រុមហ៊ុនផលិតសម្លៀកបំពាក់ទំាងនោះចង់បន្តរកស៊ីជាមួយក្រុមហ៊ុនសម្លៀកបំពាក់បរទេស។ ក្រៅពីក្រុមអធិការកិច្ចដែលបញ្ជូនដោយក្រុមហ៊ុនសម្លៀកបំពាក់ម៉ាកល្បីៗនៅអឺរ៉ុប ក៏នៅមានក្រុមអ្នកស៊ើបអង្កេតមួយក្រុមទៀតតំណាងឲ្យក្រុមហ៊ុនសម្លៀកបំពាក់ម៉ាកល្បីៗរបស់អាមេរិកដែលបានចុះទៅពិនិត្យនៅក្នុងរោងចក្រផលិតសម្លៀកបំពាក់ចំនួន ៥៨៧រោងចក្រកាលពីខែកក្កដាកន្លងទៅ និងដែលបានចេញអនុសាសន៍ដូចគ្នា។
លោកស្ហាហ៊ីឌុលឡា អាស្ហ៊ីម អនុប្រធានសមាគមក្រុមហ៊ុនផលិត និងនំាចេញសម្លៀកបំពាក់នៅបង់ក្លាដែសបានសម្តែងការពេញចិត្តចំពោះលទ្ធផលស៊ើបអង្កេតរបស់ក្រុមអធិការបរទេស និងថា លោកនឹងព្យាយាមជម្រុញឲ្យម្ចាស់រោងចក្រទំាងអស់ផ្តើមរៀបចំគិតគូរបញ្ហាសន្តិសុខតាមស្តង់ដារអន្តរជាតិដោយសង្ឃឹមថា នឹងគ្មានរឿងកើតឡើងជាថ្មីដូចនៅរ៉ាណា ប្លាហ្សាទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ