អាមេរិកបញ្ជូនអាវុធជួយទាហានលីបង់
ប្រឈមមុខនឹងការវាយប្រហារកាន់តែខ្លាំងទៅៗរបស់ពួកឧទ្ទាមជីហាតអ៊ីស្លាមនិយមជ្រុល នៅតាមបណ្តោយព្រំដែនលីបង់ជាប់ជាមួយស៊ីរី លីបង់បានអំពាវនាវសុំជំនួយយោធាពីអន្តរជាតិ។ ឯកអគ្គរដ្ឋទូតអាមេរិកប្រចាំលីបង់ បានឲ្យដឹងកាលពីថ្ងៃព្រហស្បតិ៍ថា អាមេរិកនឹងបញ្ជូនគ្រឿងសព្វាវុធទៅជួយដល់យោធាលីបង់។
ចុះផ្សាយនៅថ្ងៃ៖
ស្តាប់ - ០១:៤០
ចាប់តាំងពីថ្ងៃទី២សីហាមក ពួកឧទ្ទាមជីហាតអ៊ីស្លាមនិយមជ្រុលនៅលីបង់ បានបង្កអំពើហិង្សាដែលបានបណ្តាលឲ្យស្លាប់យោធាលីបង់អស់១៩នាក់ហើយ។ ថែមពីនេះទៅទៀតមានយោធា១៩នាក់ផ្សេងទៀត ដែលត្រួវបានពួកអ៊ីស្លាមនិយមជ្រុលចាប់ខ្លួនជាចំណាប់ខ្មាំង។ ប្រឈមមុខនឹងការវាយប្រហារទាំងនេះ ទាហានលីបង់ដែលពុំសូវជាមានគ្រឿងសព្វាវុធទំនើបៗ កំពុងតែជួបនឹងបរាជ័យ។ លីបង់បានប្រកាសជាឱឡារិក សូមឲ្យប្រទេសធំៗជាមិត្ត ជួយផ្តល់ជំនួយដើម្បីធ្វើការទប់ទល់ទៅនឹងពួកអ៊ីស្លាមនិយមជ្រុល។
ឆ្លើយតបទៅនឹងសំណើនេះ ឯកអគ្គរដ្ឋទូតអាមេរិកប្រចាំលីបង់ បានឲ្យដឹងថាអាមេរិកនិងបញ្ជូនជំនួយយោធាជាគ្រឿងអាវុធយុទ្ធភ័ណ្ឌមកជួយលីបង់។ លោកបានបន្តថា ចាប់តាំងពីខែតុលាឆ្នាំ២០១៣មក អាមេរិកបានផ្តល់ជំនួយគិតជាទឹកប្រាក់ប្រមាណជា១២០លានដុល្លារអាមេរិក ក្នុងការហ្វឹកហាត់ ក៏ដូចជាការផ្គត់ផ្គង់គ្រឿងសម្ភារៈយោធាដល់លីបង់។ ជំនួយទាំងនេះធ្វើឡើង ក្នុងគោលដៅជួយលីបង់ ក្នុងការប្រយុទ្ធប្រឆាំងទៅនឹងការបះបោររបស់ពួកឧទ្ទាមជីហាតអ៊ីស្លាមនិយមជ្រុល ឲ្យមានប្រសិទ្ធិភាព។ សូមបញ្ជាក់ថា ពួកឧទ្ទាមទាំងនោះ គឺជាពួកអ៊ីស្លាមនិយមជ្រុល ដែលបានធ្វើការបះបោរនៅប្រទេសស៊ីរី ហើយកន្លងមកនេះ បានធ្វើការវាយប្រហារ លុកលុយមកដល់លីបង់ដែលជាប្រទេសក្បែរខាង។
សូមរំលឹកផងដែរថា កាលពីខែធ្នូ ឆ្នាំទៅ ប្រទេសអារ៉ាប៊ីសាអ៊ូឌីត បានផ្តល់ជំនួយចំនួន៣ពាន់លានដុល្លារអាមេរិក ឲ្យលីបង់ដើម្បីទិញគ្រឿងសព្វាវុធពីបារាំង។ ថ្មីៗនេះទៀត បន្ទាប់ពីមានអំពើហិង្សានៅតំបន់អាកសាល់ អារ៉ាប៊ីសាអ៊ូឌីត បានផ្តល់ប្រាក់១ពាន់លានផ្សេងទៀត សម្រាប់ប្រើប្រាស់ក្នុងការចំណាយ បន្ទាន់ផ្សេងៗ។ មកទល់ពេលនេះ បារាំងនៅមិនទាន់ប្រគល់គ្រឿងអាវុធដល់លីបង់ ទៅតាមការបញ្ជាទិញទេ។ ការយឺតយ៉ាវនេះ បានធ្វើឲ្យលីបង់ខឹងសម្បារជាខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ