ម៉ាឡេស៊ីច្រានចោលការចោទប្រកាន់របស់អាមេរិកថា ខ្លួនជាប្រទេសដែលសម្បូរការជិះជាន់និងជួញដូរមនុស្ស
ប្រទេសម៉ាឡេស៊ីបានច្រានចោលទាំងស្រុង នូវការសន្និដ្ឋានក្នុងរបាយការណ៍មួយ របស់សហរដ្ឋអាមេរិកដែលថា ម៉ាឡេស៊ីមិនបានចាត់វិធានការឲ្យម៉ត់ចត់ ក្នុងការលប់បំបាត់ការជួញដូរមនុស្សខុសច្បាប់។ ក្នុងរបាយការណ៍នោះមានប្រទេសបីដែលអាមេរិកបានថ្កោលទោសគឺ ម៉ាឡេស៊ី ថៃ និង វ៉េណេស៊ុយអេឡា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
បន្ទាប់ពីសហរដ្ឋអាមេរិកចេញរបាយការណ៍ ចោទប្រកាន់យ៉ាងចំៗទៅលើប្រទេសខ្លួន លោករដ្ឋមន្ត្រីក្រសួងការបរទេសម៉ាឡេស៊ី បានចេញមកបដិសេធវិញភ្លាម។ លោកថារបាយការណ៍របស់អាមេរិក មិនបានធ្វើឡើងដោយសមហេតុសមផលទេ។ លោកបន្តថា ប៉ុន្មានឆ្នាំចុងក្រោយនេះ ម៉ាឡេស៊ីបានចាត់វិធានការចាំបាច់ ជាច្រើនក្នុងការកាត់បន្ថយការជួញដូរមនុស្ស និងពលករខុសច្បាប់។ បន្ទាប់ពីប្រតិកម្មនេះ ក្រសួងការបរទេសអាមេរិក បាននិយាយថានឹងពិនិត្យរបាយការណ៍នោះសាជាថ្មីឡើងវិញ។
ម៉ាឡេស៊ី និង ថៃ ធ្លាប់បានអាមេរិកដាក់បញ្ចូលទៅក្នុងបញ្ជីខ្មៅ កាលពីឆ្នាំ២០១៣រួចមកហើយ។ អាមេរិកធ្លាប់ទាំងគំរាមថានឹងដាក់ទណ្ឌកម្មសេដ្ឋកិច្ច បើសិនជាគ្មានការកែរលម្អ។ ប្រទេសម៉ាឡេស៊ី ក៏ត្រូវអាមេរិកចោទប្រកាន់ផងដែរ ថាមិនបានអនុម័តកម្មវិធីការពារជាមូលដ្ឋានទាក់ទងទៅនឹងការធ្វើចរាចរណ៍ពលករបរទេស។
ជាការពិតណាស់ ប្រទេសម៉ាឡេស៊ីនិងប្រទេសថៃ ជាប្រទេសដែលមានសេដ្ឋកិច្ចលូតលាស់ចំបងក្នុងតំបន់អាស៊ីអាគ្នេយ៍។ ប្រទេសទាំងពីរបានទាក់ទាញកម្លាំងពលកម្ម ពីបណ្តាប្រទេសក្រីក្រក្នុងតំបន់ជាច្រើន។ មានក្រុមហ៊ុនម៉ាឡេស៊ីជាច្រើនដែលបានប្រមែប្រមូលយកកម្មករក្រីក្រ ពីបណ្តាប្រទេសផ្សេងៗក្នុងតំបន់ ឲ្យទៅធ្វើការនៅម៉ាឡេស៊ី។ ពលករទាំងនោះ ភាគច្រើនគឺត្រូវជាប់បំណុលពួកជនទុច្ចរិត ដែលរកស៊ីជួញដូរនាំមនុស្សទៅឲ្យក្រុមហ៊ុន។ ជាទូទៅពលករត្រូវគេបញ្ជូនឲ្យទៅធ្វើការនៅតាមទូកនេសាទ រឺតាមចំការដំណាំ ដោយគ្មានលក្ខខណ្ឌការងារត្រឹមត្រូវ។ ពលការិនីខ្លះត្រូវគេបង្ខំឲ្យធ្វើការបំរើតាមផ្ទះ រឺធ្លាក់ក្នុងរបរពេស្យាចារ។ យោងតាមរបាយការណ៍របស់អង្គការពលកម្មអន្តរជាតិ ពួកឈ្មួញជួញដូរមនុស្សខុសច្បាប់រកចំណេញប្រមាណជា ១៥០ពាន់លានដុល្លារក្នុងមួយឆ្នាំ។ ក្នុងនោះបើគិតតែរបរជួញដូរផ្លូវភេទ គឺស្មើនឹង៩៩ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ