ហុងកុង៖ បាតុកម្មប្រឆាំង ២ខែ មនុស្សជាង២០០នាក់ ត្រូវចាប់ខ្លួន
បាតុកម្មប្រឆាំងរដ្ឋាភិបាលនៅហុងកុង ពីថ្ងៃសៅរ៍ទី៣សីហា, មនុស្សយ៉ាងហោច ជាង២០នាក់ ត្រូវឃាត់ខ្លួន។ បើគេបូកសរុបតាំងពីផ្តើមការតវ៉ា ថ្ងៃទី៩មិថុនា រហូតមកទល់ពេលនេះ, ប៉ូលីសហុងកុង បានចាប់ខ្លួន បាតុករ ជាង២០០នាក់ ក្នុងរយៈពេល៨សប្តាហ៍។ ការប៉ះទង្គិចគ្នារវាងហ្វូងបាតុករ និងក្រុមនគរបាល កើតមានជាបន្តបន្ទាប់ ហើយសកម្មភាពតវ៉ា ហាក់លេចចេញនូវសញ្ញាណហិង្សា។
ចុះផ្សាយនៅថ្ងៃ៖ កែប្រែថ្ងៃទី៖
ពេលយប់ថ្ងៃសៅរ៍ មានការប៉ះទង្គិចគ្នារវាងប៉ូលីសហុងកុង និងបាតុកររាប់ពាន់នាក់ នៅក្នុងសង្កាត់មួយដែលម្តុំដោយកន្លែងទេសចរណ៍និងមណ្ឌលពាណិជ្ជកម្ម។ នគរបាលហុងកុង ប្រាប់ថាបានឃ្លាត់ខ្លួនមនុស្សយ៉ាងហោច២០នាក់។
នៅថ្ងៃអាទិត្យ ទី៤សីហា បាតុករគាំទ្រលិទ្ធប្រជាធិបតេយ្យរាប់ពាន់នាក់ បន្តការតវ៉ារបស់ខ្លួនដូចតាមការគ្រោងទុក បើទោះបីកម្តៅនៃភាពតានតឹងគ្នាជាមួយសមត្ថកិច្ច នៅតែក្តៅខ្លាំងនៅឡើយក្តី។ បាតុករប្រឆាំងរដ្ឋបាលហុងកុង ដើរហែក្បួន ចំនួនពីរ។ ទីមួយ ក្បួនដើរកាត់កោះហុងកុង ហើយក្បួនដំណើរមួយទៀត គឺដើរជាន់ភាគខាងជើងហុងកុង។ ថ្ងៃច័ន្ទ ក្រុមបាតុករប្រឆាំង ប្រកាសធ្វើកូដកម្មឈប់ធ្វើការជាទូទៅ គ្រប់ទីកន្លែង ហើយនឹងមានការជួបប្រមូលផ្តុំគ្នាផង។
ការតវ៉ាជំទាស់នឹងរដ្ឋអំណាចហុងកុងនេះ កើតមាន៨សប្តាហ៍មកហើយ តាំងពីពេលដែល ថ្នាក់ដឹកនាំតំបន់ស្វ័យតហុងកុង ចង់ធ្វើច្បាប់ផ្តល់បត្យាប័ន បញ្ជូនអ្នកជាប់ទោសហុងកុង ទៅជម្រះក្តីក្នុងតុលាការចិន។ សំណើច្បាប់នេះ ត្រូវផ្អាកទៅវិញ ដោយសារតែការតវ៉ាប្រឆាំងខ្លាំងពេក។
អាជ្ញាធរហុងកុង បង្ក្រាបអ្នកតវ៉ា ដោយមធ្យោបាយផ្សេងៗ ដូចជាចាប់ឃុំខ្លួន បាញ់កំាំភ្លើងគ្រាប់កៅស៊ូ និងបាញ់ឧស្ម័នបង្ហូរទឹកភ្នែកជាដើម។ ចំណែក រដ្ឋបាលចិនទទួលបន្ទុកកិច្ចការហុងកុង បានគំរាមថានឹងធ្វើអន្តរាគមន៍ ប្រសិនបើស្ថានការណ៍តម្រូវឱ្យចាំបាច់។
ទោះយ៉ាងណាក្តី យុវជនហុងកុង និស្សិត បញ្ញវន្ត និងអ្នកតវ៉ាក្មេងៗ បានសម្តែងសុទិដ្ឋិនិយមចំពោះចលនារបស់ខ្លួន ប្រាប់ភ្នាក់ងារកាសែតបារាំង AFP ឈរជើងនៅទីនោះថា អ្នកតវ៉ាខ្លះក៏មានអារម្មណ៍ភ័យខ្លាចទម្ងន់នៃការបង្ក្រាបពីសំណាក់អាជ្ញាធរដែរ ប៉ុន្តែគោលបំណងពួកគេ គឺសាមញ្ញទេ។ ពួកគេចង់ឱ្យ ហុងកុង ជាកន្លែងមួយល្អប្រសើរជាងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ