តួកគី៖ ប្រធាធិបតីបន្តបោសសម្អាតកងទ័ព បិទសាលានិងអង្គការមនុស្សធម៌
៩ថ្ងៃ ក្រោយរដ្ឋប្រហារមិនបានសម្រេច ដ៏មិនគួរឲ្យជឿ លោកប្រធានាធិបតីតួកគី កំពុងតែប្រើកណ្តាប់ដៃដែក ដើម្បីបោសសម្អាតចលនាប្រឆាំង នៅក្នុងកងទ័ព និងក្នុងកងអង្គរក្សផ្ទាល់របស់លោក។ បន្ថែមពីនេះ ក្រិត្យច្បាប់របស់រដ្ឋាភិបាល ដែលបានចេញកាលពីថ្ងៃទី២៣ កក្កដា បានបញ្ជារឲ្យបិទ សាលារៀន សកលវិទ្យាល័យ និង អង្គការមនុស្សធម៌ជាច្រើន ដោយចោទថាជាបក្សពួករបស់ចលនានយោបាយប្រឆាំងនឹង លោកប្រធានាធិបតី អ៊ែរដូហ្កាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
រដ្ឋប្រហារធ្លាក់ទឹក ដ៏គួរឲ្យអស់សំណើចរបស់យោធាតួកគី ប្រៀបបានដូចជាថ្នាំកម្លាំងសម្រាប់លោកប្រធានាធិបតីអ៊ែរដូហ្កាន់ ដែលពេលនេះកំពុងតែសម្រុកបញ្ចេញសាច់ដុំ ធ្វើការបោសសម្អាតរាល់មេរោគប្រឆាំង ដែលមាននៅពាសពេញតួកគី។ ចលនាសម្អាតមេរោគ រឺហៅម្យ៉ាងទៀតថាជាការប្រមូលក្តោបក្តាប់អំណាច។
ដោយបានប្រកាសដាក់ប្រទេសក្នុងភាពអាសន្ន និងបានព្យួរការអនុវត្តសន្ធិសញ្ញាស្តីពីការគោរពសិទ្ធិមនុស្ស លោកប្រធានាធិបតីតួកគី បានសម្រេចចេញក្រិត្យច្បាប់មួយ កាលពីថ្ងៃទី២៣ កក្កដា ដោយបានកំណត់ថា ការឃុំខ្លួនបណ្តោះអាសន្ន ដែលពីមុនមានរយៈពេលតែ៤ថ្ងៃ គឺនឹងត្រូវបន្ថែមរហូតដល់ ៣០ថ្ងៃ។ លោកអ៊ែរដូហ្កាន់ ក៏បានបញ្ជារឲ្យបិទ សាលារៀនឯកជនចំនួន១០៤៣ សកលវិទ្យាល័យចំនួន១៥ អង្គការនិងសមាគមចំនួន១២២៩ សហជីពចំនួន១៩ ព្រមទាំងមន្ទីរសុខភាពឯកជនចំនួន៣៥កន្លែង ផងដែរ។ សាលារៀន អង្គការ និងស្ថាប័នទាំងអស់នេះ ត្រូវបិទទ្វារដោយគេចោទថាជាបក្សពួកជាមួយលោក Fatullah Gülen មនុស្សដ៏មានប្រជាប្រិយភាពម្នាក់ ដែលប្រឆាំងនិងលោកអ៊ែរដូហ្កាន់។
ដោយឡែក លោកHalis Hanci ជាក្មួយប្រុស និងជាដៃស្តាំរបស់លោក Fatullah Gülenត្រូវបានកម្លាំងរដ្ឋាភិបាលចាប់ឃាត់ខ្លួន។ លោក Fatullah Gülen ដែលបច្ចុប្បន្ននិរទេសខ្លួននៅសហរដ្ឋអាមេរិក បានបដិសេធថាខ្លួនមិនមានជាប់ពាក់ព័ន្ធនឹងការធ្វើរដ្ឋប្រហារទេ ហើយបានបរិហារថា នេះគឺជាការរៀបចំទាំងស្រុង របស់រដ្ឋាភិបាលលោក អ៊ែរដូហ្កាន់ ដើម្បីមានឱកាសបង្រ្កាបចលនាប្រឆាំង និងសើររើរៀបចំកងទ័ពជាថ្មី ដើម្បីកំចាត់មេទាហានដែលមិនស្តាប់បង្គាប់។
ចេតនារៀបចំកងទ័ពជាថ្មី និងប្រមូលអំណាចកងទ័ព មកក្នុងដៃរបស់លោកអ៊ែរដូហ្កាន់ បានលេចរូបរាង្គកាន់តែច្បាស់ ក្នុងពេលនេះ បន្ទាប់ពីលោក បានកោះប្រជុំយ៉ាងតក់ក្រហល់ ក្រុមប្រឹក្សាកងទ័ពកំពូល នៅថ្ងៃព្រហស្បត្តិខាងមុខនេះ ហើយដែលធម្មតាកិច្ចប្រជុំរបៀបនេះ ត្រូវធ្វើនៅអគ្គបញ្ជាការដ្ឋានកំពូល តែលើកនេះ គឺត្រូវធ្វើនៅវិមានប្រធានាធិតបីផ្ទាល់តែម្តង។ ដូចគ្នាដែរ កងសេនាធិការប្រធានាធិបតី ត្រូវបានរំលាយចោលទាំងស្រុង ដើម្បីរៀបចំសាជាថ្មី។
សូមបញ្ជាក់ថា ក្រោយការធ្វើរដ្ឋប្រហារមិនបានសម្រេច អាជ្ញាធរតួកគី បានតាមប្រមាញ់ចាប់ឃុំខ្លួនមនុស្សបាន១ម៉ឺននាក់ ដែលភាគច្រើនជាមន្ត្រីរដ្ឋការ អ្នកច្បាប់ ចៅក្រម និងជាពិសេសនាយទាហាន។ មិនត្រឹមតែប៉ុណ្ណោះ មន្ត្រីបំរើការរដ្ឋសឹងគ្រប់ស្ថាប័នចំនួនជិត៦ម៉ឺននាក់ ត្រូវបានគេលប់ឈ្មោះ រឺបញ្ឈរជើងពីការងារ។ មតិអ្នកវិភាគទូទៅ កំពុងមានការងឿងឆ្ងល់ ពីលទ្ធភាពនៃការតាមចាប់ រឺដាក់ពិន័យមនុស្សរាប់ម៉ឺននាក់បែបនេះ ក្នុងពេលមិនដល់១០ថ្ងៃផង បើសិនជាគ្មានការរៀបចំតារាងឈ្មោះទុកជាមុន ពីសំណាក់រដ្ឋាភិបាលតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ