សំណើថ្មីរបស់ អាលី អាប់ដាឡា សាឡេះ ក្រោយពីឧត្តមសេនីយ៍កំពូលៗរត់ចោល
ក្រោយពីឧត្តមសេនីយ៍កំពូលៗនិងកងកម្លាំងយោធាមួយប៉ែកបានរត់ចោល នៅថ្ងៃអង្គារម្សិលមិញ លោកប្រធានាធិបតីយេមែន អាលី អាប់ដាឡា សាឡេះ បានធ្វើសំណើលាឈប់ពីមុខតំណែងនៅដើមឆ្នាំ២០១២ខាងមុខនេះ។ ប៉ុន្តែក្រុមអ្នកប្រឆាំងបានបដិសេធសំណើនេះ ហើយបានទាមទារឲ្យ អាលី អាប់ដាឡា សាឡេះ ចាកចេញពីមុខតំណែងភ្លាមៗ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
មុនធ្វើសំណើថ្មីនេះ លោកប្រធានាធិបតីយេមែន អាលី អាប់ដាឡា សាឡេះ ដែលបានកាន់កាប់អំណាចអស់រយៈពេល៣២ឆ្នាំមកហើយធ្លាប់បានព្រមានប្រាប់ពីគ្រោះថ្នាក់នៃសង្គ្រាមស៊ីវិលដែលអាចកើតមានដល់ប្រទេសជាតិ។ រដ្ឋធានីSanaa ដែលគេឃើញមានតាំងពីថ្ងៃចន្ទដាក់ពង្រាយនូវរថក្រោះជាច្រើនគ្រឿង។
នៅទីក្រុងមូកាឡាដែលឋិតនៅប៉ែកអាគ្នេយ៍នៃប្រទេសយេមែន គេឃើញមានការវាយប្រហារគ្នាមួយកាលពីយប់ថ្ងៃចន្ទកន្លងទៅដែលបានបណ្តាលឲ្យមានមនុស្សស្លាប់ពីរនាក់។
ភាពតានតឹងនៅប្រទេសយេមែននេះ បានបណ្តាលឲ្យសហរដ្ឋអាមេរិកមានក្តីបារម្ភយ៉ាងខ្លាំង ដោយហេតុថា សម្រាប់ទីក្រុងវ៉ាស៊ីនតោន ប្រធានាធិបតីយេមែន អាលី អាប់ដាឡា សាឡេះជាសម្ព័ន្ធមិត្តម្នាក់ដ៏សំខាន់ក្នុងការធ្វើសង្គ្រាមប្រឆាំងនឹងភេរវនិយមអាល់កៃដា។
ដើម្បីរកច្រកចេញពីវិបត្តិយេមែន ប្រធានាធិបតី អាលី អាប់ដាឡា សាឡេះដែលអាណត្តិប្រធានាធិបតីត្រូវបញ្ចប់នៅចុងឆ្នាំ២០១៣បានស្នើឲ្យមាន “ការបោះឆ្នោតសភានៅមុនដំណាច់ឆ្នាំ២០១១ បន្ទាប់មក ការបោះឆ្នោតជ្រើសតាំងប្រធានាធិបតីដោយសមាជិកសភានៅដើមឆ្នាំ២០១២”។
ក៏ប៉ុន្តែ ក្រុមអ្នកប្រឆាំងបានបដិសសេធសំណើនេះ ហើយអ្នកនាំពាក្យនៃចលនាប្រឆាំងបានថ្លែងថា “ប្រជាជនយេមែនទាមទារឲ្យ អាលី អាប់ដាឡា សាឡេះចាកចេញពីមុខតំណែងប្រធានាធិបតីភ្លាមៗដោយគ្មានបង្អង់ ទើបប្រជាជនយេមែនយល់ព្រម”។
ដូច្នេះឃើញថា ប្រធានាធិបតីយេមែន អាលី អាប់ដាឡា សាឡេះគ្មានជម្រើសអ្វីក្រៅពីលាចាកចេញពីតំណែងឡើយ ដោយហេតុខ្វះការគាំទ្រពីសំណាក់ប្រជាជន ពីសំណាក់យោធា ហើយនិងខ្វះការគាំទ្រពីសំណាក់ប្រធានកុលសម្ព័ន្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ