ប្រធានាធិបតីស៊ីរី ទទួលស្គាល់ទាហានរបស់ខ្លួនចុះខ្សោយកម្លាំង
លង់ខ្លួនក្នុងសង្រ្គាមស៊ីវិលបង្ហូរឈាងជាង៤ឆ្នាំនេះ ដែលបានសម្លាប់មនុស្សជាង ២សែន ៣ម៉ឺននាក់ ប្រធានាធិបតីស៊ីរី លោកបាស្ហារ អាល់ អាសាដ បានប្រកាសទទួលស្គាល់ថា ទាហានស៊ីរីកំពុងហត់នឿយ ដោយសារសង្រ្គាម។ ហត់នឿយ ប៉ុន្តែ មិនចុះចាញ់។ នេះ បើតាមការអះអាងរបស់ប្រធានាធិបតី ស៊ីរី កាលពីថ្ងៃអាទិត្យទី ២៦ កក្កដា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ជាឥរិយាបថដ៏ កម្រ ប្រធានាធិបតីស៊ីរី លោកបាស្ហារ អាល់ អាសាដ បានប្រកាសទទួលស្គាល់ការថយកម្លាំងរបស់កងទ័ពរដ្ឋាភិបាលស៊ីរី។ នៅក្នុងសុន្ទរកថា ថ្លែងទៅកាន់អ្នកតំណាងស្ថាប័នសេដ្ឋកិច្ច ស៊ីរី ដែលត្រូវបានថត ចាក់ផ្សាយតាមទូរទស្សន៍ជាតិស៊ីរី លោកអាសាដបាននិយាយថា ពិតជាមានការខ្វះខាតធនធានមនុស្សនៅក្នុងជួរកងទ័ពស៊ីរី។
តាមអ្នកជំនាញ ចាប់តាំងពីផ្ទុះសង្រ្គាមស៊ីវិលនៅស៊ីរី ចំនួនកងទ័ពស៊ីរីបានថយចុះ ជិតពាក់កណ្តាល នៃចំនួនសរុបដែលមានប្រមាណ៣សែននាក់។ បរិមាណកងទ័ពស៊ីរីថយចុះ ដោយសារ តែទាហានមួយចំនួនបានរត់ទៅចុះចូលជាមួយក្រុមឧទ្ទាម ឬមួយចំនួនទៀត បាក់ស្បាតរត់ចោលជួរតែម្តង ក្នុងពេល ទាហានរដ្ឋាភិបាល និងពួកឈ្លបគាំទ្ររដ្ឋាភិបាលជាង ៨ម៉ឺននាក់ផ្សេងទៀត បានស្លាប់នៅក្នុងសមរភូមិប្រយុទ្ធ។
“បញ្ហាដែលកងទ័ពស៊ីរីកំពុងជួបប្រឈមឥលូវនេះ មិនមែនជារឿងផែនការយុទ្ធសាស្រ្តអ្វីទេ ប៉ុន្តែ គឺការហត់នឿយ ដោយសារសង្រ្គាម។ ហត់នឿយ មិនមែនមានន័យថា ចុះចាញ់នោះទេ។ ចុះចាញ់ បរាជ័យ គ្មានទេ នៅក្នុងវចនានុក្រមស៊ីរី។ យើងនឹងតស៊ូ រហូតដល់ឈ្នះ” នេះជាសំដីអះអាងរបស់លោកប្រធានាធិបតីបាស្ហារ អាល់អាសាដ។
នៅក្នុងសង្រ្គាមបង្ហូរឈាម ជាង ៤ឆ្នាំ កងទ័ពស៊ីរីត្រូវប្រយុទ្ធ តទល់នឹងគូសត្រូវ ពីគ្រប់ទិស ដែលមានតាំងពីក្រុមជីហាតនៃអង្គការរដ្ឋអ៊ីស្លាម ក្រុមអ៊ីស្លាមជ្រុលនិយម ដែលជាបណ្តាញរបស់ក្រុមអាល់កៃដា និងក្រុមឧទ្ទាម ដែលជាក្រុមប្រឆាំង របស់រដ្ឋាភិបាលស៊ីរី តាំងពីដំបូងទី។ ប្រឈមទៅនឹងការខ្វះធនធានទ័ព នៅក្នុងសមរភូមិ រដ្ឋាភិបាលស៊ីរី បានផ្តើមយុទ្ធនាការផ្សព្វផ្សាយ នៅដើមខែកក្កដា នេះ ដើម្បី បញ្ចុះបញ្ចូលប្រជាជនឲ្យចូលបម្រើទ័ព។ កាលពីថ្ងៃសៅរ៍ ទី ២៥កក្កដា ប្រធានាធិបតីស៊ីរី ថែមទាំងប្រកាសលើកលែងទោសរាល់អ្នករត់ចោលសមរភូមិ ទាំងឡាយណា ដែលសុខចិត្តត្រលប់ចូលប្រយុទ្ធឡើងវិញ។
ការប៉ុនប៉ងបើកការចរចាថ្នាក់ អន្តរជាតិដើម្បីរកច្រកចេញឲ្យវិបត្តស៊ីរី បានបរាជ័យ រាល់លើក។ ក្រុមប្រឆាំងនៅតែទាមទារឲ្យលោកបាស្ហារ អាល់អាសាដ ចុះចេញពីតំណែង ក្នុងពេលដែលលោកអាសាដផ្ទាល់ ចង់បើកការចរចាតែជាមួយក្រុមណាដែលគ្មានជាប់ពាក់ព័ន្ធនឹងក្រុមភេរវនិយម។ “ការចរចាបិទបញ្ចប់វិបត្តិស៊ីរី ដែលគ្មានរាប់បញ្ចូលការប្រយុទ្ធប្រឆាំងនឹងក្រុមភេរវនិយម គឺ ជាការចរចា ដែលគ្មានន័យ”។ នេះជាការបញ្ជាក់របស់លោកអាសាដ កាលពីថ្ងៃអាទិត្យ។ លោកអាសាដ ប្រើពាក្យភេរវនិយម សម្រាប់សំដៅក្រុមឧទ្ទាម ក្រុមប្រឆាំង ដែលទទួលបានការគាំទ្រពីពួកជីហាត អ៊ីស្លាមជ្រុលនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ