ក្រុមជីហាត និងក្រុមអាល់កៃដា សម្រុកដណ្តើមយកទឹកដីស៊ីរីទៅធ្វើរដ្ឋធានីរដ្ឋបាលរបស់ខ្លួន
ទាហានរដ្ឋាភិបាលស៊ីរី កាលពីថ្ងៃអាទិត្យ បានពង្រឹង ឈរជើង នៅជុំវិញ ទីក្រុងអ៊ីដលិប ដែលក្រុមអាល់នូស្រា របស់បណ្តាញអាល់កៃដា ទើបវាយយកបានកាលពីថ្ងៃសៅរ៍។ តាមអ្នកជំនាញ ក្រុមអាល់នូស្រា សាខាមួយរបស់អាល់កៃដា មានគោលដៅវាយយកទីក្រុងអ៊ីដលិបទៅធ្វើជារដ្ឋធានីសម្រាប់អនាគតដែនដីរបស់ខ្លួន។
ចុះផ្សាយនៅថ្ងៃ៖
ទីក្រុងធំទីពីររបស់រដ្ឋាភិបាលស៊ីរីអ៊ីដលិបបានធ្លាក់ទៅក្នុងដៃរបស់ពួកជីហាត នៃក្រុមអាល់នូស្រា នៅថ្ងៃសៅរ៍។ ការបាត់បង់ទីក្រុងសំខាន់មួយទៀត ទៅក្នុងដៃរបស់ពួកប្រឆាំង អាចធ្វើឲ្យអំណាច របស់រដ្ឋាភិបាល ស៊ីរី កាន់តែចុះខ្សោយ នៅក្នុងពេលដែលសង្រ្គាមស៊ីវិល ហែកហួរ រយៈពេល ៤ឆ្នាំ។ របបស៊ីរីបានបាត់បង់ទីក្រុងរ៉ាកា ដែលពេលនេះ កំពុងត្រូវពួកជីហាត នៃអង្គការរដ្ឋអ៊ីស្លាម យកទៅធ្វើជាទីតាំង រដ្ឋធានីសំខាន់ ក្នុងទឹកដីដែលខ្លួនវាយដណ្តើមយកបាននៅក្នុងប្រទេសស៊ីរី និងអ៊ីរ៉ាក់។
ពួកអាល់នូស្រា ដែលជាបណ្តាញអាល់កៃដា ទំនងចង់ធ្វើតម្រាប់តាមក្រុមជីហាត នៃអង្គការរដ្ឋអ៊ីស្លាម ដោយវាយដណ្តើមយកទីក្រុងអ៊ីដលិប នៅភាគខាងជើង ស៊ីរី ទៅធ្វើជារដ្ឋធានី រដ្ឋបាលរបស់ខ្លួន នៅថ្ងៃអនាគត។
នៅថ្ងៃអាទិត្យ បន្ទាប់ពីចាញ់ដៃក្រុមអាល់នូស្រា ទាហានរដ្ឋាភិបាលស៊ីរី បានប្រមូលផ្តុំ កម្លាំងជុំវិញ ទីក្រុងអ៊ីដលិប ដោយសង្ឃឹមនឹងវាយរុញច្រានពួកអាល់នូស្រាចេញពីទីក្រុងអ៊ីដលិបវិញ។ ពួកអាល់នូស្រាអាចវាយយកបានទីក្រុងអ៊ីដលិប តែក្នុងរយៈពេល៥ថ្ងៃ ដោយបានការចូលរួម គាំទ្រពីពួកឧទ្ទាមអ៊ីស្លាមនិយម ដែលជាក្រុមប្រឆាំងនឹងរដ្ឋាភិបាលរបស់លោកបាស្ហា អាល់អាសាដ។ ការប្រយុទ្ធ៥ថ្ងៃ ដែលបានសម្លាប់មនុស្ស ១៧០នាក់។ នេះបើតាមអង្គការតាមដានសិទ្ធិមនុស្សស៊ីរី។
តាមអង្គការតាមដានសិទ្ធិមនុស្សស៊ីរី ដែលបានដកស្រង់សំដីរបស់ពួកក្រុមប្រឆាំង គេរកឃើញ សាកសពរបស់អ្នកទោស ១៥នាក់ ដែលត្រូវបានទាហានរដ្ឋាភិបាលស៊ីរីប្រហារជីវិត មុនពេលដាក់មេផាយ គេចចេញពីទីក្រុងអ៊ីដលិប កាលពីថ្ងៃសៅរ៍។
នៅថ្ងៃអាទិត្យ កម្លាំងប្រឆាំងស៊ីរី នៅបរទេសបានស្វាគម និងចាត់ទុក ការវាយដណ្តើមយកបានទីក្រុងអ៊ីដលិប ថា ជាដំណាក់កាលឈានទៅរំដោះទាំងស្រុង ទឹកដីស៊ីរី ចេញពីដៃប្រធានាធិបតីបាស្ហា អាល់ អាសាដ។ នៅក្នុងសេចក្តីប្រកាសព័ត៌មាន របស់ខ្លួន ក្រុមប្រឆាំងស៊ីរីនៅបរទេស មិននិយាយយោងទៅដល់ថា ក្រុមណាជាអ្នកឈ្នះ វាយដណ្តើមយកបាន ទីក្រុងអ៊ីដលិប ទេ ប៉ុន្តែ បានត្រឹមអះអាងថា ក្រុមថ្មី ដែលចូលទៅកាន់កាប់ទីក្រុងអ៊ីដលិបនឹងគោរពច្បាប់អន្តរជាតិ និងការពារសន្តិសុខឲ្យប្រជាជនស៊ីរី។
ការណ៍ដែលរដ្ឋាភិបាលស៊ីរីបាត់បង់ទីក្រុងមួយទៀត ទៅក្នុងដៃរបស់ពួកក្រុមប្រឆាំង អាចជាជោគជ័យមួយសម្រាប់ចលនាប្រឆាំងស៊ីរី។ ប៉ុន្តែ នៅក្នុងស្ថានភាពជាក់ស្តែង ទឹកដីស៊ីរីកំពុងធ្លាក់បន្តិចម្តងៗ ទៅក្នុងការគ្រប់គ្រងរបស់ពួកជីហាត ពួកភេរវនិយម ដែលជាបណ្តាញអាល់កៃដា ប៉ុន្តែ មិនមែនធ្លាក់ទៅក្នុង ដៃរបស់ក្រុមប្រឆាំងស៊ីរី ដែលចង់ស្រោចស្រង់ប្រទេសឲ្យរួច ចេញផុតពីអំពើហិង្សា នោះទេ។ ទីក្រុងមួយទៀត ធ្លាក់ទៅក្នុងដៃរបស់ពួកជីហាតអាល់នូស្រា ដែលជាបណ្តាញអាល់កៃដា នឹងធ្វើឲ្យទឹកដីស៊ីរី កាន់តែច្រើនធ្លាក់ទៅក្រោមការកាន់កាប់របស់ពួកភេរវនិយម។ ដូច្នេះ វាជាដំណឹងមិនល្អ និងបង្កភាពស្មុគស្មាញ មួយកម្រិតទៀត សម្រាប់សម្ព័ន្ធអន្តរជាតិដែលចង់វាយបំផ្លាញឲ្យអស់ ក្រុមជីហាតពីក្រុងទឹកដីស៊ីរី និងអ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ