យេម៉ែន៖អ.ស.ប.បន្តគំាទ្រលោកប្រធានាធិបតីហាឌី តែក្រុមឧទ្ទាមអ៊ូទីស្សកំពុងបន្តវាតទីក្រសោបអំណាច
ស្ថានការណ៍កាន់តែធ្លាក់ដុនដាបខ្លំាងនៅក្នុងប្រទេសយេម៉ែន។ ក្រុមឧទ្ទាមហ៊ូទី្សកំពុងបន្តដំណើរទៅមុខឆ្ពោះទៅក្រសោបយកទីក្រុងអាដេនដែលលោកប្រធានាធីបតីហាឌីកំពុងពួនសម្ងំលាក់ខ្លួននៅទីនោះ។ ដំណើរទៅកាន់ទីក្រុងអាដេនពេលនេះបានកើតមានចំឡើង បន្ទាប់ពីពួកនេះបានចូលកាន់កាន់កាប់ដែនដីមួយភាគរបស់ទីក្រុងតាអេដែលជាទីក្រុងសំខាន់ទី៣ របស់ប្រទេសយេម៉ែន។ គឺប្រឈមនឹងស្ថានការណ៍កាន់តែដុនដាបនៅយេម៉ែនពេលនេះហើយដែលក្រុមប្រឹក្សាសន្តិសសុខអង្គការសហប្រជាជាតិបានអនុម័តចេញនូវសេចក្តីសម្រេចចិត្តមួយដោយបន្តគំាទ្រលោកប្រធានាធិបតីស្របច្បាប់យេម៉ែនហាឌី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
កិច្ចប្រជុំរបស់ក្រុមប្រឹក្សាសន្តិសុខអង្គការសហប្រជាជាតិស្តីពីប្រទេសយេម៉ែនដែលបានកោះប្រជុំបន្ទាន់នៅរសៀលថ្ងៃអាទិត្យ ទី២២ មីនា គឺជាសក្ខីកម្មមួយដែលបញ្ជាក់យ៉ាងច្បាស់ពីការព្រួយបារម្ភយ៉ាងខ្លំាងរបស់សហគមន៍អន្តរជាតិចំពោះព្រឹត្តិការណ៍វិវឌ្ឍន៍ចុងក្រោយនៅក្នុងប្រទេសយេម៉ែន ពិសេសអំពើភេរវកម្មផ្ទួនគ្នារៀបចំដោយអង្គការរដ្ឋអ៊ីស្លាមកាលពីថ្ងៃសុក្រ ទី២០ មីនាកន្លងទៅដោយបានផ្តាច់ជីវិតមនុស្ស ១៤២នាក់ និងការរំកិលទៅមុខរបស់ក្រុមឧទ្ទាមហ៊ូទី្សក្នុងគោលដៅក្រសោបអំណាចទំាងស្រុងនៅយេម៉ែន។
នៅក្នុងកិច្ចប្រជុំបន្ទាន់នោះ ក្រុមប្រឹក្សាសន្តិសុខមិននិយាយពីរដ្ឋប្រហារទេ តែបានថ្កោលទោសជាថ្មីម្តងទៀតលើវិធានការព្យាយាមដណ្តើមអំណាចជាលក្ខណៈឯកតោភាគីរបស់ពួកឧទ្ទាមហ៊ូទី្ស។ ទន្ទឹមគ្នានេះ ក្រុមប្រឹក្សាសន្តិសុខក៏បានបន្តគំាទ្រលោកប្រធានាធិបតីយេម៉ែនស្របច្បាប់ហាឌីដែលកំពុងភៀសខ្លួនពួនសម្ងំនៅក្នុងទីក្រុងអាដេនដែលជាទីក្រុងសំខាន់ទី២ របស់យេម៉ែន។ បន្ទាប់ពីវាយយកបានទីក្រុងតាអេនាពេលថ្មីៗមក កម្លំាងប្រដាប់អាវុធហ៊ូទី្សកំពុងបន្តដំណើរឆ្ពោះទៅយកទីក្រុងអាដេនទៀត។
យ៉ាងណាក៏ដោយ ក្រុមប្រឹក្សាសន្តិសុខនៅតែមានជំនឿលើដំណោះស្រាយតាមផ្លូវចរចា។ ជាថ្មីម្តងទៀត សមាជិកទំាង ១៥ប្រទេសនៃក្រុមប្រឹក្សាសន្តិសុខបានយល់ឃើញថា មានតែកិច្ចសន្ទនាតែមួយគត់ដែលអាចដោះស្រាយជម្លោះនៅយេម៉ែនសព្វថ្ងៃ។ ក៏ប៉ុន្តែ ប្រេសិតពិសេសរបស់អង្គការសហប្រជាជាតិលោកយ៉ាម៉ាល់ បឺណូបារបានព្រមានទុកមុនថា ភាគីលោកប្រធានាធិបតីហាឌី និងភាគីឧទ្ទាមហ៊ូទី្ស គ្មាននរណាមួយមានលទ្ធភាព និងសមត្ថភាពក្នុងការដណ្តើមយកអំណាចបានទំាងស្រុងទេ។ លោក បឺណូបារ យេម៉ែនបានយល់ឃើញថា បើភាគីជម្លោះទំាងពីរនៅបន្តហែកហួរគ្នារបៀបនេះ នោះយេម៉ែននឹងធ្លាក់ក្នុងសង្រ្គាមស៊ីវិល ដូចករណីប្រទេសអ៊ីរ៉ាក់ ស៊ីរី ឬមួយក៏លីប៊ីដោយចៀសមិនរួច។
អ្វីដែលជាការបារម្ភខ្លំាងរបស់ក្រុមប្រឹក្សាសន្តិសុខ គឺការដែលសាខាអាល់កៃដាក្នុងតំបន់ AQPA ឆ្លៀតឆក់យកឱកាសពីស្ថានការណ៍ដុនដាបនៅយេម៉ែនពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ