ក្រុមប្រឹក្សាសន្តិសុខនឹងបោះឆ្នោតទាមទារឲ្យក្រុមប្រដាប់អាវុធហ៊ូទី្សប្រគល់អំណាចឲ្យប្រធានាធិបតីយេម៉ែនវិញ
ក្រុមប្រដាប់អាវុធហ៊ូទី្ស ដែលបានចូលប្លន់អំណាចនៅយេម៉ែន កាលពីចុងខែមករាកន្លងទៅ បានប្រកាសថា ខ្លួនមិនចុះញ៉មនឹងការគំរាមពីបរទេសជាដាច់ខាត។ កាលពីថ្ងៃសៅរ៍ម្សិលមិញ រាជាណាចក្រអារ៉ាប់ទំាង៦ ក្នុងឈូងសមុទ្រពែរ្ស៍ ដែលបានកោះប្រជុំបន្ទាន់នៅទីក្រុងរីយ៉ាតរបស់ប្រទេសអារ៉ាប៊ី សាអូឌីត បានជំរុញឲ្យក្រុមប្រឹក្សាសន្តិសុខចេញសេចក្តីសម្រេចចិត្តដាក់ទណ្ឌកម្មទៅលើក្រុមប្រដាប់អាវុធហ៊ូទី្ស នៅយេម៉ែន។
ចុះផ្សាយនៅថ្ងៃ៖ កែប្រែថ្ងៃទី៖
ក្រុមប្រឹក្សាសន្តិសុខរបស់អង្គការសហប្រជាជាតិត្រូវគេរំពឹងថា នឹងបោះឆ្នោតលើសេចក្តីសម្រេចមួយ នៅថ្ងៃអាទិត្យនេះ ដែលនឹងទាមទារឲ្យក្រុមហ៊ូទី្សដកខ្លួនចេញពីអំណាច នៅយេម៉ែន និងដោះលែងលោកប្រធានាធិបតីហាឌី រួមទាំងមន្រ្តីរដ្ឋាភិបាលយេម៉ែនដទៃទៀត។ នៅក្នុងអត្ថបទព្រាង ប្រទេសទាំង១៥របស់ក្រុមប្រឹក្សាសន្តិសុខតម្រូវឲ្យពួកហ៊ូទី្សបោះបង់ចោលជាបន្ទាន់ និងដោយគ្មានលក្ខខណ្ឌ ការកាន់កាប់ស្ថាប័នរដ្ឋ និងត្រលប់មកចរចាសន្តិភាព នៅក្រោមការរៀបចំរបស់អង្គការសហប្រជាជាតិ។
សេចក្តីសម្រេចរបស់អង្គការសហប្រជាជាតិមានលើកនិយាយផងដែរពីទណ្ឌកម្ម ក្នុងករណីដែលក្រុមហ៊ូទី្សមិនគោរពធ្វើតាមសេចក្តីសម្រេចរបស់ក្រុមប្រឹក្សាសន្តិសុខ។ ក្រុមប្រឹក្សាសន្តិសុខធ្លាប់គំរាមដាក់ទណ្ឌកម្មប្រឆាំងនឹងក្រុមហ៊ូទី្ស កន្លងមកដែរ ប៉ុន្តែ គ្មានបានជោគជ័យ នោះទេ។ នៅក្នុងកិច្ចប្រជុំថ្នាក់រដ្ឋមន្រ្តី នៅទីក្រុងរីយ៉ាត រាជាណាចក្រអារ៉ាប់ទាំង៦ ដែលជាប្រទេសជិតខាងរបស់យេម៉ែន បានទាមទារឲ្យក្រុមប្រឹក្សាសន្តិសុខចាត់វិធានការ បែបចាប់បង្ខំ ដោយអនុវត្តជំពូកច្បាប់ទី៧ របស់អង្គការសហប្រជាជាតិ។ ជំពូកច្បាប់ទី៧ មានចែងពីការដាក់គំនាបសេដ្ឋកិច្ច ឬប្រើកម្លាំងយោធា ដើម្បីចាប់បង្ខំឲ្យក្រុមប្រដាប់អាវុធគោរពសេចក្តីសម្រេចរបស់ក្រុមប្រឹក្សាសន្តិសុខ។
នៅប៉ុន្មានម៉ោងក្រុមប្រឹក្សាសន្តិសុខបោះឆ្នោតចេញសេចក្តីសម្រេច ដាក់គំនាបលើខ្លួន ក្រុមហ៊ូទី្ស តាមរយៈ អ្នកនាំពាក្យ លោកមូហាម៉េដ អាប់ដេសាឡាម បានប្រកាសថា ពួកគេនឹងមិនលត់ជង្គង់ ចុះញ៉មនឹងការគំរាមកំហែងណាទាំងអស់។ ដកស្រង់សំដីដោយទីភ្នាក់ងារព័ត៌មាន សាបា ដែលខ្លួនបានយកមកគ្រប់គ្រង ចាប់តាំងពីចូលកាន់អំណាចនៅយេម៉ែន ក្រុមហ៊ូទី្សបានបញ្ជាក់ថា ប្រជាជានយេម៉ែនកំពុងចង់ដឹកនាំប្រទេសដោយខ្លួនឯង គឺមិនឲ្យស្ថិតនៅក្រោមឥទ្ធិពលរបស់បរទេសទៀតទេ។ ក្រុមហ៊ូទី្សបានចូលកាន់កាប់ទីក្រុងសាណា តាំងពីខែកញ្ញា និងបានចាប់បង្ខំឲ្យលោកប្រធានាធិបតីហាឌី ដែលមាននិន្នាការទៅរកប្រទេសលោកខាងលិច ជាពិសេស អាមេរិក ឲ្យចុះពីអំណាច។ ក្រុមហ៊ូទី្សបានលាយសភា ចាប់ប្រធានាធិបតី ដាក់ឃុំនៅគេហដ្ឋាន និងបានប្រកាស នៅថ្ងៃទី ៦កុម្ភៈ បង្កើតក្រុមប្រឹក្សាប្រធានាធិបតីមួយ ដើម្បីដឹកនាំប្រទេស។ អាមេរិក បារាំង អង់គ្លេស អាល្លឺម៉ង់ អារ៉ាប៊ីសាអូឌីត និងអេមីរ៉ា អារ៉ាប់រួម បានដកមន្រ្តី និងបិទស្ថានទូតរបស់ខ្លួន នៅសាណា ក្នុងមូលហេតុអសន្តិសុខ។
ពួកហ៊ូទី្ស ប្រឆាំងនឹងក្រុមអាល់កៃដា នៅយេម៉ែន ប៉ុន្តែ ក្រុមហ៊ូទី្សនេះ ដែលគំាទ្រទាំងកម្លាំងយោធា និងហិរញ្ញវត្ថុពីអ៊ីរ៉ង់ ធ្លាប់បានរិះគន់រដ្ឋាភិបាលរបស់លោកប្រធានាធិបតី ហាឌី ថា បានដឹកនាំយេម៉ែន តាមបង្គាប់ និងឥទ្ធិពល របស់ប្រទេសលោកខាងលិច។ សូមបញ្ជាក់ដែរថា ក្នុងរយៈពេល ២ឆ្នំាចុងក្រោយនេះ រដ្ឋាភិបាលទីក្រុងសាណា ប្រធានាធិបតីហាឌី បានគំាទ្រជាចំហប្រតិបត្តិការវាយប្រហារ របស់យន្តហោះ Drones អាមេរិកប្រឆំាងនឹងចលនា Aqpa ដែលជាសាខារបស់ពួកអាល់កៃដា នៅយេម៉ែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ