អាមេរិកបញ្ជូននាវាចម្បាំងទៅច្រកសមុទ្រអកមូហ្ស ដើម្បីកុំឲ្យអ៊ីរ៉ង់សម្លុតគេឯង
ច្រកសមុទ្រអកមូហ្ស គឺជាច្រកសេដ្ឋកិច្ចសំខាន់បំផុត សម្រាប់តំបន់អារ៉ាប់ ពោលគឺជាច្រកចេញចូល នាវាដឹកប្រេងតែម្តង។ ជាមួយនិងវិបត្តិនៅយេម៉ែន និងការកំញើញដាក់គ្នាទៅវិញទៅមក រវាងអ៊ីរ៉ង់ និងអារ៉ាប៊ីសាអ៊ូឌីត អ៊ីរ៉ង់បានធ្វើសកម្មភាពឆែកឆេរនាវាដឹកទំនិញ ដែលធ្វើឲ្យប្រទេសអារ៉ាប់ផ្សេងទៀត មានការព្រួយបារម្ភ។ ឆ្លើយតប ទៅនឹងសកម្មភាពកំញើញនេះ សហរដ្ឋអាមេរិក បានសម្រេចបញ្ជូននាវាចម្បាំង ដើម្បីបើកអមនាវា ដឹកទំនិញទាំងអស់ដែលឆ្លងកាត់ច្រកសមុទ្រ អកមូហ្ស ក្បែរដែនដីអ៊ីរ៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
រវាងសហរដ្ឋអាមេរិក និងអ៊ីរ៉ង់ ដែលគេសង្កេតឃើញថា មានការត្រូវរ៉ូវគ្នាច្រើន មួយរយៈក្រោយនេះ បន្ទាប់ពីបានចុះកិច្ចព្រមព្រៀងគោល ស្តីពីការគ្រប់គ្រងកម្មវិធីនុយក្លេអ៊ែរអ៊ីរ៉ង់ ហាក់កំពុងវិលត្រលប់ ទៅរកទំព័រចាស់វិញហើយ ពោលគឺការកំញើញដាក់គ្នា តាមរយៈកម្លាំងយោធា។
ដើមហេតុ គឺក្នុងរយៈពេល ពីរបីសប្តាហ៍កន្លងមកនេះ អ៊ីរ៉ង់បានធ្វើការឆែកឆេរ នាវាដឹកទំនិញធំៗ ដែលបើកឆ្លងកាត់ ច្រកសមុទ្រអកមូហ្ស ក្បែរដែនដីរបស់ខ្លួន។ ការឆែកឆេរនាវា ពីសំណាក់ក្រុមយោធាអ៊ីរ៉ង់ ត្រូវបានប្រទេសអារ៉ាប់ផ្សេងទៀត ជាពិសេស អារ៉ាប៊ីសាអ៊ូឌីតតែម្តង មើលឃើញថា គឺជាការគម្រាមកំហែងរបស់អ៊ីរ៉ង់ ទៅលើស្ថិរភាពក្នុងតំបន់។
សូមបញ្ជាក់ថា ច្រកសមុទ្រ អកមូហ្សនេះ ជាច្រកសេដ្ឋកិច្ចសំខាន់ណាស់ សម្រាប់ប្រទេសអារ៉ាប់ ដូចជា អារ៉ាប៊ីសាអ៊ូឌីត កាតា អារ៉ាប់រួម បារ៉ែន ជាដើម។ ពោលគឺជាច្រកដែលប្រទេសទាំងនេះ ដឹកប្រេងចេញយកទៅលក់ នឹងដឹកទំនិញចូលទៅក្នុងស្រុកវិញ។ ប៉ុន្តែច្រកនេះ ស្ថិតនៅក្នុងដែនទឹករបស់អ៊ីរ៉ង់ ដែលជាហេតុធ្វើឲ្យអ៊ីរ៉ង់បានចិត្ត ចង់បិទច្រើនដងរួចមកហើយ។
ឆ្លើយតបទៅនឹង ការព្រួយបារម្ភរបស់ ប្រទេសអារ៉ាប់ និងបណ្តាក្រុមហ៊ុនដឹកទំនិញ សហរដ្ឋអាមេរិក បានសម្រេចនៅថ្ងៃសៅរ៍ ទី២ឧសភា នេះថា នឹងបញ្ជូននាវាចម្បាំងទៅបើកអម នាវាដឹកទំនិញ ដើម្បីកុំឲ្យអ៊ីរ៉ង់ មកក្អេងក្អាង ធ្វើអ្វីបានតាមចិត្ត។ ទោះបីជាយ៉ាងណា គេនៅមិនទាន់ដឹងថា មាននាវាក្រុមហ៊ុនណា រឺប្រទេសណាខ្លះទេ ដែលស្ម័គ្រចិត្ត ឲ្យទាហានអាមេរិកបើកអមការពារ។
ផ្ទុយទៅវិញ អ៊ីរ៉ង់ បានឆ្លើយតបថា ការដែលអ៊ីរ៉ង់ បានឆែកឆេរនាវាមួយចំនួន របស់ក្រុមហ៊ុន Maersk គឺមិនមែនជារឿងគំរាមកំហែងទេ តែគេធ្វើទៅតាមសាដីការបស់តុលាការអ៊ីរ៉ង់ ដោយសារក្រុមហ៊ុននេះ មានជាប់ក្តីក្តាំជាមួយក្រុមហ៊ុនអ៊ីរ៉ង់។
ការសម្រេចចិត្តរបស់អាមេរិក ក្នុងពេលនេះ ត្រូវបានអ្នកវិភាគមួយចំនួន មើលឃើញថា អាមេរិកកំពុងតែព្យាយាមយកចិត្តសម្ព័ន្ធមិត្តចាស់របស់ខ្លួន គឺ អារ៉ាប៊ីសាអ៊ូឌីត ដែលបានសម្តែងការថ្នាំងថ្នាក់ ដោយសារឃើញអាមេរិក និយាយត្រូវគ្នា ជាមួយអ៊ីរ៉ង់ក្នុងសំណុំរឿងនុយក្លេអ៊ែរ។ យ៉ាងណាមិញ ការវាយប្រហារលើយេម៉ែន របស់អារ៉ាប៊ីសាអ៊ូឌីត ក៏ជាលេសមួយដែរ ក្នុងការកំញើញអ៊ីរ៉ង់កុំឲ្យបានចិត្ត។
ចង់មិនចង់ពេលនេះ អារ៉ាប៊ីសាអ៊ូឌីត ជិតសម្រេចផែនការខ្លួនហើយ ព្រោះយេម៉ែន កំពុងតែឆាបឆេះ សល់តែផេះ នឹងផ្សែងគ្រាប់រំសេវ។ អ្នកនាំពាក្យអង្គការសហប្រជាជាតិ បានស្រែកដង្ហើយ ឲ្យអារ៉ាប៊ីសាអ៊ូឌីត ឈប់ទំលាក់គ្រាប់បែក ដើម្បីឲ្យគេមានឱកាស ដឹកប្រេង្ និងស្បៀងអាហារចូលទៅជួយប្រជាជនយេម៉ែន។ ស្រែកយ៉ាងណា ក៏អារ៉ាប៊ីសាអ៊ូឌីត ធ្វើមិនដឹងមិនឮដែរ ហើយការចរចារកសន្តិភាព ប្រហែលជាគ្មានថ្ងៃ បានឃើញរូបរាង្គទេមើលទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ