អាល្លឺម៉ង់៖ កិច្ចប្រជុំកំពូលស្តីពីសន្តិសុខ ផ្តោតសំខាន់ពីការបញ្ជូនសព្វាវុធទៅលីប៊ី
នៅអាល្លឺម៉ង់ ប្រមុខរដ្ឋនិងប្រមុខរដ្ឋាភិបាល ព្រមទាំងរដ្ឋមន្ត្រីការពារជាតិនិងការបរទេស ជាច្រើនប្រទេស បានជួបប្រជុំគ្នា តាំងតែពីថ្ងៃទី១៤កុម្ភៈមកម្ល៉េះ នៅក្នុងក្រុងម៉ុយនិច ដើម្បីជជែកពី បញ្ហាសន្តិសុខ។ នៅថ្ងៃអាទិត្យ ទី១៦កុម្ភៈ សន្និសីទកំពូលនេះ ផ្តោតជាសំខាន់ស្តីពីការបញ្ជូនសព្វាវុធទៅលីប៊ី។ ការផ្តល់សារៈសំខាន់ជាពិសេស ស្តីពីប្រទេសលីប៊ី និងបញ្ហាចរាចរណ៍អាវុធទៅលីប៊ី គឺធ្វើឡើងតាមរយៈគណៈកម្មការតាមដានមួយ កើតចេញពីសន្និសីទអន្តរជាតិក្រុងប៊ែរឡាំងកាលពីខែមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
សំណុំរឿងលីប៊ី ស្មុគស្មាញខ្លាំង ដោយសារលីប៊ីជួបវិបត្តិផ្ទៃក្នុងសង្គ្រាមស៊ីវិល ហើយនិងមានការប្រទាញប្រទង់គ្នារវាងមហាអំណាចធំៗជាច្រើនប្រទេស។ រឿងនេះបង្កជាក្តីបារម្ភខ្លាំងចំពោះសន្តិសុខក្នុងតំបន់និងពិភពលោក។
កាលពីខែមុន អង្គការសហប្រជាជាតិ ក៏បានចេញសេចក្តីសម្រេចកំណត់ឱ្យមានបទឈប់បាញ់គ្នាជាបណ្តោះអាសន្ន ហើយកាលពីសប្តាហ៍មុននេះ ក្រុមប្រឹក្សាសន្តិសុខអង្គការសហប្រជាជាតិ ក៏បានដាស់តឿនរម្លឹកឱ្យផ្អាកការបញ្ចូនអាវុធទៅធ្វើសង្គ្រាមនៅលីប៊ី។ ពេលនេះ គេក៏ត្រូវជជែកពិភាក្សាគ្នាបន្ថែមទៀត ដើម្បីធានាថា បទឈប់បាញ់ និង បម្រាមនៃការធ្វើចរាចរណ៍អាវុធ ត្រូវបានភាគីជម្លោះទាំងអស់គោរពតាម។
នៅក្នុងប្រទេសលីប៊ីផ្ទាល់តែម្តង រដ្ឋាភិបាលស្របច្បាប់ របស់ Fayez al-Sarraj បានប្រកាសថា យោធារបស់រដ្ឋាភិបាលនឹងទំនងជាមិនអាចអត់ទ្រាំបាន មិនតដៃនឹងអំពើហិង្សា បានទៀតនោះទេ។ លោក Fayez al-Sarraj អំពាវនាវឱ្យសហគមអន្តរជាតិ ថ្កោលទោសធ្ងន់ធ្ងរចំពោះគូបដិបក្ខម្ខាងទៀត។
ប្រតិកម្មនេះ បានកើតឡើងក្រោយពេលដែល សេនាប្រមុខ Khalifa Haftar ដែលកាន់កាប់ភាគខាងកើតប្រទេសលីប៊ី បានឱ្យដឹងថា លីប៊ីនឹងត្រូវជួបវិបត្តិសេដ្ឋកិច្ចធ្ងន់ធ្ងរ នៅឆ្នាំ២០២០នេះ ពីព្រោះតែរោងចក្រប្រេងធំៗ ត្រូវក្រុមបក្សពួកស្មោះស្មគ្រនឹងលោកសេនាប្រមុខ Khalifa Haftar បិទខ្ទប់។ ជាក់ស្តែង ការផលិតប្រេងនៅលីប៊ី បានធ្លាក់ចុះយ៉ាងគំហុកតាំងពីពាក់កណ្តាលខែមករហូតមក។
ប្រឈមនឹងបញ្ហានេះ រដ្ឋាភិបាលស្របច្បាប់ របស់ Fayez al-Sarraj បានសម្តែងក្តីបារម្ភជាខ្លាំង ចំពោះការដែលយកការបិទខ្ទប់ដង្ហើមសេដ្ឋកិច្ច ពិសេសរឿងប្រេងនេះ មកធ្វើជាចំណាប់ខ្មាំងយ៉ាងដូច្នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ