ប្រេសិត អ.ស.ប.៖សេរីភាពសារព័ត៌មាននៅជប៉ុនទទួលការគំរាមកំហែង
ប្រេសិតពិសេសរបស់អង្គការសហប្រជាជាតិទទួលបន្ទុកពិនិត្យសេរីភាពសារព័ត៌មានលោកដាវីដ ខេបានជំរុញប្រទេសជប៉ុនឲ្យគោរពសេរីភាពសារព័ត៌មាន។ សេរីភាពសារព័ត៌មាននៅជប៉ុនដែលលោកដាវីដ ខេបានមើលឃើញថា កំពុងទទួលការគំរាមកំហែងយ៉ាងខ្លាំង។ លោកដាវីដ ខេបានថ្លែងដូចនេះនៅថ្ងៃអង្គារ ទី១៩ មេសាក្នុងទីក្រុងតូក្យូ បន្ទាប់ពីបានបំពេញទស្សនកិច្ចមួយសប្តាហ៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៩
គឺតាមរយៈរបាយការណ៍បឋមមួយដែលលោកដាវីដ ខេ អ្នករាយការណ៍ពិសេសរបស់អង្គការសហប្រជាជាតិទទួលបន្ទុកកិច្ចការសេរីភាពសារព័ត៌មានបានបង្ហើបឲ្យដឹងពីការគំរាមកំហែងលើសេរីភាពសារព័ត៌មាននៅក្នុងប្រទេសជប៉ុន។ « មានក្តីបារម្ភដែលមិនអាចមើលរំលងបានស្តីពីអនាគតមធ្យោបាយឃោសនាមហាជនឯករាជ្យក្នុងប្រទេសជប៉ុន » នេះជាការថ្លែងរបស់លោកដាវីដ ខេ។ យោងតាមលោកដាវីដ អ្នកកាសែតជប៉ុនជាច្រើនបានសម្តែងក្តីព្រួយបារម្ភរបស់ខ្លួនទាក់ទងនឹងសេរីភាពក្នុងការសរសេររឿងមួយចំនួនប្រកបដោយឯករាជ្យ និងគ្មានការភ័យខ្លាច។
សូមជម្រាបជូនថា តាំងពីជប៉ុនស្ថិតក្រោមការកាន់កាប់របស់រដ្ឋាភិបាលអភិរក្សនិយមដឹកនាំដោយលោកនាយករដ្ឋមន្រ្តីស្ហ៊ីនហ្សូ អាបេនាដំណាច់ឆ្នាំ ២០១២ មក សិទ្ធិសេរីភាពសារព័ត៌មានត្រូវបានរឹតបន្តឹងតាមរយៈការអនុម័តច្បាប់ថ្មីមួយស្តីពីកិច្ចការសម្ងាត់របស់រដ្ឋក្នុងឆ្នាំ ២០១៣។ គឺជាច្បាប់ដែលបានទទួលរងការរិះគន់ទិតៀនយ៉ាងខ្លាំងពីគ្រប់មជ្ឈដ្ឋាន ពិសេសមជ្ឈដ្ឋានអ្នកកាសែត អ្នកនិពន្ធ សិល្បករ ព្រមទាំងពីក្រុមអង្គការអ្នកការពារសិទ្ធិមនុស្សជាច្រើន។
ថ្មីៗនេះ លោកតាកៃឈី រដ្ឋមន្រ្តីទទួលបន្ទុកកិច្ចការផ្ទៃក្នុងបានចេញមុខគំរាមដកសិទ្ធិក្នុងការផ្សាយរបស់ប៉ុស្តិ៍ទូរទស្សន៍ដែលចាក់ផ្សាយបទយកការណ៍ណាដែលមានលក្ខណៈលំអៀងផ្នែកនយោបាយ។ ទង្វើរបស់លោកតាកៃឈីរបៀបនេះក៏បានទទួលការគាំទ្រ និងការពារពីលោកនាយករដ្ឋមន្រ្តីស្ហ៊ីនហ្សូ អាបេទៀតផង។ នៅក្នុងដំណើរបំពេញទស្សនកិច្ចរយៈពេល ១សប្តាហ៍ក្នុងប្រទេសជប៉ុន លោកដាវីដ ខេបានព្យាយាមសុំជួបលោកតាកៃឈី តែមិនបានសម្រេច។
លោកដាវីដ ខេបានយល់ឃើញថា រដ្ឋាភិបាលមិនមែនជាអ្នកកំណត់ប្រធានរឿងឲ្យអ្នកកាសែតសរសេរ និងក៏មិនមែនជាអ្នកកំណត់ថា រឿងនេះមានលក្ខណៈលំអៀង ឬមិនលំអៀងនោះទេ។ លោកដាវីដបានបន្ថែមថា តាមទ្រឹស្តី មធ្យោបាយឃោសនាមហាជនមិនគួរស្ថិតក្រោមការត្រួតពិនិត្យរបស់រដ្ឋាភិបាលទេ ពោលគួរតែដាក់ឲ្យស្ថិតក្រោមការគ្រប់គ្រងរបស់ស្ថាប័នឯករាជ្យមួយ។ ទន្ទឹមគ្នានេះ លោកដាវីដក៏បានស្នើឲ្យរដ្ឋាភិបាលជប៉ុនកែប្រែច្បាប់ស្តីពីកិច្ចការសម្ងាត់របស់រដ្ឋក្នុងគោលដៅបំបាត់ការដាក់សម្ពាធលើអ្នកកាសែត។
សូមជម្រាបជូនថាក្នុងឆ្នាំ ២០១៣ ជប៉ុនស្ថិតចំណាត់ថ្នាក់លេខរៀងទី៥៣ ស្តីពីសេរីភាពសារព័ត៌មាន ឆ្នាំ ២០១៤ ធ្លាក់ដល់លេខរៀងទី៥៩ និងឆ្នាំ ២០១៥ ត្រូវបានអង្គការអ្នកយកព័ត៌មានគ្មានព្រំដែនទម្លាក់ដល់លេខរៀង ៦១ ក្នុងចំណោម ១៨០ប្រទេសស្តីពីសេរីភាពសារព័ត៌មាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ