ក្រុមជំនាញ៖ ប៉ាគីស្ថានប្រហែលកំពុងសាងសង់ទីតាំងនុយក្លេអ៊ែរថ្មីមួយកន្លែង
ប៉ាគីស្ថានប្រហែលជាកំពុងសង់ទីតាំងនុយក្លេអ៊ែរថ្មីមួយ នៅភាគខាងកើតក្រុងអ៊ីស្លាម៉ាបាត។ នេះបើយោងតាមក្រុមជំនាញប្រទេសលោកខាងលិច ដែលបាននាំគ្នាវិភាគពីរូបភាពផ្កាយ រណបថតបានកាលពីខែកញ្ញា ឆ្នាំ២០១៥ និងខែមេសាឆ្នាំ២០១៦នេះ។ ប៉ាគីស្ថានត្រូវគេស្គាល់ថា ជាប្រទេសមានភាពរីកចម្រើនផ្នែកអាវុធនុយក្លេអ៊ែរក្នុងពិភពលោក។
ចុះផ្សាយនៅថ្ងៃ៖
ស្តាប់ - ០១:១៦
យោងតាមរូបភាពផ្កាយរណប ដែលក្រុមជំនាញការពារជាតិលោកខាងលិច បានវិភាគក្នុងពេលថ្មីៗនេះ ប៉ាគីស្ថានប្រហែលជាកំពុងសាងសង់ទីតាំងចម្រើនធាតុអ៊ុយរ៉ាញ៉ូមមួយកន្លែង នៅក្រុងកាហ៊ូតា ចំងាយ៣០គីឡូម៉ែត្រពីខាងកើតក្រុងអ៊ីស្លាម៉ាបាត។
កន្លែងដែលគេគិតថា ជាទីតាំងនុយក្លេអ៊ែរនេះ មានផ្ទៃដី១,២ហិចតា ស្ថិតក្នុងតំបន់សុវត្ថិភាពនៃវិទ្យាស្ថានស្រាវជ្រាវមួយកន្លែង។ គួររំលឹកថា ប៉ាគីស្ថានបានធ្វើការសាកល្បងនុយក្លេអ៊ែរច្រើនលើក កាលពីឆ្នាំ១៩៩៨។ ប៉ាគីស្ថានអាចមានអាវុធនុយក្លេអ៊ែរច្រើនជាងឥណ្ឌា អ៊ីស្រាអែល រឺក៏កូរ៉េខាងជើងទៅទៀត។
បើយោងតាមរបាយការណ៍មូលនិធិដើម្បីសន្តិភាពមួយ ចុះផ្សាយឆ្នាំ២០១៥ ប៉ាគីស្ថានអាចបង្កើន ក្បាលគ្រាប់នុយក្លេអ៊ែរចំនួន២០ ស្តុកទុក ក្នុងមួយឆ្នាំៗ។
បើសិនជាប៉ាគីស្ថានពិតជាកំពុងសង់ទីតាំងនុយក្លេអ៊ែរពិតមែន ប៉ាគីស្ថានកំពុងដើរផ្ទុយពីគោលការណ៍ក្រុមប្រទេសផលិតបច្ចេកវិទ្យានុយក្លេអ៊ែរ ហៅកាត់ថា GFN។ ក្រុមនេះមានសមាជិក៤៨ប្រទេស មានគោលការណ៍កាត់បន្ថយការរីកសាយភាយនុយក្លេអ៊ែរ ដោយធ្វើការត្រួតពិនិត្យការនាំចេញសម្ភារនិងបច្ចេកវិទ្យានុយក្លេអ៊ែរ ជាសម្ភារដែលគេអាចយកប្រើក្នុងទិសដៅយោធា។ សព្វថ្ងៃនេះ ប៉ាគីស្ថានកំពុងព្យាយាមចង់ធ្វើជាសមាជិកក្រុមប្រទេសGFN៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ