សមាជិកសភាអូស្ត្រាលីសុំឲ្យCPIស៊ើបអង្កេតលើនយោបាយអន្តោប្រវេសន៍របស់រដ្ឋាភិបាល
តំណាងរាស្រ្ត ម្នាក់របស់គណបក្សឯករាជ្យ អូស្ត្រាលីបានប្រកាសនៅថ្ងៃនេះ ថា លោកបានសរសេរសំបុត្រមួយសុំឲ្យតុលាការព្រហ្មទណ្ឌអន្តរជាតិស៊ើបអង្កេតទៅលើនយោបាយអន្តោប្រវេសន៍របស់រដ្ឋាភិបាលអូស្រ្តាលី ដែលលោកចាត់ទុកជានយោបាយឧក្រិដ្ឋកម្មប្រឆាំងមនុស្ស ជាតិ។ កាលពីចុងខែកញ្ញា រដ្ឋាភិបាលអូស្ត្រាលីបានចុះកិច្ចព្រមព្រៀងជាមួយរដ្ឋាភិបាលកម្ពុជា ដើម្បីឲ្យកម្ពុជាទទួលយកជនភៀសខ្លួនបរទេស ដែលអូស្ត្រាលីមិនប្រាថ្នាឲ្យចូលទឹកដីខ្លួន។
ចុះផ្សាយនៅថ្ងៃ៖
លោកAndrew Wilkie មកពីគណបក្សឯករាជ្យអូស្ត្រាលីបាននិយាយប្រាប់អ្នកកាសែត នៅថ្ងៃពុធនេះ ថា លោកបានសរសេរសំបុត្រមួយទៅតុលាការព្រហ្មទណ្ឌអន្តរជាតិ ដើម្បីសុំឲ្យតុលាការអន្តរជាតិមួយនេះ បើកការស៊ើបអង្កេតលើករណីឧក្រិដ្ឋកម្មប្រឆាំងមនុស្សជាតិ ដែលសមាជិករដ្ឋាភិបាលអូស្ត្រាលីអាច ធ្វើទៅលើជនអន្តោប្រវេសន៍។
រដ្ឋាភិបាលអូស្ត្រាលីមកគណបក្សអភិរក្សនិយម បានរឹតបន្តឹងនយោបាយអន្តោប្រវេសន៍ ដោយបានចាត់វិធានការគ្រប់បែបយ៉ាងដើម្បីរារាំងកុំឲ្យជនបរទេសដែលធ្វើដំណើរតាមទូកអាចចូលទៅដល់ទឹកដី អូស្ត្រាលី។ រាល់ជនបរទេសដែលស្ទាក់ចាប់បាន នៅក្នុងសមុទ្រតែងត្រូវអាជ្ញាធរអូស្ត្រាលីចាប់បញ្ជូនឲ្យទៅនៅជំរំដែលអូស្ត្រាលីបានជួលតាំងទី នៅប្រទេសប៉ាពូអាស៊ីនូវែលហ្គីណេ។
ម្យ៉ាងទៀត បើទោះបីជាជនបរទេសជាច្រើន បានទទួលសិទ្ធិជាជនភៀសខ្លួន ពីរដ្ឋាភិបាលអូស្ត្រាលី ប៉ុន្តែ ពួកគេមិនត្រូវបានអនុញ្ញាតឲ្យតាំងទីនៅក្នុងទឹកដីអូស្ត្រាលីទេ។ កាលពីថ្ងៃទី ២៦កញ្ញាកន្លងទៅ រដ្ឋាភិបាលក្រុងកង់បេរ៉ា ទើបបានចុះហត្ថលេខាលើកិច្ចព្រមព្រៀងមួយជាមួយទីក្រុងភ្នំពេញ ដែលនៅក្នុងកិច្ចព្រមព្រៀង រដ្ឋាភិបាលកម្ពុជាយល់ព្រមទទួលជនភៀសខ្លួន ពីប្រទេសអូស្ត្រាលី។
តាមសមាជិកសភាអូស្ត្រាលី សំបុត្រសុំជំនួយពី តុលាការព្រហ្មទណ្ឌអន្តរជាតិជាជម្រើសចុងក្រោយ បន្ទាប់ពី លោកបរាជ័យ មិនអាចបញ្ចុះបញ្ចូលរដ្ឋាភិបាលក្រុមកង់បេរ៉ាឲ្យប្តូរជំហរក្នុងនយោបាយជនអន្តោប្រវេសន៍។ តាមអ្នកតំណាងរាស្រ្តរូបនេះ រដ្ឋាភិបាលអូស្ត្រាលី បានរំលោភសន្ធិសញ្ញាអន្តរជាតិស្តីពីសិទ្ធិរបស់ជនភៀសខ្លួន និងរំលោភសិទ្ធិកុមារយ៉ាងធ្ងន់ធ្ងរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ