សិទ្ធិមនុស្ស៖មេធាវីរបស់លោកលីវ ស៊ាវប៉ូ ប្តឹងទៅអ.ស.ប ពីការបាត់ខ្លួនភរិយាលោកលីវ
មេធាវីជនជាតិអាមេរិកាំងមួយរូប ត្រូវជាមេធាវីរបស់ជ័យលាភីណូបែលសន្តិភាព លីវ ស៊ាវប៉ូ បានចោទរដ្ឋអំណាចចិនថា ទទួលខុសត្រូវក្នុងការបាត់ខ្លួនរបស់លោកស្រី លីវ ស្យា ជាភរិយារបស់លោកលីវ ស៊ាវប៉ូ។ មេធាវីអាមេរិកាំងរូបនេះបានប្រាប់នៅថ្ងៃព្រហស្បតិ៍នេះថា បានដាក់បណ្តឹងទៅអង្គការសហប្រជាជាតិ ពីការបាត់ខ្លួននេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
យោងតាមលោក ចារេដ ហ្កិនសឺ Jared Genser ជាមេធាវីជនជាតិអាមេរិកាំងរបស់ជ័យលាភីណូបែលសន្តិភាព លីវ ស៊ាវប៉ូ លោកស្រីលីវ ស្យា ជាភរិយារបស់លោកលីវ ត្រូវបានរដ្ឋអំណាចចិនឃុំខ្លួន នៅទីកន្លែងសំងាត់ តាំងពីថ្ងៃ១៥កក្កដាម្ល៉េះ គឺតាំងពីថ្ងៃបុណ្យសពរបស់លោកលីវ។ មេធាវីអាមេរិកាំងរូបនេះបានដាក់ពាក្យប្តឹងទៅអង្គការសហប្រជាជាតិ ប្តឹងប្រឆាំងរដ្ឋអំណាចចិន ទាក់ទងនឹងការបាត់ខ្លួនរបស់លោកស្រីលីវ។ គាត់បានទាមទារអោយចិនបង្ហាញភស្តុតាងថា លោកស្រីលីវ ពិតជានៅមានជីវិតពិតមែន។
លោកស្រី លីវ ស្យា អាយុ៥៦ឆ្នាំ ជាភរិយារបស់ជ័យលាភីណូបែលសន្តិភាពលោកលីវ ស៊ាវប៉ូ។ លោកលីវ ស៊ាវប៉ូ បានទទួលមរណភាពកាលពីថ្ងៃ១៣កក្កដា ដោយជំងឺមហារីកថ្លើម ប៉ុន្មានសប្តាហ៍ប៉ុណ្ណោះ ក្រោយអាជ្ញាធរចិនបានដោះលែងលោកអោយមានសេរីភាព។ យោងតាមលោកហ្កិនសឺជាមេធាវី លោកស្រីលីវ ស្យា មិនបានទាក់ទងសមាជិកគ្រួសារលោកស្រីសូម្បីតែម្នាក់ទេ គិតតាំងតែពី មួយថ្ងៃមុនស្វាមីលោកស្រីទទួលមរណភាព។ រដ្ឋចិនបានចុះផ្សាយរូបភាពលោកស្រីក្នុងពេលបុណ្យសពលោកលីវ ប៉ុន្តែតាំងពីពេលនោះមក ចិនមិនបានប្រាប់ថា តើលោកស្រីលីវនៅទីកន្លែងណាទេ។ ចិនមិនដែលទទួលស្គាល់ថា លោកស្រីគ្មានសេរីភាពនោះទេ។
មុនមេធាវីជនជាតិអាមេរិកាំងរបស់លោកលីវ ប្រកាសប្តឹងទៅអង្គការសហប្រជាជាតិពីការបាត់ខ្លួនរបស់លោកស្រីលីវ លោកស្រីលីវ ត្រូវបានចិនឃុំខ្លួននៅគេហដ្ឋាន និងស្ថិតក្រោមការឃ្លាំមើលរបស់អាជ្ញាធរចិន តាំងពីឆ្នាំ២០១០ មកម្ល៉េះ គឺតាំងពីពេលលោកលីវ ស៊ាវប៉ូ ជាស្វាមី បានជាប់ឈ្មោះជាជ័យលាភីណូបែលសន្តិភាពមក។ លោកលីវ ស៊ាវប៉ូ ត្រូវរដ្ឋចិនដាក់ទោសអោយជាប់ពន្ធនាគារ១១ឆ្នាំ ពីបទប្រឆាំងនយោបាយ។ ចិនបដិសេធមិនអោយលោកលីវ ចេញទៅព្យាបាលនៅបរទេសទេ ក្រោយពេលដោះលែងលោកលីវមក។
ខាងក្រុមការងារសិទ្ធិមនុស្សរបស់អង្គការសហប្រជាជាតិ ដែលមានទីស្នាក់ការនៅក្រុងហ្សឺណែវ បានប្រាប់ថា ដំណើរការនៃប្រភេទបណ្តឹងទាក់ទងការបាត់ខ្លួនបែបករណីលោកស្រីលីវនេះ អាចប្រើពេលវេលាច្រើនឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ