កម្លំាងប៉ូលិសអេហ្ស៊ីបបានអន្តរាគមន៍បំបែកហ្វូងបាតុករអ្នកគំាទ្រលោក ម័រស៊ី
នៅថ្ងៃពុធ ទី១៤ សីហា កងកម្លំាងប៉ូលិសអេហ្ស៊ីបបានធ្វើអន្តរាគមន៍បំបែកហ្វូងបាតុករអ្នកគំាទ្រលោកប្រធានាធិបតីធ្លាក់ពីអំណាច ម័រស៊ីនៅ២កន្លែងក្នុងទីក្រុង គឺទីលាន Nahda និងទីលាន Rabaa al-Adawiya ដែលពួកគេបានបោះទីតំាងកាន់កាប់ជិត ១ខែកន្លងមក។ យោងតាមក្រសួងមហាផ្ទៃ ប៉ូលិសបានដំណ្តើមកាន់កាប់វិញនូវទីលាន Nahda និងបានបញ្ជាក់ពីការស្លាប់ប៉ូលីសចំនួន ២នាក់។ នៅខាងក្រុមបាតុករវិញ មានស្លាប់យ៉ាងតិច ៤៣នាក់ តែបើយោងតាមតួលេខផ្តល់ដោយក្រុម « Frères អ៊ីស្លាម » មានស្លាប់ជិត ២៥០នាក់។
ចុះផ្សាយនៅថ្ងៃ៖
ស្តាប់ - ០១:៥២
នៅបំផុត រដ្ឋអំណាចបានសម្រេចប្រើកម្លំាងបាយដើម្បីរំដោះទីតំាងដែលក្រុមអ្នកគំាទ្រលោកប្រធានាធិបតីធ្លាក់ពីអំណាចម័រស៊ីបានបោះទីតំាងកាន់កាប់តំាងពីជិត ១ខែកន្លងមក។ មកទល់ពេលនេះ តុល្យការនៃចំនួនមនុស្សស្លាប់កំពុងបន្តស្រពិចស្រពិល។ អ្វីដែលជាក់ច្បាស់ ចំនួនមនុស្សស្លាប់ និងរបួសពិតជាមានច្រើន។ យោងតាមតួលេខផ្តល់ដោយអ្នកកាសែត AFP នៅនឹងកន្លែង ចំនួនមនុស្សស្លាប់មានយ៉ាងតិច ៤៣នាក់ តែបើផ្អែកតាមក្រុម « Frères អ៊ីស្លាម » អ្នកគំាទ្រលោកម័រស៊ីវិញ គឺមានរហូតដល់ទៅ ២៥០នាក់ និងរងរបួសជិត ៥ ០០០នាក់ផ្សេងទៀត។
សូមរម្លឹកជូនថា តំាងពីជិត ១ខែ ក្រោយការទម្លាក់លោកម័រស៊ីពីប្រធានាធិបតីមក ក្រុមអ្នកគំាទ្រលោកម័រស៊ីបាននំាគ្នាប្រឆំាង ដោយចូលបោះទីតំាងកន្លែងចំនួន ២ ក្នុងទីក្រុង គឺទីលាន Nahda និងទីលាន Rabaa al-Adawiya។ យោងតាមព័ត៌មានផ្តល់ដោយក្រសួងមហាផ្ទៃ ទីលាន Nahda បានស្ថិតក្រោមការកាន់កាប់របស់ប៉ូលិសហើយ រីឯទីលាន Rabaa al-Adawiya កំពុងស្ថិតក្រោមប្រតិបត្តិការរបស់ប៉ូលិស។ ក្រៅពីប្រតិបត្តិការនៅនឹងកន្លែង ការមានជំនួយបាញ់គ្រាប់បែកបង្ហូរទឹកភ្នែកពីកម្លំាងប៉ូលិសនៅក្នុងអាគារចំនួន ៣ ស្ថិតព័ទ្ធជុំវិញទីលាននោះ។ ទន្ទឹមគ្នានេះ ក្រុមប៉ូលិសក៏បានផ្តើមប្រើគ្រឿងចក្រដើម្បីបំផ្លាញរបងលួស ឬមួយក៏របងថង់ខ្សាច់ដែលរៀបចំដោយក្រុមបាតុករ។
ខណៈនេះ ស្ថានការណ៍ហាក់ដូចកំពុងច្របូកច្របល់ខ្លំាង។ បរិយាកាសនៅកន្លែងកើតហេតុកំពុងគ្របដណ្តប់ដោយផ្សែងខ្មៅខ្មួលខ្មាញ់ពីគ្រាប់បែកបង្ហូរទឹកភ្នែករបស់ប៉ូលិស ឬមួយពីការដុតកង់ឡានរបស់ក្រុមបាតុករ។ យ៉ាងណាក៏ដោយ ប៉ូលិសបានប្រកាសថា ខ្លួនបានទុកច្រកឲ្យបាតុករចាកចេញពីទីនោះដោយសម្រួល និងស្វែងរកចាប់តែមេក្លោងធំៗប៉ុណ្ណោះ ពោលគឺអ្នកទទួលខុសត្រូវជាន់ខ្ពស់ « Frères អ៊ីស្លាម »។
ដោយឡែកក្នុងថ្ងៃបើកប្រតិបត្តិការនេះ ចរាចរណ៍ផ្លូវរថភ្លើងរវាងទីក្រុង Caire និងតាមខេត្តត្រូវបានផ្អាកជាបណ្តោះអាសន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ