លោកស្រីប៉ាក់ គុនហឺ ជាប់ឆ្នោតជាប្រធានាធិបតីកូរ៉េខាងត្បូង
លោកស្រីប៉ាក់ គុនហឺ (Park Geun-hye) គឺជាអ្នកទទួលជ័យជម្នះ ក្នុងការបោះឆ្នោតប្រធានាធិបតី កាលពីថ្ងៃពុធម្សិលមិញ ហើយក្លាយទៅជាស្រ្តីទី១ ដែលឡើងកាន់អំណាចជាប្រធានាធិបតីកូរ៉េខាងត្បូង។ នៅក្នុងសុន្ទរកថានៅថ្ងៃព្រហស្បតិ៍នេះ លោកស្រីប៉ាក់ គុនហឺ បានប្រកាសថា លោកស្រីនឹងដាក់ចេញនូវនយោបាយថ្មីមួយ ដែលផ្តោតអាទិភាពទៅលើសន្តិសុខជាតិ ហើយក្នុងពេលជាមួយគ្នាជ្រើសរើសយកផ្លូវទូត ដើម្បីដោះស្រាយ ជម្លោះជាមួយកូរ៉េខាងជើង។
ចុះផ្សាយនៅថ្ងៃ៖
ស្តាប់ - ០២:៣៦
នៅព្រឹកថ្ងៃព្រហស្បតិ៍នេះ គណៈកម្មាធិការជាតិរៀបចំការបោះឆ្នោតកូរ៉េខាងត្បូងបានប្រកាសថា លោកស្រីប៉ាក់ គុនហឺ គឺជាអ្នកដែលទទួលជ័យជំនះក្នុងការបោះឆ្នោតប្រធានាធិបតី កាលពីថ្ងៃពុធម្សិលមិញ។ លោកស្រីប៉ាក់ គុនហឺ បានឈ្នះលោកមូន ចែអ៊ីន ជាគូប្រជែង ក្នុងសំឡេង ៥១,៦% ទល់នឹង ៤៨%។ លោកស្រីនឹងត្រូវចូលកាន់តំណែងជាផ្លូវការ នៅខែកុម្ភៈ។
គួរបញ្ជាក់ឡើងវិញថា លោកស្រី ប៉ាក់ គុនហឺ មកពីគណបក្សអភិរក្សនិយម ជាមួយនឹងលោកលី ម្យ៉ុងបាក់ ដែលជាប្រធានាធិបតីផុតអាណត្តិ និងដែលធ្លាប់ប្រកាន់ជំហរតឹងរ៉ឹងជាមួយនឹងកូរ៉េខាងជើង។
ក៏ប៉ុន្តែ លោកស្រីប៉ាក់ គុនហឺ បានសន្យាថា ចំពោះកូរ៉េខាងជើង លោកស្រីនឹងផ្តោតអាទិភាពទៅលើការពង្រឹងសន្តិសុខជាតិផង និងទៅលើដំណោះស្រាយផ្នែកការទូតផង។
នៅក្នុងសុន្ទរកថា ក្រោយពីបានជាប់ឆ្នោត លោកស្រីប៉ាក់ គុនហឺ បានថ្លែងថា កូរ៉េខាងជើងគឺជាការគំរាមកំហែងដ៏ធំមួយដល់កូរ៉េខាងត្បូង ហើយថា លោកស្រីនឹងមិនធ្វើសម្បទានណាមួយទាំងអស់ ដែលអាចនាំឲ្យប៉ះពាល់ដល់សន្តិសុខជាតិ ក៏ប៉ុន្តែ ក្នុងពេលជាមួយគ្នា លោកស្រីបានសន្យាផងដែរថានឹងចរចាជាមួយកូរ៉េខាងជើង ហើយចាប់ផ្តើមផ្តល់ជំនួយទៅឲ្យកូរ៉េខាងជើងវិញ ប្រសិនបើរបបដឹកនាំក្រុងព្យុងយ៉ាងយល់ព្រមបោះបង់ចោលកម្មវិធីនុយក្លេអ៊ែរ។
ចំពោះជប៉ុនវិញ លោកស្រីប៉ាក់ គុនហឺ បានបង្ហើបឲ្យដឹងថា លោកស្រីទំនងជានឹងបន្តនយោបាយរបស់លោកលី ម្យ៉ុងបាក់ ដែលប្រកាន់ជំហរតឹងរ៉ឹង ក្នុងជម្លោះដណ្តើមកោះជាមួយជប៉ុន។ លោកស្រីបានថ្លែងថា លោកស្រីនឹងព្យាយាមស្វះស្វែងរកការផ្សះផ្សារ កិច្ចសហប្រតិបត្តិការ និងសន្តិភាព នៅក្នុងតំបន់សមុទ្រខាងកើត (តំបន់សមុទ្រជាប់នឹងជប៉ុន) ក៏ប៉ុន្តែថា ស្ថិរភាព និងការជឿទុកចិត្តគ្នាត្រូវតែឈរលើមូលដ្ឋានត្រឹមត្រូវនៃប្រវត្តិសាស្រ្ត។ លោកស្រីប៉ាក់ គុនហឺ ថ្លែងបែបនេះ ទំនងជាចង់សំដៅទៅលើជប៉ុន ដែលធ្លាប់មានប្រវត្តិជូរចត់ជាមួយគ្នាសម័យសង្រ្គាម ហើយដែលបច្ចុប្បន្ន នៅតែបន្តជាប់ជម្លោះដែនទឹកជាមួយគ្នា។
នៅពេលនេះ កូរ៉េខាងត្បូងក៏ស្ថិតក្រោមការដឹកនាំរបស់គណបក្សអភិរក្សនិយម ចំណែកជប៉ុនវិញ ក៏ទើបនឹងបានបោះឆ្នោតប្រគល់អំណាចទៅឲ្យគណបក្សរបស់លោកស្ហ៊ីនហ្សូ អាបេ ដែលជាក្រុមអ្នកអភិរក្សនិយម និងអ្នកជាតិនិយម ដែលជាហេតុធ្វើឲ្យមានការបារម្ភជាទូទៅថា ជម្លោះរវាងរវាងជប៉ុន និងកូរ៉េខាងត្បូងអាចនឹងកាន់តែមានភាពតានតឹងខ្លាំងឡើងថែមទៀត។
លោកអូបាម៉ាបានចេញសេចក្តីថ្លែងការណ៍មួយ កាលពីល្ងាចថ្ងៃពុធម្សិលមិញ ដើម្បីអបអរជ័យជម្នះរបស់លោកស្រីប៉ាក់ គុនហឺ ហើយគូសបញ្ជាក់ថា លោកមានបំណងចង់បង្កើនកិច្ចសហប្រតិបត្តិការជាមួយកូរ៉េខាងត្បូង ដើម្បីជាផលប្រយោជន៍ដល់សន្តិសុខ និងសន្តិភាពក្នុងតំបន់អាស៊ី។ លោកអូបាម៉ាក៏ធ្លាប់បានលើកឡើងស្រដៀងគ្នានេះដែរជាមួយលោកស្ហ៊ីនហ្សូ អាបេ នៅក្រោយការប្រកាសលទ្ធផលបោះឆ្នោតជាតិនៅជប៉ុន។
គួរបញ្ជាក់ថា ជប៉ុន និងកូរ៉េខាងត្បូង សុទ្ធសឹងជាសម្ព័ន្ធមិត្តយ៉ាងជិតស្និទ្ធបំផុតរបស់អាមេរិក។ ហេតុដូច្នេះហើយបានជាលោកអូបាម៉ាតែងតែទទូចចង់ឲ្យប្រទេសជាសម្ព័ន្ធមិត្តទាំងពីរនេះមានទំនាក់ទំនងល្អនឹងគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ