ស្លាប់១៤នាក់ក្នុងការវាយប្រហារភេរវកម្មនៅហ្វីលីពីន
មនុស្សយ៉ាងតិច ១៤នាក់ ត្រូវបាត់បង់ជីវិត និងជាង៧០នាក់ផ្សេងទៀតត្រូវរងរបួស នៅក្នុងការវាយប្រហារដោយបំផ្ទុះគ្រាប់បែក នៅក្នុងប្រទេសហ្វីលីពីន កាលពីថ្ងៃសុក្រ។ ប្រធានាធិបតីហ្វីលីពីនបានចាត់ទុកការវាយប្រហារនេះថាជាអំពើភេរវកម្ម ប្រព្រឹត្តដោយក្រុមអ៊ីស្លាមជ្រុលនិយម អាប៊ូសាយ៉ាហ្វ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ការវាយប្រហារបានកើតឡើង នៅម៉ោងជិត ១១យប់ម៉ោងនៅក្នុងស្រុក (ត្រូវនឹងម៉ោង ១០យប់ នៅក្នុងប្រទេសកម្ពុជា)។ គ្រាប់បែកត្រូវបានគេបំផ្ទុះ នៅក្នុងទីផ្សារដ៏អ៊ូអរមួយ នៅក្នុងទីក្រុងដាវ៉ាវ (Davao) ក្រុងដែលលោក រ៉ូឌ្រីហ្កូ ឌុយទែរតេ ធ្លាប់ធ្វើជាអភិបាលក្រុងអស់រយៈពេលជិត២០ឆ្នាំ មុនពេលដែលលោកជាប់ឆ្នោតមកធ្វើជាប្រធានាធិបតី។
មន្រ្តីស្និទ្ធនឹងលោកឌុយទែរតេបានឲ្យដឹងថា នៅពេលមានការវាយប្រហារនេះ លោកប្រធានាធិបតីកំពុងស្ថិតនៅក្នុងក្រុងដាវ៉ាវ តែមិននៅក្បែរកន្លែងកើតហេតុនោះទេ។ ភ្លាមៗក្រោយការវាយប្រហារនេះ លោកឌុយទែរតេបានប្រកាសដាក់ប្រទេសឲ្យស្ថិតនៅក្នុងភាពអាសន្ន ដើម្បីប្រគល់អំណាចឲ្យទ័ពអាចបើកប្រតិបត្តិការរក្សាសន្តិសុខនិងសណ្តាប់ធ្នាប់នៅទូទាំងប្រទេស។ ដំណើរទស្សនកិច្ចរបស់លោកប្រធានាធិបតីហ្វីលីពីន ដែលគ្រោងធ្វើនៅក្នុងប្រទេសព្រុយណេត្រូវបានលុបចោល ក៏ប៉ុន្តែ មន្រ្តីការិយាល័យប្រធានាធិបតីបានបញ្ជាក់ថា លោកនឹងធ្វើដំណើរទៅចូលរួមក្នុងជំនួបកំពូលអាស៊ាន នៅក្នុងប្រទេសឡាវ នៅដើមសប្តាហ៍ក្រោយ ដូចការគ្រោងទុក។
គិតរហូតមកទល់នឹងពេលនេះ គេនៅមិនទាន់ឃើញមានតម្រ៉ុយជាក់លាក់ណាមួយ ដែលអាចបញ្ជាក់ពីអត្តសញ្ញាណអ្នកដែលទទួលខុសត្រូវក្នុងការវាយប្រហារកាលពីយប់ថ្ងៃសុក្រនេះទេ ក៏ប៉ុន្តែ សម្រាប់រដ្ឋាភិបាលហ្វីលីពីន អ្វីដែលកើតឡើងនេះ គឺជាការវាយប្រហារភេរវកម្ម ដែលមានជាប់ពាក់ព័ន្ធនឹងក្រុមភេរវនិយមអ៊ីស្លាមជ្រុលនិយម អាប៊ូសាយ៉ាហ្វ។
ថ្លែងប្រាប់អ្នកសារព័ត៌មាននៅថ្ងៃសៅរ៍នេះ លោក ឌុយទែរតេ បានលើកឡើងថា ក្រុមអាប៊ូសាយ៉ាហ្វប្រហែលជាចង់សងសឹកទៅលើរដ្ឋាភិបាល ដែលបានបើកការវាយប្រហារទៅលើមូលដ្ឋានរបស់ពួកគេ កាលពីថ្ងៃចន្ទកន្លងទៅ។
គួរបញ្ជាក់ថា ទីក្រុងដាវ៉ាវ ធ្លាប់បានប្រឈមមុខនឹងចលនាបះបោរផ្តាច់ទឹកដីរបស់ក្រុមអ៊ីស្លាមជ្រុលនិយមអស់រយៈពេលជាច្រើនឆ្នាំមកហើយ។ ក្នុងចំណោមក្រុមឧទ្ទាមអស់ទាំងនេះ អាប៊ូសាយ៉ាហ្វ ត្រូវបានគេស្គាល់ច្រើនជាងគេ ហើយដែលត្រូវបានគេរាប់បញ្ចូលជាក្រុមភេរវជន។ កាលពីពេលថ្មីៗនេះ ក្រុមអាប៊ូសាយ៉ាហ្វបានប្រកាសភ្ជាប់ខ្លួនទៅនឹងក្រុមជីហាតរដ្ឋអ៊ីស្លាមនៅអ៊ីរ៉ាក់និងស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ