ពីសត្រូវក្លាយជាមិត្ត អាមេរិកប្រាថ្នាចង់មានទំនាក់ទំនងកាន់តែល្អប្រសើរជាមួយវៀតណាម
កិច្ចប្រជុំកំពូលអាស៊ាននៅទីក្រុងណៃព្យីដាវ ប្រទេសភូមាបានចាប់ផ្តើមហើយនៅថ្ងៃសៅរ៍ ទី៩ សីហា នេះ។ លោក ចន ឃេរី រដ្ឋមន្ត្រីក្រសួងការបរទេសអាមេរិកក៍បានអញ្ជើញទៅចូលរួមផងដែរ។ ថ្លែងក្នុងការប្រជុំ លោក ចន ឃេរី បានសម្តែងចេញនូវសុទិដ្ឋិនិយមក្នុងការរឹតចំណងមេត្រីភាពជាមួយវៀតណាម ដែលជាអតីតសត្រូវរបស់ខ្លួន ឲ្យបានកាន់តែប្រសើរ។
ចុះផ្សាយនៅថ្ងៃ៖
ស្តាប់ - ០២:១៣
ក្នុងឱកាសប្រជុំកំពូលអាស៊ានលើកនេះ លោក ចន ឃេរី មានជួបប្រាស្រ័យជាមួយលោករដ្ឋមន្រ្តីក្រសួងការបរទេសវៀតណាម ផាំ ប៊ីនមីញ។ ថ្លែងក្នុងពេលនោះ លោក ចន ឃេរី បានអបអរសារទរចំពោះភាពល្អប្រសើរពីមួយកំរឹតទៅមួយកំរឹត រវាងវៀតណាមនិងអាមេរិក ជាពិសេសទាក់ទិនទៅនឹងបញ្ហាគ្រប់គ្រងប្រព័ន្ធនុយក្លេអ៊ែរស៊ីវិល និងជម្លោះនៅក្នុងឈូងសមុទ្រចិនខាងត្បូង នាពេលកន្លងមកនេះ។ ភាពចម្រូងចម្រាសក្នុងការកាន់កាប់ដែនកោះនៅក្នុងឈូងសមុទ្រចិនខាងត្បូង ក៏ជាសំណុំរឿងសំខាន់មួយដែរ ដែលនឹងត្រូវលើកឡើងមកពិភាក្សា ក្នុងឱកាសប្រជុំកំពូលអាស៊ានលើកនេះ។ ចិនដែលជាដៃគូជម្លោះមួយដែរ បានព្រមានថានិងចាត់វិធានការយ៉ាងតឹងតែង បើសិនជាមានការរំលោភបំពានណាមួយ ទៅលើដែនដីរបស់ខ្លួនក្នុងឈូងសមុទ្រចិនខាងត្បូង។
សូមបញ្ជាក់ថា អាមេរិក និងវៀតណាម ធា្លប់ជាសត្រូវវាយគ្នាស្លាប់រស់ កាលពីជំនាន់សង្គ្រាមវៀតណាម ក្នុងអំឡុងទសវត្សឆ្នាំ៦០និង៧០ ដែលទីបំផុត អាមេរិកជាអ្នកចាញ់សង្គ្រាម ហើយដកទ័ពទៅវិញយ៉ាងអាម៉ាស់។ ទោះបីជាយ៉ាងណា ក្នុងនាមជាអ្នកតស៊ូប្រយុទ្ធប្រឆាំងដើម្បីការពារលទ្ធិប្រជាធិបតេយ្យ និងធ្លាប់ធ្វើសង្គ្រាមទប់ស្កាត់ការរីករាលដាលនូវរបបកុម្មុយនីស្តផ្តាច់ការ អាមេរិកនៅតែបន្ត រិះគន់របបកុម្មុយនីស្តវៀតណាមជានិច្ច ជាពិសេសទាក់ទងទៅនឹងការគោរពសិទ្ធិមនុស្ស ដូចជាការរឹតបន្តិងសិទ្ធិសេរីភាពបុគ្គល សិទ្ធិសេរីភាពក្នុងការបញ្ចេញមតិ និងក្នុងការគោរពសាសនាជាដើម។ អាមេរិកនិងវៀតណាម បានរៀបចំស្តាឡើងវិញនូវទំនាក់ទំនងទៅវិញទៅមក កាលពីឆ្នាំ១៩៩៥។ ចាប់តាំងពីពេលនោះមក ទំនាក់ទំនងពាណិជ្ជកម្មរបស់ប្រទេសទាំងពីរបានកើនឡើងជាលំដាប់។ ប៉ុន្តែទោះជាយ៉ាងណាក៏ដោយ សហរដ្ឋអាមេរិកនៅតែបន្តធ្វើការរិះគន់ម្តងម្កាលស្តីពីការបំបិទសិទ្ធិសេរីភាពសារពត៌មាន និងការរំលោភសិទ្ធិមនុស្សនៅវៀតណាម។
គួររំលឹកផងដែរថា លោក ចន ឃេរី ធ្លាប់ជាអតីតនាយទាហាន ដែលបានមកបំពេញបេសកកម្មប្រយុទ្ធនៅវៀតណាមខាងត្បូង នៅចន្លោះឆ្នាំ៦៦ដល់ឆ្នាំ៧០។ កាលពីខែធ្នូឆ្នាំទៅ លោកបានអញ្ជើញទៅទស្សនកិច្ចនៅតំបន់ដីសណ្តទន្លេមេគង្គ ហើយលោកមានសេចក្តីរីករាយយ៉ាងខ្លាំង ដោយបានឃើញការរីកធំធាត់របស់សេដ្ឋកិច្ចវៀតណាម។ លោកថាវាដល់ពេលហើយដែលប្រទេសទាំងពីរចាប់ដៃគ្នា ផ្សះផ្សាមុខរបួសឲ្យជាសះស្បើយ។ លោកចន ម៉ាកខេន ដែលបច្ចុប្បន្នជាសមាជិកព្រឹទ្ធសភាអាមេរិក ក៏ជាអតីតមិត្តរួមអាវុធរបស់លោក ចន ឃេរី ដែរ។ លោក ម៉ាកខេនដែលពេលនេះកំពុងតែបំពេញទស្សនកិច្ចនៅក្រុងហាណូយ បានថ្លែងថាវាដល់ពេលហើយ ដែលសហរដ្ឋអាមេរិកចាប់ផ្តើមកាត់បន្ថយទណ្ឌកម្មផ្នែកគ្រប់គ្រងអាវុធដែលខ្លួនបានដាក់ទៅលើវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ