ចិន-អេហ្ស៊ីប៖លោកស៊ី ជីនពីងគាំទ្រលោកអាល់ ស៊ីស៊ីក្នុងការប្រឹងប្រែងរក្សាស្ថិរភាពក្នុងតំបន់
លោកប្រធានាធិបតីចិនស៊ី ជីនពីងកំពុងបន្តបំពេញទស្សនកិច្ចមួយជុំតំបន់ដើមបូព៌ា។ បន្ទាប់ពីបានបំពេញទស្សនកិច្ចរយៈពេល ២ថ្ងៃនៅក្នុងប្រទេសអារ៉ាប៊ីសាអូឌីតមក លោកស៊ី ជីនពីងបានបន្តទស្សនកិច្ចនៅក្នុងប្រទេសអេហ្ស៊ីបនាថ្ងៃព្រហស្បតិ៍ ទី២១ មករានេះ។ នៅក្នុងជំនួបសមភាគីអេហ្ស៊ីបលោកអាល់ ស៊ីស៊ី លោកស៊ី ជីនពីងបានថ្លែងគាំទ្រកិច្ចខិតខំប្រឹងប្រែងរបស់អេហ្ស៊ីបក្នុងបុព្វហេតុរក្សាស្ថិរភាពនៅក្នុងតំបន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ខុសពីជំហររបស់ប្រទេសមួយចំនួន ពិសេសប្រទេសលោកខាងលិច ប្រទេសចិនមិនបានរិះគន់លោកប្រធានាធិបតីអេហ្ស៊ីបអាល់ ស៊ីស៊ីដែលបានឡើងកាន់អំណាចតាមរដ្ឋប្រហារយោធា ឬមួយក៏វិធានការបង្រ្កាបក្រុមប្រឆាំងរបស់លោកអាល់ ស៊ីស៊ីទេ។ ផ្ទុយទៅវិញ លោកប្រធានាធិបតីចិនស៊ី ជីនពីងមានតែការសាទរ និងគាំទ្រការប្រឹងប្រែងរបស់សមភាគីអេហ្ស៊ីបដើម្បីស្ថិរភាពនៅក្នុងតំបន់។ ដោយមិននិយាយចំមុខប្រទេសណាមួយ លោកប្រមុខរដ្ឋចិនបានថ្លែងដោយប្រយោលថា ប្រទេសនីមួយៗមានសិទ្ធិក្នុងការស្វែងរកជោគវាសនាអនាគតឲ្យប្រទេស និងប្រជាជនដោយខ្លួនឯង ពោលមិនត្រូវការមេរៀនពីអ្នកដទៃទេ។
ក្រៅពីការថ្លែងគាំទ្រ និងសាទរចំពោះសមភាគីអេហ្ស៊ីបលោកអាល់ស៊ីស៊ី លោកស៊ី ជីនពីងក៏បានថ្លែងប្រាប់លោកអាល់ ស៊ីស៊ីថា ទីក្រុងប៉េកាំងចង់ឃើញទីក្រុងគែរដើរតួនាទីឲ្យបានទូលំទូលាយបន្ថែមទៀតនៅក្នុងដំណើរស្វែងរកដំណោះស្រាយឲ្យវិបត្តិអន្តរជាតិ និងវិបត្តិក្នុងតំបន់។ សូមជម្រាបជូនថា វត្តមានរបស់ប្រមុខរដ្ឋចិនក្នុងទឹកដីអេហ្ស៊ីបថ្ងៃនេះបានធ្វើឡើង ប៉ុន្មានថ្ងៃមុនខួបគម្រប់ ៥ឆ្នាំនៃបដិវត្តន៍ប្រជាជនផ្តួលរំលំរបបដឹកនាំរបស់លោកហូស្ន៊ី មូបារ៉ាក់កាលពីថ្ងៃទី២៥ មករា ឆ្នាំ ២០១១។
នៅប៉ុន្មានថ្ងៃ មុនខួបគម្រប់ ៥ឆ្នាំនៃការធ្លាក់ពីអំណាចរបស់លោកមូបារ៉ាក់ រដ្ឋអំណាចបានផ្តើមពង្រឹងសន្តិសុខ និងមានសកម្មជនប្រឆាំងជាច្រើននាក់ត្រូវបានចាប់ខ្លួន។ ចំណែកគណបក្សប្រឆាំង និងក្រុមភាតរៈអ៊ីស្លាមក៏បានអំពាវនាវឲ្យមានក្បួនបាតុកម្មនៅថ្ងៃទី២៥ មករាខាងមុខ។ គួរជម្រាបជូនថា មុននឹងទៅដល់អេហ្ស៊ីបថ្ងៃនេះ លោកស៊ី ជីនពីងបានស្ថិតក្នុងប្រទេសអារ៉ាប៊ីសាអូឌីតរយៈពេល ២ថ្ងៃ។ នៅថ្ងៃពុធ ទី២០ មករា លោកស៊ី ជីនពីង និងស្តេចអារ៉ាប៊ីសាអូឌីតសាលម៉ានបានបើកសម្ពោធស្ថានីយ៍បូមប្រេងសាងសង់រួមគ្នាដោយក្រុមហ៊ុនចិន និងអារ៉ាប៊ីសាអូឌីត។
បន្ទាប់ពីប្រទេសអេហ្ស៊ីប លោកប្រមុខរដ្ឋចិននឹងបន្តដំណើរទៅកាន់ប្រទេសអ៊ីរ៉ង់ មុននឹងត្រឡប់ទៅចិនវិញនៅថ្ងៃសុក្រ ទី២២ មករា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ