បន្ទាប់ពី អារ៉ាប៊ីសាអូឌីត និងតួកគី នាយករដ្ឋមន្ត្រីអ៊ីរ៉ាក់ បន្តដំណើរទៅអ៊ីរ៉ង់
លោកនាយករដ្ឋមន្ត្រីអ៊ីរ៉ាក់ កំពុងបន្តដំណើរទស្សនកិច្ច តាមប្រទេសធំៗ ក្នុងតំបន់ដើមបូព៌ា។ បន្ទាប់ពីអារ៉ាប៊ីសាអូឌីត និងតួកគី នៅថ្ងៃព្រហស្បតិ៍នេះ លោក អាល់ អាបាឌី បានទៅដល់ទីក្រុងតេអេរ៉ង់ រដ្ឋធានីអ៊ីរ៉ង់។ តាមការប៉ាន់ស្មាន ទស្សនកិច្ចរបស់ប្រមុខរដ្ឋាភិបាលអ៊ីរ៉ាក់ គឺសង្កត់ធ្ងន់ទៅលើការស្តារមិត្តភាព រវាងអ៊ីរ៉ាក់ និងអ៊ីរ៉ង់ ព្រមទាំងស្វែងរកការគាំទ្រពីសំណាក់ អ៊ីរ៉ង់ ទាក់ទិននឹងបញ្ហាទាមទារអធិបតេយ្យភាព របស់ជនជាតិកួដនៅអ៊ីរ៉ាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
នៅរដ្ឋធានី តេអេរ៉ង់ លោក Haider al-Abadi នាយករដ្ឋមន្ត្រីអ៊ីរ៉ាក់ ត្រូវជួបជាមួយនឹង លោកប្រធានាធិបតីស្តីទីអ៊ីរ៉ង់ Eshagh Jahangiri បន្ទាប់មកទៀត ជាមួយលោក ហាសាន់ រ៉ូហានី ប្រធានាធិបតីអ៊ីរ៉ង់ ជាមួយលោកប្រធានសភាអ៊ីរ៉ង់ Ali Larijani និងចុងក្រោយបង្អស់ គឺជួបជាមួយលោកអាយាតូឡា អាលី ខេមណី ប្រមុខដឹកនាំសាសនាកំពូលរបស់អ៊ីរ៉ង់។
យោងតាមការផ្សាយរបស់បណ្តាញព័ត៌មានរដ្ឋអ៊ីរ៉ង់ បានឲ្យដឹងថា ទស្សនកិច្ចរបស់លោកនាយករដ្ឋមន្ត្រីអ៊ីរ៉ាក់ ក្នុងពេលនេះ គឺដើម្បី ស្ថាបនាចំនងមិត្តភាពរវាងប្រទេសទាំងពីរ ដែលធ្លាប់ឆ្លងកាត់សង្រ្គាម ជាមួយគ្នា កាលពីទសវត្សឆ្នាំ៨០។ ជំនួបនេះ ក៏នឹងអនុញ្ញាត ឲ្យអ៊ីរ៉ាក់ ស្វែងរកការគាំទ្រពីអ៊ីរ៉ង់ ក្នុងការធ្វើសមាហរណកម្ម ក្នុងតំបន់ បន្ទាប់ពីអ៊ីរ៉ាក់កំពុងវិលត្រលប់មករកស្ថិរភាពវិញ ក្រោយការយកជ័យជំនះ លើក្រុមជីហាតអង្គការរដ្ឋអ៊ីស្លាម។
យ៉ាងណាមិញ នៅថ្ងៃព្រហស្បតិ៍ ទី២៦ តុលានេះ កងទ័ពអ៊ីរ៉ាក់ ទើបតែបានបើកសមរភូមិមួយទៀត ដើម្បីដណ្តើមយក វាលទំនាប Euphrate ពីដៃក្រុមជីហាត អង្គការរដ្ឋអ៊ីស្លាមមកវិញ។ តំបន់នេះ គឺជាតំបន់ចុងក្រោយបង្អស់ ដែលស្ថិតនៅក្នុងការកាន់កាប់ របស់ក្រុមជីហាតអង្គការរដ្ឋអ៊ីស្លាម។ មន្ត្រីជំនាញជាច្រើន ក៏បានលើកឡើងថា ជោគជ័យរបស់កងទ័ពអ៊ីរ៉ាក់ កន្លងមកនេះ ដោយសារបានទទួលជំនួយ កម្លាំង អាវុធ និងបច្ចេកទេស ពីកងទ័ពអ៊ីរ៉ង់។
ទស្សនកិច្ចនៅអ៊ីរ៉ង់របស់ប្រមុខរដ្ឋាភិបាលអ៊ីរ៉ាក់ ក្នុងពេលនេះ ក៏អាចផ្តោតសំខាន់ ទៅលើបញ្ហាទាមទារឯករាជ្យរបស់ជនជាតិកួដ នៅអ៊ីរ៉ាក់ដែរ។ អ៊ីរ៉ង់បានគាំទ្ររដ្ឋាភិបាលអ៊ីរ៉ាក់ ដោយប្រឆាំង មិនឲ្យក្រុមកួដ បំបែកទឹកដី មានឯករាជ្យទេ។ វិបត្តិទាមទារអធិបតេយ្យភាព របស់ក្រុមកួដ នៅអ៊ីរ៉ាក់ កំពុងតែប្រមូល ប្រទេសក្នុងតំបន់ ដែលធ្លាប់តែមិនត្រូវគ្នា ដូចជាតួកគី អ៊ីរ៉ាក់ និងអ៊ីរ៉ង់ ជាដើម ឲ្យចាប់ដៃគ្នា ដើម្បីរិះរកវិធី ទប់ស្កាត់ ការទាមទារឯករាជ្យរបស់ក្រុមកួដ។
ដោយឡែក កាលពីដើមសប្តាហ៍នេះ លោកនាយករដ្ឋមន្ត្រីអ៊ីរ៉ាក់ បានអញ្ជើញទៅជួបព្រះចៅសាល់ម៉ាន់ របស់អារ៉ាប៊ីសាអូឌីត។ នៅទីនោះ អារ៉ាប៊ីសាអូឌីត មានបំណងទាក់ទាញអ៊ីរ៉ាក់ កុំឲ្យខិតទៅជិតអ៊ីរ៉ង់ ដែលជាសត្រូវធំរបស់ខ្លួន។ ដូច្នេះក្នុងកាលៈទេសៈនេះ លោកនាយករដ្ឋមន្ត្រីអ៊ីរ៉ាក់ ត្រូវតែថ្លឹងថ្លែងដោយប្រុងប្រយ័ត្ន ធ្វើយ៉ាងណា កុំឲ្យមហាយក្សដើមបូព៌ាទាំងពីរ មានការអាក់អន់ចិត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ