កូរ៉េខាងត្បូងលុបចោលទស្សនកិច្ចទៅជប៉ុន ក្រោយរដ្ឋមន្រ្តីជប៉ុនទៅវិហារយ៉ាស៊ូគូនី
នៅថ្ងៃចន្ទនេះ កូរ៉េខាងត្បូងបានសម្រេចលុបចោលដំណើរទស្សនកិច្ចរបស់រដ្ឋមន្រ្តីការបរទេសខ្លួន ទៅកាន់ទីក្រុងតូក្យូ ដើម្បីជាការតបតទៅនឹងដំណើរទស្សនកិច្ចរបស់មន្រ្តីជាន់ខ្ពស់ជប៉ុន ៣រូប ទៅកានវិហារយ៉ាស៊ូគូនី កាលពីចុងសប្តាហ៍កន្លងទៅនេះ។ វិហារយ៉ាស៊ូគូនី ដែលមានបញ្ចុះសពអតីតមេដឹកនាំយោធាជប៉ុន ដែលត្រូវកាត់ទោសពីបទឧក្រិដ្ឋកម្មសង្រ្គាម ជារឿយៗ តែងតែបង្កជារឿងចម្រូងចម្រាស រវាងជប៉ុន និងប្រទេសជិតខាង គឺចិន និងកូរ៉េ។
ចុះផ្សាយនៅថ្ងៃ៖
ស្តាប់ - ០១:៥៧
មន្រ្តីជប៉ុន ទាំង ៣រូប ដែលបានធ្វើដំណើរទៅគោរពវិញ្ញានក្ខន្ធ នៅវិហារយ៉ាស៊ូគូនី កាលពីចុងសប្តាហ៍កន្លងទៅនេះ រួមមាន លោកតារ៉ូ អាសូ (Taro Aso) ឧបនាយករដ្ឋមន្រ្តី និងជារដ្ឋមន្រ្តីក្រសួងហិរញ្ញវត្ថុ, លោកយ៉ូស្ហ៊ីតាកា ស្ហ៊ីនដូ (Yoshitaka Shindo) រដ្ឋមន្រ្តីក្រសួងមហាផ្ទៃ និងលោកកីជី ហ្វ៊ូរូយ៉ា (Keiji Furuya) ប្រធានគណៈកម្មការជាតិទទួលបន្ទុកសន្តិសុខសាធារណៈ។
គួរបញ្ជាក់ឡើងវិញថា វិហារយ៉ាស៊ូគូនី គឺជាវិមានសព ដែលមានបញ្ចុះសាកសពប្រមាណជា ២,៥លាននាក់ ដែលជប៉ុនចាត់ទុកថា ជាអ្នកដែលបានបូជាជីវិត ដើម្បីបុព្វហេតុជាតិ។ ក៏ប៉ុន្តែ អ្វីដែលជារឿងចម្រូងចម្រាស គឺនៅត្រង់ថា នៅក្នុងចំណោមសាកសព ដែលបញ្ចុះ នៅយ៉ាស៊ូគូនីនេះ មានអតីតមេដឹកនាំជប៉ុន ១៤រូប ដែលត្រូវបានតុលាការអន្តរជាតិ កាត់ទោសពីបទឧក្រិដ្ឋកម្មសង្រ្គាម នៅក្រោយសង្រ្គាមលោកលើកទី២។
កូរ៉េខាងត្បូង ដែលធ្លាប់ជាប្រទេសរងគ្រោះដោយនយោបាយយោធានិយមរបស់ជប៉ុន កាលពីសម័យសង្រ្គាមលោក បានចេញសេចក្តីថ្លែងការណ៍មួយ នៅថ្ងៃចន្ទនេះ ថ្កោលទោសចំពោះដំណើរទៅកាន់វិហារយ៉ាស៊ូគូនី របស់មន្រ្តីជាន់ខ្ពស់ជប៉ុន។ លើសពីនេះទៅទៀត ដំណើរទស្សនកិច្ចរបស់រដ្ឋមន្រ្តីក្រសួងការបរទេសកូរ៉េខាងត្បូង ទៅកាន់ទីក្រុងតូក្យូ ក៏ត្រូវបានកូរ៉េខាងត្បូងលុបចោលដែរ។
នៅឯតូក្យូឯណោះវិញ រដ្ឋាភិបាលជប៉ុនបានសម្តែងនូវការសោកស្តាយ ដែលកូរ៉េខាងត្បូងសម្រេចលុបចោលដំណើរទស្សនកិច្ចរដ្ឋមន្រ្តីក្រសួងការបរទេសរបស់ខ្លួននេះ ដោយបានលើកឡើងថា ដំណើរទៅកាន់វិហារយ៉ាស៊ូគូនីរបស់មន្រ្តីជប៉ុនទាំង ៣នាក់ កាលពីចុងសប្តាហ៍កន្លងទៅនេះ គឺធ្វើឡើងជាលក្ខណៈឯកជន ក្នុងនាមពលរដ្ឋជប៉ុនធម្មតាប៉ុណ្ណោះ មិនមែនក្នុងនាមរដ្ឋាភិបាលនោះទេ។
លោកនាយករដ្ឋមន្រ្តីស្ហ៊ីនហ្សូ អាបេ ដែលជាអ្នកនយោបាយជាតិនិយមម្នាក់ ហើយដែលកាលពីឆ្នាំទៅមិញ ក្នុងពេលលោកនៅជាមេដឹកនាំបក្សប្រឆាំង ក៏ធ្លាប់បានទៅគោរពវិញ្ញាណក្ខន្ធ នៅវិហារយ៉ាស៊ូគូនីដែរនោះ លោកមិនបានធ្វើដំណើរទៅយ៉ាស៊ូគូនី ដោយផ្ទាល់ខ្លួនលោកនោះទេ កាលពីចុងសប្តាហ៍កន្លងទៅនេះ ក៏ប៉ុន្តែ លោកបានផ្ញើជារបស់របរខ្លះ ដើម្បីឲ្យគេយកទៅដាក់ថ្វាយជាគ្រឿងបូជា នៅទីនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ