អឺរ៉ុប ព្រមព្រៀងទទួលយកជនអន្តោប្រវេសន៍ចំនួន៤៩ នាក់
ប្រទេសម៉ាល់ត៍ បានឈានដល់កិច្ចព្រមព្រៀងមួយ ជាមួយបណ្តាប្រទេស សហភាពអឺរ៉ុបផ្សេងទៀត ដើម្បីអនុញ្ញាតឱ្យជនអន្តោប្រវេសន៍ចំនួន ៤៩ នាក់ ដែលស្ថិតនៅលើនាវាសង្គ្រោះពីរគ្រឿង នៅឯឆ្នេរសមុទ្រម៉ាល់ត៍ ចូលចតក្នុងដែនដីរបស់ប្រទេសម៉ាល់ត៍បាន។ នេះបើតាមប្រសាសន៍របស់នាយករដ្ឋមន្ត្រីម៉ាល់ត៍ ប្រាប់ទៅកាន់អ្នកសារព័ត៌មាននៅថ្ងៃពុធ ទី៩ មករា ឆ្នាំ២០១៩។
ចុះផ្សាយនៅថ្ងៃ៖ កែប្រែថ្ងៃទី៖
ជនអន្តោប្រវេសន៍ធ្វើដំណើរតាមទូកចំនួន ៤៩ នាក់ ដែលក្នុងនោះរួមមាន ទារកម្នាក់ កុមារ ៤-៥ នាក់ ត្រូវបានជួយសង្គ្រោះ ខណៈពេលដែល ពួកគេព្យាយាមធ្វើដំណើរឆ្លងកាត់តាមសមុទ្រមេឌីទែរ៉ាណេ ពីអាហ្វ្រិកខាងជើង ចូលមកកាន់ទឹកដីអឺរ៉ុប។
ជុំវិញបញ្ហានេះដែរ នាយករដ្ឋមន្ត្រីប្រទេសម៉ាល់ត៍ បានឲ្យដឹងថា រដ្ឋាភិបាលបានសម្រេចអនុញ្ញាតឲ្យទូករបស់ជនអន្តោប្រវេសណ៍ចូលចតក្នុងដែនដីរបស់ខ្លួន គឺក្រោយពី មានកិច្ចព្រមព្រៀងរួមមួយ ស្តីអំពីបញ្ហាជនអន្តោប្រវេសន៍ ពីបណ្តាប្រទេសសហភាពអឺរ៉ុបទាំង២៧ រួចមក។
បន្ថែមលើនេះ នាយករដ្ឋមន្ត្រីរូបនេះ ក៏បានបញ្ជាក់ប្រាប់ផងដែរថា បើគិតរហូតមកដល់មាននេះ ប្រទេសម៉ាល់ត៍ បានទទួលយកជនអន្តោប្រវេសន៍ចំនួន ២៩៨នាក់ហើយ បូករួមទាំងជនអន្តោប្រវេសន៍ថ្មី ចំនួនទាំង៤៩នាក់ទៀតនោះ។ តួលេខនេះ គឺបូករួមនឹងជនអន្តោប្រវេសន៍ចំនួន ២៤៩ នាក់ផ្សេងទៀត ដែលកំពុងមានវត្តមាន នៅក្នុងប្រទេសម៉ាល់ត៍ស្រាប់។
ក្នុងចំណោមពួកគេទាំងអស់នោះ មាន១៧៦នាក់ អាចនឹងត្រូវបញ្ជូនទៅកាន់ប្រទេសអឺរ៉ុបមួយចំនួនរួមមានជាអាទិ៍ អាល្លឺម៉ង់ បារាំង ព័រទុយហ្កាល់ និងអៀរឡង់ជាដើម។ល។
ជាមួយគ្នានេះដែរ ជនអន្តោប្រវេសន៍ ៧៨ នាក់ នឹងត្រូវអនុញ្ញាតឲ្យស្នាក់នៅក្នុងប្រទេសម៉ាល់ត៍ ខណៈពេលដែល ជនអន្តោប្រវេសន៍ ជនជាតិបង់ក្លាដែស ចំនួន ៤៤ ផ្សេងទៀត នឹងត្រូវបញ្ជូនត្រលប់ទៅកាន់ប្រទេសកំណើតរបស់ពួកគេវិញ។
សូមរំឭកជូនផងដែរថា បញ្ហាជនអន្តោប្រវេសន៍ បានក្លាយទៅជាប្រធានបទដ៏ក្តៅ និងជាបញ្ហាចោទយ៉ាងខ្លាំង នៅក្នុងសហភាពអឺរ៉ុប ជាពិសេសគឺចាប់តាំងពីឆ្នាំ២០១៦ មកម្ល៉ោះ។ នៅគ្រាកន្លងមក ជនអន្តោប្រវេសន៍មួយចំនួនដែលប្រថុយជិវិត ធ្វើដំណើរតាមទូកទៅកាន់អឺរ៉ុប ថែមទាំងត្រូវបណ្តាប្រទេសអឺរ៉ុបខ្លះ មិនអនុញ្ញាតឱ្យពួកគេចូលចតក្នុងប្រទេសទៀតផង។
មួយវិញទៀត បើតាមតួលេខចេញដោយ ភ្នាក់ងារជួយសង្គ្រោះរបស់អង្គការសហប្រជាជាតិ មានជនអន្តោប្រវេសន៍ រហូតដល់ចំនួនជាង ១១ ម៉ឺននាក់ឯណោះ បានប្រថុយប្រថានជីវិតជិះទូកឆ្លងកាត់តាមសមុទ្រមេឌីទែរ៉ាណេ ដើម្បីអាចមកដល់អឺរ៉ុបបាន កាលពីឆ្នាំ២០១៨ កន្លងទៅថ្មីៗនេះ។ មិនតែប៉ុណ្ណោះ ក្នុងចំណោមនោះ មានមនុស្សប្រមាណជាង ២ ពាន់អ្នក បានបាត់បង់ជីវិត ឬបាត់ខ្លួន ដោយសារការធ្វើដំណើរឆ្លងកាត់សមុទ្រដ៏សែនគ្រោះថ្នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ