IMF ដំឡើងអត្រាកំណើនសេដ្ឋកិច្ចបារាំងឆ្នាំ ២០១៦ និងអំពាវនាវឲ្យធ្វើកំណែទម្រង់បន្ថែម
នៅថ្ងៃអង្គារ ទី២៤ ឧសភា អង្គការមូលនិធិរូបិយវត្ថុអន្តរជាតិហៅកាត់ថា IMF បានដំឡើងអត្រាកំណើនសេដ្ឋកិច្ចរបស់បារាំងសម្រាប់ឆ្នាំ ២០១៦ ពី ១,១% ទៅជិត ១,៥%។ តែទន្ទឹមគ្នានេះ IMF ក៏បានអំពាវនាវឲ្យរដ្ឋាភិបាលបារាំងចាត់វិធានការធ្វើកំណែទម្រង់នៅលើផ្នែកផ្សេងទៀត ពិសេសកំណែទម្រង់ទីផ្សារការងារ។ យ៉ាងណាក៏ដោយ ដំណឹងល្អមួយនេះបានធ្លាក់មក ចំពេលបាតកម្មប្រឆាំងនឹងច្បាប់ការងារកំពុងបន្តមានយ៉ាងសកម្ម រហូតដល់មានការបិទខ្ទប់ឃ្លាំស្តុកសាំងបណ្តាលឲ្យមានស្ថានីយ៍ជាច្រើនក្នុងទីក្រុងប៉ារីស និងជាយក្រុងប៉ារីសបិទទ្វារបណ្តោះអាសន្ន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
« សេដ្ឋកិច្ចបារាំងបាន និងកំពុងងើបឡើងវិញហើយ តែនៅមានកិច្ចការសំខាន់ៗ និងចាំបាច់ជាច្រើនទៀតដែលរដ្ឋាភិបាលត្រូវធ្វើដើម្បីបង្កើតការងារ និងកាត់បន្ថយប្រាក់បំណុល » នេះជាសេចក្តីសន្និដ្ឋានរបស់អង្គការមូនិធិរូបិយវត្ថុនៅក្នុងការវាយតម្លៃប្រចាំឆ្នាំស្តីពីស្ថានភាពសេដ្ឋកិច្ចក្នុងប្រទេសបារាំង។ ការហ៊ានអះអាងយ៉ាងដូចនេះមកពី IMF បានមើលឃើញថា កំណើនសេដ្ឋកិច្ចបារាំងក្នុងត្រីមាសទី១ ឆ្នាំ ២០១៦ មានកម្រិត ០,៥% ដែលជាកម្រិតមួយខ្ពស់លើសពីការប្រមើលទុករបស់ IMF ដែលមានត្រឹម ០,២%។
គឺជាមួយនឹងអត្រាកំណើនសេដ្ឋកិច្ច ០,៥% នៅត្រីមាសទី១ កន្លងទៅនេះហើយដែល IMF ហ៊ានវាយតម្លៃថា កំណើនសេដ្ឋកិច្ចបារាំងសម្រាប់ឆ្នាំ ២០១៦ នេះនឹងមានជិត ១,៥% ហើយសម្រាប់ ៥ឆ្នាំខាងមុខនឹងអាចមានដល់ទៅ ១,៧៥%។ តែនៅក្នុងការវាយតម្លៃរបស់ខ្លួនដដែល IMF បានអំពាវនាវឲ្យរដ្ឋាភិបាលបារាំងបន្តធ្វើកំណែទម្រង់លើសពីអ្វីដែលរដ្ឋាភិបាលទើបបានធ្វើកន្លងមក តាមរយៈច្បាប់សេដ្ឋកិច្ចរបស់លោករដ្ឋមន្រ្តីក្រសួងសេដ្ឋកិច្ចអេម៉ានុយអែល ម៉ាក្រុង ឬមួយក៏ច្បាប់ការងាររបស់លោកស្រីរដ្ឋមន្រ្តីក្រសួងការងារអែល កុមរី។
វិធានការកំណែទម្រង់ដែល IMF ចង់ឲ្យបារាំងធ្វើជាបន្តនាពេលខាងមុខ គឺកំណែទម្រង់ទីផ្សារការងារក្នុងគោលដៅកាត់បន្ថយចំនួនអ្នកអត់ការងារធ្វើ និងកាត់បន្ថយប្រាក់បំណុល។ នៅត្រង់ចំណុចនេះ ស្ថាប័នហិរញ្ញវត្ថុអន្តរជាតិមួយនេះបានដាក់ចេញជាអនុសាសន៍ឲ្យធ្វើកំណែទម្រង់លើក្រិតក្រមនៃការផ្តល់ប្រាក់ឧបត្ថម្ភធនដល់អ្នកអត់ការងារធ្វើ និងដាក់ចេញនូវនយោបាយជួយគាំទ្រ និងជួយសម្រួលដល់អ្នកអត់ការងារធ្វើនៅក្នុងការស្វែងរកការងារធ្វើ ពិសេសជួយពួកគេឲ្យបង្កើតមុខរបររកស៊ីខ្លួនឯង។
នៅចុងបញ្ចប់នៃសេចក្តីសន្និដ្ឋានរបស់ខ្លួន IMF បានគូសបញ្ជាក់ពីសារៈសំខាន់ក្នុងការកាត់បន្ថយឱនភាពថវិកាជាតិក្នុងគោលដៅឆ្ពោះទៅកាត់បន្ថយកម្រិតប្រាក់បំណុលដែលនៅតែមានកម្រិតខ្ពស់ដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ