លោក ស៊ីជីនពីង ៖ ការត្រួតពិនិត្យអ៊ីនធ័រនែត ដើម្បីធានាសេរីភាពនិងសណ្តាប់ធ្នាប់
ដើម្បីធានាបាននូវសេរីភាពរបស់អ្នកប្រើប្រាស់ ចិនចាំបាច់ត្រូវតែមានការត្រួតពិនិត្យអ៊ីនធ័រនែត ព្រោះនេះមធ្យោបាយការពារប្រឈមទប់នឹងប្រព័ន្ធអ៊ីនធ័រនែតពិភពលោក ដែលសេរី និងបើកចំហ។ នេះជាប្រសាសន៍របស់លោក ស៊ី ជីនពីង ប្រធានាធិបតីចិន ថ្លែងក្នុងសន្និសីទអន្តរជាតិស្តីពីអ៊ីនធ័រនែត លើកទីពីរ នៅក្រុងវូសេន Wuzhen ភាគខាងកើតប្រទេស ដែលទាមទារឱ្យមានការគោរពអធិបតេយ្យភាពប្រទេសនីមួយៗ ក្នុងជម្រើសគ្រប់គ្រងប្រព័ន្ធអ៊ីនធ័រនែត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
ហេតុអ្វីបានជាចិនត្រូវតែត្រួតពិនិត្យការប្រើប្រាស់ប្រព័ន្ធអ៊ីនធ័រនែត ? នេះគឺជាជម្រើសរបស់ប្រទេសចិន ! ព្រោះបើតាមលោក ស៊ី ជីនពីង “សេរីភាពនិងសណ្តាប់ធ្នាប់ ជាពាក្យសំខាន់ពីរដែលមិនអាចផ្តាច់ពីគ្នាឡើយ ក្នុងប្រព័ន្ធអ៊ីនធ័រនែត ៖ សេរីភាពជាផលបង្ហើយនៃសណ្តាប់ធ្នាប់ ហើយសណ្តាប់ធ្នាប់គឺជាការធានាសេរីភាព”។ អ្នកប្រើប្រាស់អ៊ីនធ័រនែត អាចបញ្ចេញមតិយោបល់បាន តែត្រូវមានវិន័យ មានសណ្តាប់ធ្នាប់ ស្របតាមផ្លូវច្បាប់ ដែលអាចជួយការពារផលប្រយោជន៍របស់អ្នកប្រើប្រាស់អ៊ីនធ័រនែតគ្រប់ៗរូប។
មិនតែប៉ុណ្ណោះ លោកស៊ី ជីនពីង បានឆ្លៀតប្រើវេទិកាសន្និសីទអន្តរជាតិស្តីពីអ៊ីនធ័រនែត សម្រាប់ទាមទារឱ្យមានការគោរពអធិបតេយភាពរបស់ប្រទេសនីមួយៗ ក្នុងការគ្រប់គ្រងប្រព័ន្ធអ៊ីនធ័រនែត និងបានព្រមានប្រទេសផ្សេងទៀត សូមកុំសាកល្បងប្រើអំណាចអនុត្តរភាពលើប្រព័ន្ធនេះ ឬក៏ចង់ជ្រៀតជ្រែកកិច្ចការផ្ទៃក្នុងរបស់ប្រទេសគេ។
សន្និសីទអន្តរជាតិ ស្តីពីអ៊ីនធ័រនែតនេះ ដែលរៀបចំឡើងដោយចិន នៅក្នុងប្រទេសចិន ដើម្បីឃោសនាការពារអំពីប្រព័ន្ធគ្រប់គ្រងអ៊ីនធ័រនែតរបស់ខ្លួន មានក្រុមហ៊ុនអន្តរជាតិធំៗជាច្រើនចូលរួម ដូចជាក្រុមហ៊ុនApple Kaspersky Samsun Nokia ។ល។ និង។ល។ ព្រមទាំងអ្នកទទួលខុសត្រូវនយោបាយមកពីច្រើនប្រទេសផ្សេងទៀត តែសុទ្ធសឹងជាប្រទេសជាប់ឈ្មោះ និងរងការរិះគន់ក្នុងផ្នែកបិទខ្ទប់សេរីភាពក្នុងការបញ្ចេញមតិ មានជាអាទិ៍ នាយករដ្ឋមន្ត្រីប៉ាគីស្ថាន និងរុស្ស៊ី។
ប្រព័ន្ធគ្រប់គ្រងអ៊ីនធ័រនែតចិន មានលក្ខណៈតឹងតែងខ្លាំងជាងគេបំផុត នាំមុខប្រទេសអ៊ីរ៉ង់ និងស៊ីរីទៀត។ នេះបើតាមរបាយការណ៍របស់អង្គការFreedom House អាមេរិក។ ចិនមានអ្នកប្រើប្រាស់អ៊ីនធ័រនែត ៧០០លាននាក់ តែមិនអាចប្រើ Facebook Twitter Google បានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ