មីស៊ីលកូរ៉េខាងជើងបាញ់ថ្ងៃសុក្រ២៨កក្កដាកន្លងទៅ ហោះក្បែរយន្តហោះបារាំង Air France
ទូរទស្សន៍CNNបានផ្សាយនៅថ្ងៃពុធនេះថា មីស៊ីលអន្តរទ្វីបដែលកូរ៉េខាងជើងបាញ់កាលពីថ្ងៃសុក្រ២៨កក្កដាកន្លងទៅនេះ បានហោះក្បែរយន្តហោះបារាំង Air France តែប្រមាណ១០០គីឡូម៉ែត្រប៉ុណ្ណោះ បើគិតពីពេលវេលា គឺឆ្ងាយពីយន្តហោះបារាំងត្រឹម៧នាទីប៉ុណ្ណោះ។ ក្រុមហ៊ុន Air France បានសម្រេចពង្រីកតំបន់ហាមឃាត់ការហោះហើររបស់ខ្លួន គឺលែងហោះតំបន់ព័ទ្ធជុំវិញកូរ៉េខាងជើងតែម្តង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
ក្រុមហ៊ុន Air France បានគូសបញ្ជាក់ពីព័ត៌មានរបស់ទូរទស្សន៍CNN ថាថ្ងៃសុក្រ២៨កក្កដាកន្លងទៅ យន្តហោះបូអ៊ីង៧៧៧ ពិតជាបានហោះមិនឆ្ងាយពីមីស៊ីលអន្តរទ្វីបរបស់កូរ៉េខាងជើងមែន។ យន្តហោះបូអ៊ីងអ៊ែរហ្វ្រង់ ថ្ងៃសុក្រមុននេះ បានដឺកមនុស្ស៣៣២នាក់ ចេញដំណើរពីទីក្រុងតូក្យូ ឆ្ពោះទៅទីក្រុងប៉ារីស។ ថ្ងៃសុក្រសប្តាហ៍មុននេះដែរ កូរ៉េខាងជើងបានបាញ់មីស៊ីលអន្តរទ្វីប ដែលហោះចំងាយ១០០០គីឡូម៉ែត្រ និងក្នុងកម្ពស់៣២០០គីឡូម៉ែត្រ មុននឹងធ្លាក់ទៅសមុទ្រជប៉ុន។ យោងតាមទូរទស្សន៍CNN មីស៊ីលកូរ៉េខាងជើងនៅចំងាយតែប្រមាណ១០០គីឡូម៉ែត្រ រឺតែ៧នាទីប៉ុណ្ណោះ ពីយន្តហោះបូអ៊ីង អ៊ែរហ្វ្រង់ ដែលកំពុងហោះហើរក្នុងដែនអាកាស។
ដោយឡែក ក្រុមហ៊ុនអ៊ែរហ្វ្រង់អះអាងថា ហេតុការណ៍នេះមិនបានគំរាមសន្តិសុខយន្តហោះខ្លួនទេ។ ទោះយ៉ាងនេះក្តី អ៊ែរហ្វ្រង់សម្រេចពង្រីកតំបន់ដែលមិនត្រូវហោះកាត់ បន្ថែមទៀត គឺមិនគ្រាន់តែមិនហោះឆ្លងកាត់កូរ៉េខាងជើងទេ គឺមិនហោះកាត់តំបន់ជុំវិញកូរ៉េខាងជើងថែមទៀតដែរ។ គួរបញ្ជាក់ថា តំបន់ហោះហើរភ្ជាប់ក្រុងតូក្យូ ទៅក្រុងប៉ារីស របស់ជើងយន្តហោះបូអ៊ីងបារាំងថ្ងៃសុក្រមុននេះ ជាតំបន់ដែលយន្តហោះរបស់ក្រុមហ៊ុនអាកាសចរជាច្រើនឆ្លងកាត់។
ក្រុមហ៊ុនអ៊ែរហ្វ្រង់ប្រាប់ដែរថា បានទទួលដំណឹងពិអាជ្ញាធរជប៉ុនទាក់ទងនឹងមីស៊ីលកូរ៉េខាងជើង ប៉ុន្តែដំណឹងនេះបានទទួលពេលហេតុការណ៍កើតឡើងរួចហើយ ហើយក៏គ្មានដំបូន្មានរឺវិធានការអ្វីប្រាប់អោយយន្តហោះបារាំងប្រុងប្រយ័ត្នដែរ។ ទោះជារដ្ឋនានាមានកាតព្វកិច្ចជូនដំណឹងពីហេតុការណ៍ផ្សេងៗ ដែលអាចប៉ះពាល់សន្តិសុខយន្តហោះកំពុងហោះហើរក្នុងដែនអាកាសខ្លួន ក៏មានអ្នកជំនាញខ្លះគិតថា គេមិនទាន់អាចមានវិធានការការពារសុវត្ថិភាពយន្តហោះ ករណីមានមីស៊ីលត្រូវហោះទៅប៉ះយន្តហោះទេ។ ជាក់ស្តែង អាមេរិកប្រាប់ដែរថា មីស៊ីលដែលកូរ៉េខាងជើងបាញ់កាលពីថ្ងៃបុណ្យជាតិអាមេរិក ថ្ងៃ៤កក្កដានោះ ក៏បានហោះក្នុងដែនអាកាសរបស់ជើងយន្តហោះផ្សេងៗទៀតដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ