ឃាតកម្មគីមជុងណាម ៖ ជនរងគ្រោះមានថ្នាំបន្សាបជាប់នឹងខ្លួន
សំណុំរឿងធ្វើឃាតគីម ជុងណាម បងប្រុសម្តាយទីទៃរបស់ប្រមុខដឹកនាំកូរ៉េខាងជើង កំពុងផុសផុស និងចោទជាសំណួរជាថ្មី។ បើតាមអ្នកជំនាញដែលចូលខ្លួនមកធ្វើជាសាក្សីនៅក្នុងសវនការ បានគូសបញ្ជាក់ថា ជនរងគ្រោះគីមជុងណាម មានថ្នាំអាចបន្សាបជាតិពុល ជាប់នឹងខ្លួន នៅក្នុងពេលរងការវាយប្រហារដោយថ្នាំគីមី នៅអាកាសយានដ្ឋានប្រទេសម៉ាឡេស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
តើលោក គីម ជុងណាម ដឹងខ្លួនមុន ឬក៏កិច្ចការពារទុកជាមុន ជាធម្មតា ? គ្មាននរណាដឹងទេ ថាតើមានមូលហេតុដែលគីមជុងណាម ដាក់ថ្នាំបន្សាបតាមជាប់នឹងខ្លួននោះ។ ប៉ុន្តែបើតាមអ្នកឯកទេសខាងផ្នែកថ្នាំពុល ដែលបានចូលធ្វើសក្ខីកម្មនៅចំពោះតុលាការក្នុងនាមជាសាក្សី បានប្រកាសថា គីមជុងណាម មានថ្នាំ Atropine ជាប់នឹងខ្លួន ដែលអាចបន្សាបសារធាតុគីមីពុល ប៉ះពាល់ដល់ប្រព័ន្ធប្រសាទ។
នៅក្នុងថ្ងៃឃាតកម្ម ថ្ងៃទី ១៣ កុម្ភៈ ២០១៧ គីម ជុងណាម មានថ្នាំបន្សាប ដល់ទៅ១២មុខ នៅក្នុងកាបូបស្ពាយរបស់ខ្លួន ហើយក្នុងនោះមានមួយដបជាថ្នាំបន្យាប Atropine ដែលអាចសង្គ្រោះជីវិត ពីការវាយប្រហារដោយសារធាតុគីមីពុល VX ដែលជាពពួកសារធាតុគីមី ឧស្ម័នសារ៉ាំង ពុលខ្លាំងបំផុតដល់ស្លាប់។
សូមបញ្ជាក់ថា គីម ជុងណាម បងប្រុសម្តាយទីទៃរបស់គីមជុងអ៊ុន បានរងការវាយប្រហារធ្វើឃាត នៅអាកាសយានដ្ឋានអន្តរជាតិ ក្រុងកូឡាឡាំពួរ។ បើតាមរូបភាពវីដេអូតាមដានសុវត្ថិភាពរបស់ព្រលាន គេឃើញមានស្ត្រីពីររូប ដើរប្រកិតតាមក្រោយ គីមជុងណាម ហើយពេលទៅដល់កៀក ក៏ជះវត្ថុរាវទៅលើមុខ ដែលធ្វើគីមជុងណាមដួលដេកដីភ្លាម។
ស្ត្រីទាំងពីរនោះម្នាក់ជាជនជាតិឥណ្ឌូណេស៊ី និងម្នាក់ទៀតជាជនជាតិវៀតណាម អាចនឹងត្រូវជាប់ទោសដល់ប្រហារជីវិតផង។ នៅចំពោះមុខតុលាការ ក៏ដូចជាក្រោយពេលចាប់ខ្លួនភ្លាម ស្ត្រីទាំងពីរបានអះអាងថាខ្លួនបរិសុទ្ធ គ្មានពាក់ព័ន្ធនឹងឃាតកម្មនេះទេ ព្រោះពួកគេត្រូវបានជួលឱ្យមកចូលរួមថតកម្មវិធីកំសាន្តតាមទូរទស្សន៍ប៉ុណ្ណោះ។
តាំងពីរឿងអាស្រូវឃាតកម្មនេះបានផ្ទុះឡើងភ្លាម កូរ៉េខាងត្បូង បានចោទប្រកាន់កូរ៉េខាងជើងថាជាអ្នករៀបចំឆាកឈុតឃាតកម្មនេះលោះង តែព្យុងយ៉ាងបានបដិសេធរហូត។ គីម ជុងណាម ដែលជាកូនប្រុសច្បងរបស់ត្រកូលគីម កាលនៅមានជីវិតធ្លាប់ធ្វើការរិះគន់ របបកុម្មុយនិស្តកូរ៉េខាងជើង និងរស់និរទេសខ្លួននៅក្រៅប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ