សហភាពអឺរ៉ុបនិងអាស៊ាន កាន់ដៃគ្នាប្រឆាំងសង្គ្រាមពាណិជ្ជកម្ម
សមាគមប្រជាជាតិអាស៊ីអាគ្នេយ៍ ហៅកាត់ថាអាស៊ាន និងសហភាពអឺរ៉ុប បានបញ្ជាក់រួមក្នុងវេទិកាអាស៊ាននៅប្រទេសសិង្ហបុរី ចុងសប្តាហ៍នេះ អំពីភាពចាំបាច់ ត្រូវប្រឈមនឹងសង្គ្រាមពាណិជ្ជកម្ម។ ដើម្បីប្រយុទ្ធប្រឆាំងនឹងសង្គ្រាមពាណិជ្ជកម្មដែល បង្កឡើងដោយនយោបាយការពារប្រយោជន៍តែម្នាក់ឯងនិយមរបស់លោកដូណាល់ ត្រាំនេះ សហភាពអឺរ៉ុប និងអាស៊ាន នឹងចាប់ដៃគ្នាសាងគំរូផ្តោះប្តូរសេដ្ឋកិច្ចសេរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
នៅក្នុងវេទិកា ដែលរៀងចំឡើងដោយសមាគមប្រជាជាតិអាស៊ីអាគ្នេយ៍ទាំង១០ អាស៊ាន នៅប្រទេសសិង្ហបុរី ប្រមុខការទូតសហភាពអឺរ៉ុប លោកស្រី ហ្វេដេរីកា ម៉ូហ្កេរីនី Federica Mogherini បានធានាអះអាងប្រាប់សមភាគីអាស៊ីថា អាស៊ានអាចរំពឹងនិងជ្រើសរើសសហភាពអឺរ៉ុបមកធ្វើជាដៃគូផ្តោះប្តូរសេដ្ឋកិច្ចបាន។ ព្រោះអឺរ៉ុបមាននយោបាយការពារ ការផ្តោះប្តូរពាណិជ្ជកម្ម ដោយសេរី និងស្មើភាព ដែលផ្តល់ប្រយោជន៍ដល់គ្រប់ភាគី ហើយមិនត្រូវការសង្គ្រាមពាណិជ្ជកម្មដែលផ្តល់តែខាតបង់ឡើយ។
មានន័យថា ក្តីសង្ឃឹម កំពុងចាប់មានពន្លឺ ! សហភាពអឺរ៉ុបនិងអាស៊ាន នឹងអាចមានកិច្ចព្រមព្រៀងផ្តោះប្តូរសេរីនៅថ្ងៃអនាគត។ កិច្ចព្រមព្រៀងថ្នាក់តំបន់ ដែលនឹងអាចសម្រេចបាន តាមរយៈ កិច្ចព្រមព្រៀងបផ្តោះប្តូរសេដ្ឋកិច្ចទ្វេភាគី រវាងសហភាពអឺរ៉ុប និងបណ្តាសមាជិកអាស៊ានមួយចំនួន ដែលកំពុងចរចានាពេលនេះ។
សមាគមអាស៊ាន ដែលមាន១០ ប្រទេស (ថៃ ម៉ាឡេស៊ី សិង្ហបុរី ឥណ្ឌូណេស៊ី ហ្វីលីពីន ព្រុយណេ វៀតណាម ឡាវ ភូមា និងកម្ពុជា) និងប្រជាពលរដ្ឋសរុបជាង ៦៥០លាននាក់ បានចុះកិច្ចព្រមព្រៀងផ្តោះប្តូរសេដ្ឋកិច្ចសេរី រវាងគ្នាក្នុងរង្វង់សមាគម និងជាមួយដៃគូពាណិជ្ជកម្មផ្សេងទៀតក្នុងតំបន់រួចហើយ។
មិនខុសពីបណ្តាប្រទេសផ្សេងទៀតនៅលើពិភពលោក អាស៊ាន បានសម្តែងក្តីព្រួយបារម្ភយ៉ាងខ្លាំង នៅក្នុងវេទិកាឆ្នាំនេះ ចំពោះសង្គ្រាមពាណិជ្ជកម្មដែលបង្កឡើងដោយអាមេរិក ជាមួយសហភាពអឺរ៉ុប និងជាពិសេសជាមួយចិន។ សមាជិកអាស៊ានសុទ្ធតែយល់ដូចគ្នាទាំងអស់ ថាសង្គ្រាមពាណិជ្ជកម្មគ្មានផ្តល់ចំណេញដល់ភាគីណាទេ ហើយសូម្បីតែភាគីមិនពាក់ព័ន្ធផ្ទាល់នឹងសង្គ្រាម ក៏រងផលប៉ះពាល់ធ្ងន់ធ្ងរដែរ។
សូមបញ្ជាក់ថា សង្គ្រាមពាណិជ្ជកម្មអាមេរិក-ចិន កាន់តែដុនដាប។ ក្រោយពីអាមេរិកបានប្រកាសដំឡើងពន្ធនាំចូលផលិតផលចិន ដល់២៥% ចាប់ពីខែកញ្ញាទៅ ចិនបានប្រកាសតបតវិញនៅថ្ងៃនេះ ពីវេទិកាអាស៊ាន សម្រេចដំឡើងពន្ធលើទំនិញអាមេរិកពី ៥ទៅ២៥%វិញ។ សម្រាប់ប្រមុខការទូតចិន វិធានការតបតបែបនេះ គឺដើម្បីការពារប្រព័ន្ធផ្តោះប្តូរពាណិជ្ជកម្មសេរីពិភពលោក ដែលគាំទ្រដោយអង្គការពាណិជ្ជកម្មពិភពលោកOMC៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ