ឃោសនាថ្ងៃដំបូង៖ គណបក្សចំនួន៥យកភ្នំពេញជាគោលដៅធំ ខណៈបក្សផ្សេងទៀតចាប់ផ្តើមនៅតាមខេត្ត
ដូចការគ្រោងទុក យុទ្ធនាការឃោសនាបោះឆ្នោតជ្រើសតាំងតំណាងរាស្ត្រសម្រាប់អាណត្តិទី៦ បានចាប់ផ្តើមហើយ នៅថ្ងៃសៅរ៍នេះ។ នៅថ្ងៃដំបូងនៃយុទ្ធនាការនេះ គណបក្សនយោបាយចំនួន៥ រាប់ទាំងគណបក្សកាន់អំណាច បានជ្រើសរើសយកទីក្រុងភ្នំពេញជាគោលដៅធំជាងគេក្នុងការហែក្បួនឃោសនា ដោយមានអ្នកចូលរួមរាប់ម៉ឺននាក់។ ចំណែកគណៈកម្មាធិការជាតិរៀបចំការបោះឆ្នោត បានវាយតម្លៃជាបឋមថា ការឃោសនាថ្ងៃដំបូងបានប្រព្រឹត្តទៅដោយរលូន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
ចាប់ផ្តើមដោយគណបក្សប្រជាជនកម្ពុជា ដែលអះអាងថា មានអ្នកចូលរួមរហូតដល់៦ម៉ឺននាក់នោះ គឺបានយកទីតាំងទឹកដីកោះពេជ្រ ជាកន្លែងជួបជុំ ដោយមានវត្តមាន លោក ហ៊ុន សែន ជាប្រធានគណបក្សចូលរួមផង មុននឹងក្បួនឃោសនាហែចេញទៅតាមខណ្ឌទាំង១២។ លោកប្រមុខរដ្ឋាភិបាលបានថ្លែងលើកសរសើរពីស្នាដៃរបស់ខ្លួនកន្លងមក បូកបន្ថែមនឹងការសន្យាធ្វើឲ្យប្រសើរបន្ថែមទៀត។
ការឃោសនាដែលមានអ្នកចូលរួមលំដាប់ទី២នៅថ្ងៃដំបូងនេះគឺគណបក្សសម្ព័ន្ធដើម្បីប្រជាធិបតេយ្យរបស់លោក ខឹម វាសនា។ គណបក្សLDP បានអះអាងថា ខ្លួនមានអ្នកចូលរួមជាង១ម៉ឺននាក់ ដោយជួបជុំគ្នានៅផ្លូវ៦០ម៉ែត្រ រួចហែទៅបញ្ចប់នៅផ្លូវមាត់ទន្លេ។
ចំណែក គណបក្សហ្វ៊ុនស៊ិនប៉ិច របស់សម្តេចក្រុមព្រះ បានហែក្បួនឃោសនាចេញពីសួនច្បារជ្រោយចង្វារជិតវត្តចាស់ ដោយមានអ្នកចូលរួមជិត២០០០នាក់ ទៅបញ្ចប់នៅធនាគារជាតិផ្លូវហាណូយ។ ប៉ុន្តែក្បួនឃោសនានេះមិនមានវត្តមានប្រធានគណបក្ស គឺព្រះអង្គម្ចាស់ នរោត្តម រណឬទ្ធិ ចូលរួមនោះទេ ខណៈទ្រង់កំពុងព្យាបាលរបួសនៅក្រៅប្រទេសនៅឡើយ។
រីឯគណបក្សខ្មែររួបរួមជាតិ បានហែក្បួនឃោសនា ចេញពីផ្ទះលោកញឹក ប៊ុនឆៃ នៅខាងកើតស្ពានជ្រោយចង្វា ដោយឈប់សម្រាកអាហារថ្ងៃត្រង់នៅជើងឯក ហើយវិលមកបញ្ចប់នៅទីស្នាក់ការគណបក្សនៅជ្រោយចង្វាវិញ។ គណបក្សខ្មែររួបរួមជាតិ ដែលបែកចេញពីគណបក្សហ្វ៊ុនស៊ិនប៉ិចនេះថា ក្បួនឃោសនារបស់ខ្លួនមានអ្នកចូលរួមប្រមាណជា១០០០នាក់។
លោកញឹក ប៊ុនឆៃ ប្រធានគណបក្សខ្មែររួបរួមជាតិ បានថ្លែងដោយក្តីសង្ឃឹមថា នឹងទទួលបានអាសនៈខ្លះនៅក្នុងរដ្ឋសភា។
ដោយឡែកគណបក្សថ្មីដែលទើបបង្កើតឡើងដោយកូនប្រុស លោក គង់ គាំ អតីតមន្រ្តីជាន់ខ្ពស់គណបក្សសង្រ្គោះជាតិនោះ គឺមានការជួបជុំអ្នកគាំទ្រប្រហែល៣០០នាក់ និងហែក្បួនផងដែរ។
ក្រៅពីទិដ្ឋភាពឃោសនាទ្រង់ទ្រាយធំនៅទីក្រុងភ្នំពេញទាំង៥គណបក្សនេះ ក៏មានការឃោសនាទ្រង់ទ្រាយតូចៗនៅតាមបណ្តាខេត្តផងដែរ ពិសេសគណបក្សកាន់អំណាច។ ប៉ុន្តែទន្ទឹមនឹងនោះ គណបក្សប្រជាធិបតេយ្យមូលដ្ឋាន បានយកទឹកដីស្រុកអង្គរបុរី ខេត្តតាកែវ ជាចំណុចចាប់ផ្តើមនៃយុទ្ធនាការរបស់ខ្លួន។ ការចាប់ផ្តើមនៅស្រុកស្រែចំការរបស់គណបក្សនេះ គឺមានព្រះសង្ឃសូត្រមន្ត និងមានអ្នកគាំទ្ររាប់រយនាក់ដែរ។
ចំណែកគណបក្សជាង១០ផ្សេងទៀត មិនបានឃោសនាធំនៅទីក្រុងភ្នំពេញនៃដំបូងរបស់យុទ្ធនាការបោះឆ្នោតនេះទេ។ នេះបើតាមតារាងកម្មវិធីរបស់គណៈកម្មាធិការជាតិរៀបចំការបោះឆ្នោត។
លោក ហង្ស ពុទ្ធា អ្នកនាំពាក្យ គ.ជ.ប បានវាយតម្លៃជាបឋមថា ដំណើរការឃោសនាថ្ងៃដំបូងនេះមានលក្ខណៈរលូន មិនមានបញ្ហាអ្វីគួរឲ្យកត់សំគាល់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ