អូតង់ព្រមចូលរួមជាមួយសម្ព័ន្ធអន្តរជាតិរបស់អាមេរិក នៅស៊ីរី
ប្រធានាធិបតីអាមេរិក លោកដូណាល់ ត្រាំ នៅថ្ងៃព្រហស្បតិ៍ទី ២៥ឧសភា ចូលរួមជាលើកទីមួយ ក្នុងកិច្ចប្រជុំពិសេសជាមួយមេដឹកនាំរបស់ប្រទេសសមាជិកអូតង់ នៅទីក្រុងព្រុចស៊ែល។ ក្នុងនាមជាប្រទេសមហាអំណាចយោធា ដឹកនាំអង្គការអូតង់ សម្ព័ន្ធអាត្លង់ទិកខាងជើង ប្រធានាធិបតីអាមេរិកនឹងត្រូវផ្តល់កិត្តិយលដ៏ធំធេង ឲ្យកាត់ខ្សែបូរ បើកសម្ពោធ អគារថ្មីរបស់ទីស្នាក់ការកណ្តាលរបស់អង្គការអូតង់ នៅទីក្រុងព្រុចស៊ែល។
ចុះផ្សាយនៅថ្ងៃ៖
វត្តមានរបស់លោកដូណាល់ ត្រាំ នៅក្នុងកិច្ចប្រជុំអូតង់ ត្រូវបានគេទន្ទឹងរង់ចាំមកជាយូរ។ វត្តមានរបស់ប្រមុខដឹកនាំអាមេរិក នៅក្នុងកិច្ចប្រជុំ នៅថ្ងៃនេះសំខាន់ ព្រោះវាស បញ្ជាក់ពីការចូលរួម និងសាមគ្គីភាព ដោយគ្មានងាករេរបស់អាមេរិក នៅក្នុងសម្ព័ន្ធអាត្លង់ទិក អូតង់។
លោកដូណាល់ ត្រាំ ធ្លាប់បានបង្កើតឲ្យមានមន្ទិលសង្ស័យម្តងហើយ ក្នុងចំណោមប្រទេសសមាជិកអូតង់ នៅពេលលោកនិយាយរិះគន់អូតង់ថា ជាអង្គការដែលចាស់ គំរិល ដោយសារតែអង្គការអូតង់ផ្តោតសំខាន់តែទៅលើរុស្ស៊ី ប៉ុន្តែ មិនមែនក្រុមភេរវនិយម។
នៅថ្ងៃនេះ អូតង់ចង់បង្ហាញ ឲ្យលោកដូណាល់ ត្រាំឃើញថា អូតង់មិនមែនជាអង្គការដែលចាស់ ហួសសម័យ ដូចលោកត្រាំបាននិយាយនោះទេ។ លោកដូណាល់ ត្រាំ ត្រូវបានគេផ្តល់កិត្តិយស ជាពិសេសឲ្យកាត់ខ្សែបូរ បើកសម្ពោធ ដាក់ឲ្យប្រើប្រាស់អគារថ្មីរបស់អង្គការអូតង់ ដែលទើបតែបានបញ្ចប់ការសាងសង់ យ៉ាងទាន់ហន់ សម្រាប់ទទួលលោកដូណាល់ ត្រាំ នៅថ្ងៃនេះ។
អូតង់បានចំណាយលុយជាង ១ពាន់លានអឺរ៉ូ សម្រាប់សាងសង់អគារថ្មីរបស់អូតង់ ដែលមានរូបរាងជាម្រាមដៃ ស៊កចូលគ្នា តំណាងឲ្យការសហការ សាមគ្គីរវាងប្រទេសសមាជិកអូតង់។ តាមគម្រោង លោកស្រីម៉ែរកិល នាយករដ្ឋមន្រ្តីអាល្លឺម៉ង់នឹងដាក់ថ្មមួយដុំនៃជញ្ជាំងប៊ែរឡាំង និមិត្តរូបនៃសិទ្ធិសេរីភាព ចំណែកលោកដូណាល់ ត្រាំ នឹងដាក់ថ្មីមួយដុំដែរ នៃអគារពាណិជ្ជកម្មភ្លោះ ក្នុងក្រុងញូវយ៉ក ដែលបានរងការវាយប្រហារភេរវកម្ម ថ្ងៃទី ១១កញ្ញា ២០០១ ដើម្បីតំណាងឲ្យការប្រយុទ្ធប្រឆាំងនឹងក្រុមភេរវនិយម។
ការដំឡើងថវិកាយោធារបស់ប្រទេសសមាជិក និងភេរវនិយមជាប្រធានបទសំខាន់នៃកិច្ចប្រជុំនៅទីក្រុងព្រុចស៊ែល
នៅថ្ងៃពុធម្សិលមិញ តាំងពីក្នុងយន្តហោះ ប្រធានាធិបតីអាមេរិក Air Force 1 រដ្ឋមន្រ្តីការបរទេសអាមេរិក លោករិច ធីល័រសុនបាននិយាយប្រាប់អ្នកកាសែតថា ប្រធានាធិបតីអាមេរិក មានសារសំខាន់ពីរសម្រាប់និយាយទៅកាន់មេដឹកនាំរបស់ប្រទេសសមាជិកដទៃទៀតរបស់អូតង់។ ទីមួយ គឺអាមេរិកចង់ឲ្យអូតង់ចូលរួម ពេញទី ប្រយុទ្ធប្រឆាំងនឹងភេរវនិយម ដោយចូលរួម នៅក្នុងសម្ព័ន្ធអន្តរជាតិប្រយុទ្ធប្រឆាំងនឹងក្រុមជីហាតអង្គការរដ្ឋអ៊ីស្លាមនៅស៊ីរី និងនៅអ៊ីរ៉ាក់។
ប្រធានាធិបតីអាមេរិកនៅតែទាមទារឲ្យប្រទេសសមាជិកដទៃចាក់លុយបន្ថែម ទៅក្នុងកញ្ចប់ថវិកាការពារជាតិរបស់អូតង់។ តាំងពីចូលកាន់តំណែងជាប្រធានាធិបតីអាមេរិក លោកដូណាល់ ត្រាំ បានដាក់សម្ពាធលើប្រទេសសមាជិកអូតង់ ក្នុងរឿងបន្ថែមថវិកាយោធាសម្រាប់អូតង់ បើសិនមិនចង់ឃើញអាមេរិក ដកខ្លួនចេញអូតង់ទេនោះ។ អាមេរិកដែលផ្តល់ថវិកាច្រើនគេ (ប្រមាណ៦០០លានដុល្លារ) សម្រាប់កញ្ចប់ថវិកាយោធារបស់អូតង់ បានទាមទារឲ្យប្រទេសសមាជិកដទៃទៀត ដូចជាបារាំង និងអាល្លឺម៉ង់ជាដើម ឲ្យ បង់វិភាគទាន ប្រមាណ ២ភាគរយនៃផលិតផលក្នុងស្រុកសរុបរបស់ជាតិ ទៅក្នុងកេសលុយរបស់អូតង់ ទៅតាមការសន្យារបស់ខ្លួន នៅឆ្នាំ ២០១៤។
តាមលោករិច ធីល័រសុន លោកដូណាល់ ត្រាំ នឹងមានជំហរតឹង ដាច់ណាត់បំផុត នៅពេលលោកជួបនិយាយពីរឿងនេះជាមួយ មេដឹកនាំប្រទេសសមាជិកអូតង់ នៅក្នុងកិច្ចប្រជុំថ្ងៃនេះ។
អូតង់យល់ព្រមចូលរួមក្នុងសម្ព័ន្ធអន្តរជាតិប្រយុទ្ធប្រឆាំងនឹងក្រុមជីហាត អង្គការរដ្ឋអ៊ីស្លាម
នៅថ្ងៃពុធ គឺនៅ៤ថ្ងៃ ក្រោយភេរវកម្ម សម្លាប់មនុស្ស២២នាក់ នៅទីក្រុងManchester រដ្ឋមន្រ្តីការបរទេសរបស់ប្រទេសសមាជិកទាំង២៨របស់អូតង់បានសម្រេចព្រមព្រៀងឲ្យអូតង់ចូលរួមជាមួយសម្ព័ន្ធអន្តរជាតិ ដែលដឹកនាំដោយអាមេរិក ដើម្បីប្រយុទ្ធប្រឆាំងនឹងក្រុមជីហាតអង្គការរដ្ឋអ៊ីស្លាម នៅស៊ីរី និងនៅអ៊ីរ៉ាក់។ សម្រាប់លោក Jens Stoltenberg អគ្គលេខាធិការរបស់អង្គការអូតង់ ការចូលរួមរបស់អូតង់ក្នុងសម្ព័ន្ធអន្តរជាតិ គឺជាសារនយោបាយសំខាន់ ដែលបញ្ជាក់ពីការរួបរួមគ្នា ដើម្បីប្រឈមនឹងការគំរាមកំហែងរបស់ក្រុមភេរវនិយម។
អាមេរិក និងអង់គ្លេស បានទាមទារ ចង់ឲ្យអូតង់ ចូលរួមជាសមាជិកពេញមុខ នៅក្នុងប្រតិបត្តិការប្រយុទ្ធប្រឆាំងនឹងក្រុមជីហាត អង្គការរដ្ឋអ៊ីស្លាមនៅស៊ីរី និងអ៊ីរ៉ាក់។ ប៉ុន្តែ បារាំងបានចេញមុខប្រឆាំង។
បារាំង អាល្លឺម៉ង់ និងអ៊ីតាលី បានចេញមុខ ជំទាស់នឹងការទាមទាររបស់អង់គ្លេស និង អាមេរិក ដោយសារតែបារាំងខ្លាចបារម្ភថា អន្តរាគមន៍ លូកដៃរបស់អូតង់ ទៅក្នុងប្រតិបត្តិការយោធានៅស៊ីរី និងអ៊ីរ៉ាក់ នឹងអាចបង្កឲ្យមានផលរមាស់ ចលាចល និងអនាធិបតេយ្យ នៅដើមបូព៌ា ដូចដែលអូតង់កំពុងបន្សល់ទុក នៅប្រទេសលីប៊ី។ នេះគេនៅមិនទាន់និយាយពីអាហ្វហ្កានីស្ថាន ដែលអូតង់ ក្រោមការផ្តួចផ្តើមរបស់អាមេរិកបានចូលផុងខ្លួន ទៅក្នុងសង្រ្គាមរ៉ាំរ៉ៃ គ្មានច្រកចេញផង។
តាម អគ្គលេខាធិការរបស់អង្គការអូតង់ ការចូលរួមរបស់អូតង់មានលក្ខណៈ នយោបាយ និងជានិមិត្តរូប ប៉ុន្តែ វាមិនមែនមានន័យថា អូតង់នឹងមិនចូលរួមប្រយុទ្ធ ដោយផ្ទាល់ នៅក្នុងសមរភូមិ នៅប្រទេសស៊ីរី និងអ៊ីរ៉ាក់នោះទេ។ តាមប្រភពមន្រ្តីទូតមួយចំនួន នៅក្នុងប្រតិបត្តិការប្រយុទ្ធប្រឆាំងនឹងក្រុមជីហាត អូតង់នឹងផ្តល់តែជំនួយ ផ្នែកពិគ្រោះយុទ្ធសាស្រ្តយោធា ដែលអូតង់បានបទពិសោធន៍ពីការធ្វើសង្រ្គាមនៅអាហ្វហ្កានីស្ថាន ហើយនិងផ្តល់ព័ត៌មានសម្ងាត់ទៅឲ្យប្រទេសដៃគូ តែប៉ុណ្ណោះ។ ការចូលរួមតែប៉ុណ្ណោះ គឺមិនឆ្លើយតបនឹងការចង់បានរបស់អាមេរិក និងអង់គ្លេស ដែលតាមពិតទៅ ចង់ឲ្យអូតង់បញ្ជូនយន្តហោះAwacsទៅយកការណ៍បន្ថែមនៅស៊ីរី។
សព្វថ្ងៃនេះ ទោះបីជាអូតង់មិនទាន់ចូលដោយផ្ទាល់ក្នុងប្រតិបត្តិការយោធារបស់សម្ព័ន្ធអន្តរជាតិ ដឹកនាំដោយអាមេរិក ប៉ុន្តែ រាល់សមាជិកទាំង២៨របស់អូតង់ គឺបានចូលរួម រៀងៗខ្លួនរួចហើយ ក្នុងក្របខ័ណ្ឌប្រយុទ្ធប្រឆាំងនឹងក្រុមជីហាត ដូចជាបណ្តុះបណ្តាលយោធា អ៊ីរ៉ាក់ ជាដើម។
អូតង់ចង់ធ្វើសម្បទានជាមួយលោកដូណាល់ ត្រាំ ដែលនៅមិនទាន់បោះត្រា ទៅលើមាត្រាទី៥នៃសន្ធិសញ្ញាអង្គការអូតង់
សមាជិករបស់អូតង់ ជាពិសេសបារាំងបានប្តូរ ជំហរ ដោយយល់ព្រមឲ្យអូតង់ចូលរួមទាំងស្រុងក្នុងសម្ព័ន្ធអន្តរជាតិដឹកនាំដោយអាមេរិក ទៅតាមការចង់បានរបស់លោកដូណាល់ ត្រាំ ដោយសារតែអូតង់ចង់ធ្វើសម្បទាន ជាថ្នូរនឹងការបញ្ជាក់ជំហររបស់អាមេរិក នៅលើមាត្រាទី ៥នៃសន្ធិសញ្ញាអង្គការអូតង់។ មាត្រានេះនិយាយពីការជួយគ្នាទៅវិញ ទៅមកក្នុងចំណោមប្រទេស សមាជិកអូតង់ នៅក្នុងពេលប្រទេសសមាជិកណាមួយ រងការវាយប្រហារ ឬរំលោភឈ្លានពាន ពីប្រទេសខាងក្រៅ។
លោកដូណាល់ ត្រាំ ជាប្រធានាធិបតីអាមេរិកដំបូងបង្អស់ដែលនៅរារែក មិនទាន់និយាយអ្វីពីមាត្រាទី៥ នៃសន្ធិសញ្ញាអូតង់។
អាមេរិកជាប្រទេសតែមួយដំបូងគេ ដែលបានទទួលផលចំណេញពីមាត្រា ទី ៥នេះ នៅក្រោយពេលអាមេរិករងការវាយប្រហារភេរវកម្ម ១១កញ្ញា ២០០១។ ប៉ុន្តែ សព្វថ្ងៃនេះ ប្រទេសសមាជិកអូតង់ នៅអឺរ៉ុប ដែលកំពុងខ្លាចការឈ្លានពានរបស់រុស្ស៊ី នៅក្រោយរុស្ស៊ី កាត់យកទឹកដីគ្រីមេរបស់អ៊ុយក្រែន បារម្ភខ្លាចថា អាមេរិករបស់លោកដូណាល់ ត្រាំ នឹងឈរឱបដៃ មិនជួយអន្តរាគមន៍ ការពារពួកគេ នៅពេលមានការវាយប្រហារ ឈ្លានពាន ពីសត្រូវពីខាងក្រៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ