ស៊ីរី៖ ម៉ូស្គូថាធ្លាប់បានស្នើឲ្យក្រុមឧទ្ទាមជម្លៀសខ្លួនចេញពីហ្គូតាតែពួកគេមិនព្រមចេញ
រុស្ស៊ី បានអះអាងថ្ងៃព្រហស្បតិ៍ម្សិលមិញថា បានស្នើដោយមិនសម្រេចដូចចិត្ត អោយពួកឧទ្ទាម ដែលច្បាំងនៅតំបន់ហ្គូតាខាងកើត ជម្លៀសចេញពីដែនអំណាចខ្លួននេះទៅ ដែលស្ថិតនៅជិតរដ្ឋធានីស៊ីរី ប៉ុន្តែដែលតាំងពីថ្ងៃអាទិត្យមក បន្តរងការវាយប្រហារ ពីខាងកងទ័ពរដ្ឋាភិបាលស៊ីរី បណ្តាលឲ្យអ្នកស្រុក នៅ តំបន់នោះ ធ្លាក់ខ្លួនស្លាប់រាប់រយនាក់ និងរបួសជាងមួយពាន់នាក់ទៅហើយ។
ចុះផ្សាយនៅថ្ងៃ៖ កែប្រែថ្ងៃទី៖
“ ប៉ុន្មានថ្ងៃមុន ពួកយោធាយើងដែលឈរជើងនៅស៊ីរី បានស្នើទៅពួកឧទ្ទាមច្បាំងនៅ តំបន់ហ្គូតា ខាងកើត ឲ្យដកខ្លួនដោយសន្តិវិធីចេញពីទីនោះទៅ ដូចករណីចាត់ចែងជម្លៀសពួកគេ និង គ្រួសារគេ ចេញ ពី ភាគខាងកើតក្រុង អាឡេប កាលពីឆ្នាំ ២០១៦ អញ្ចឹង” - សេចក្តីនេះ ថ្លែងថ្ងៃ ២២ កុម្ភៈ ដោយ រដ្ឋមន្ត្រី ការបរទេសរុស្ស៊ីលោក ស៊ែរហ្គៃ ឡាវ្រ៉ូវ ក្នុងសន្និសីទកាសែត នៅក្រុង Belgrad រួមជាមួយ សមភាគីស៊ែរប៊ី។ ប៉ុន្តែ តាមសំដីលោក ឡាវ្រ៉ូវ សំណើនេះរបស់រុស្ស៊ី ត្រូវបានច្រានចោលដាច់អហង្ការ ដោយ “ រណសិរ្ស អាល់ ណូស្រា “ និងពួកសម្ព័ន្ធមិត្រគេ ដែលបន្តបាញ់ផ្លោងចេញពីទីតាំងនានារបស់គេ ទៅលើទីក្រុង ដោយក្តោប ក្តាប់ បណ្តាជនស៊ីវិលនៅតំបន់ហ្គូតាខាងកើត ធ្វើជាខែលមនុស្ស ការពារពួកវា។
មិនតែប៉ុណ្ណោះ លោក ឡាវ្រ៉ូវ បានឲ្យដឹងថា រុស្ស៊ីត្រៀមពិនិត្យមើល គម្រោងនៃសេចក្តីសម្រេច ក្រុមប្រឹក្សា សន្តិសុខអង្គការសហប្រជាជាតិ ដែលទាមទារឲ្យមានការឈប់បាញ់រយៈពេល ៣០ ថ្ងៃ នៅស៊ីរី ហើយ ត្រៀមពិនិត្យមើលនេះ លុះណាតែ ក្នុង ល័ក្ខខ័ណ្ឌ ដែលបទឈប់បាញ់នេះ មិនសាយភាយទៅលើ អង្គការភេរវនិយម ”រដ្ឋអ៊ីស្លាម” , រណសិរ្ស អាល់ ណូស្រា " និង គ្នីគ្នាពួកនោះឡើយ។
អត្ថបទសេចក្តីសម្រេចនោះ ដែលតាក់តែងឡើង ដោយស៊ុយអែដ និង កូវ៉ែត ត្រូវទទួលការអារកាត់ ដោយ ក្រុមប្រឹក្សាសន្តិសុខ អសប នៅថ្ងៃព្រហស្បតិ៍ ម៉ោងក្រុងញីវ យ៉ក ហើយដែលខ្លឹមសារវា គឺអនុញ្ញាត ឲ្យដឹក ជំនួយមនុស្សធម៌ ទៅផ្គត់ផ្គង់ដល់បណ្តាជនស៊ីវិល ជាប់កុន ក្នងតំបន់ហ្គូតាខាងកើត និង ជម្លៀសចេញពី តំបន់នេះ អ្នកស្រុកណាដែលចាំបាច់ត្រូវទទួលគិលានសង្គ្រោះ។
ការវាយប្រហារយ៉ាងខ្លាំងក្លា តាំងពីថ្ងៃ អាទិត្យមក ពីខាងកងទពរដ្ឋាភិបាលស៊ីរី ទៅលើតំបន់ហ្អូតាខាងកើត បានបណ្តាលឲ្យជនស៊ីវិល ស្លាប់យ៉ាងហោចណាស់អស់ ៣៣៥ នាក់ និង របួសជាង ១.៧០០ នាក់ - តួ លេខនេះបូកសរុបដោយ អង្គការស៊ីរីខាងតាមដានអំពីការគោរពសិទ្ធិមនុស្ស ហៅកាត់ថា OSDH ដែល មានទីស្នាក់ការ នៅក្រុង ឡុងដ្រ៏។ អង្គការនេះ សន្និដ្ឋានថា បើគិតក្នុងអំឡុងពេលជិត ៧ ឆ្នាំ ដែល សង្គ្រាម ពន្យារទៅនៅស៊ីរី ប្រតិបត្តិការទ័ពអាកាសស៊ីរី លើកនេះ គឺពាំនាំជាការខ្ទេចខ្ទាំបំផុត ដល់ តំបន់ហ្គូតា ខាងកើត ដែលរស់នៅដោយបណ្តាជនស៊ីវិល ៤ សែននាក់ ឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ