រុស្ស៊ីប្រកាសពីបំណងចង់សាងសង់ស្ថានីយអវកាសថ្មីជាមួយក្រុមហ៊ុនអាមេរិកណាហ្សា
នៅថ្ងៃសៅរ៍ ទី២៨ មីនា ប្រទេសរុស្ស៊ីបានប្រកាសឲ្យដឹងពីបំណងរបស់ខ្លួនចង់សាងសង់ស្ថានីយអវកាសថ្មីដោយសហការណ៍ជាមួយក្រុមហ៊ុនអវកាសណាហ្សា។ បំណងនៃការស្ថានីយអវកាសថ្មីនោះ គឺដើម្បីយកទៅជំនួសស្ថានីយអវកាសអន្តរជាតិ ISS ដែលត្រូវបញ្ចប់បេសកកម្មនៅឆ្នំា ២០២៤។ គួររម្លឹកជូនថា ស្ថានីយអវកាសអន្តរជាតិ ISS បានបញ្ជូនទៅដាក់ក្នុងគន្លងតារាវិថីតំាងពីឆ្នំា ១៩៩៨ និងដែលរុស្ស៊ី និងអាមេរិកជាអ្នកចាយលុយច្រើនជាងគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ដំណឹងនៃគម្រោងសាងសង់ស្ថានីយអវកាសថ្មីដើម្បីជំនួសស្ថានីយអវកាសអន្តរជាតិ ISS នៅក្រោយឆ្នំា ២០២៤ ត្រូវបានប្រកាសដោយលោកនាយកទីភ្នាក់ងារអវកាសរុស្ស៊ី Igor Komarov និងអាមេរិកំាងលោក Charles Bolden។ យោងតាមលោក Komarov អនាគតស្ថានីយអវកាសថ្មីនឹងត្រូវធ្វើឡើងដោយមានកិច្ចសហប្រតិបត្តិការរវាងក្រុមហ៊ុនអវកាសរុស្ស៊ី Roscomos និងក្រុមហ៊ុនអវកាសអាមេរិកំាង NASA។ លោក Komarov បានបន្ថែមថា លោក និងលោក Bolden បានព្រមព្រៀងគ្នាថា ក្រុមប្រទេសដែលកំពុងមានភាគហ៊ុននៅក្នុងស្ថានីយអវកាសអន្តរជាតិ ISS បច្ចុប្បន្ន និងបណ្តាប្រទេសថ្មីក៏អាចដាក់បេក្ខភាពចូលរួមនៅក្នុងគម្រោងសាងសង់ស្ថានីយអវកាសថ្មីនាពេលខាងមុខដែរ។
ថ្មីៗនេះ រុស្ស៊ី និងណាហ្សាបានឯកភាពគ្នាក្នុងការបន្តចំណាយធ្វើអាជីវកម្មលើស្ថានីយអវកាសអន្តរជាតិ ISS រហូតដល់ឆ្នំា ២០២៤។ តែលោក Komarov បានបញ្ជាក់ថា ក្រុមហ៊ុនអវកាសរុស្ស៊ី Roscomos និងក្រុមហ៊ុនអវកាសអាមេរិកំាង NASA ក៏មិនបានទាត់ចោលពីគម្រោងបន្តជីវិតស្ថានីយអវកាសអន្តរជាតិ ISS នៅក្រោយឆ្នំា ២០២៤ ដែរ។ គួរជម្រាបជូនថានាពេលកន្លងមក រុស្ស៊ីធ្លាប់បានគំរាមដកខ្លួនចេញពីការរួមសហការណ៍នៅក្នុងស្ថានីយអវកាសអន្តរជាតិចាប់ពីឆ្នំា ២០២០ ដោយបែរទៅសាងសង់ស្ថានីយអវកាសដាច់ដោយឡែករបស់ខ្លួនវិញ។ តែលោក Dmitri Rogozine ឧបនាយករដ្ឋមន្រ្តីរុស្ស៊ីទទួលបន្ទុកសំណុំរឿងអវកាសបានបញ្ចេញប្រតិកម្មដោយមានការប្រយ័ត្នប្រយែងជាងលោក Komarov។
លោក Rogozine បានអះអាងថា រដ្ឋាភិបាលក្រុងម៉ូស្គូនឹងធ្វើការសិក្សាលើលទ្ធផលនៃការចរចារវាងក្រុមហ៊ុនអវកាសរុស្ស៊ី Roscomos និងក្រុមហ៊ុនអវកាសអាមេរិកំាង NASA ឲ្យល្អិតជាមុនសិន មុននឹងសម្រេចចិត្តនៅពេលក្រោយ។ ក្រុមអ្នកវិភាគបានមើលឃើញថា បើគេពិនិត្យមើលលើស្ថានការណ៍ដែលកំពុងកើតមាននៅអ៊ុយក្រែនសព្វថ្ងៃ កិច្ចសហប្រតិបត្តិការរវាងអាមេរិក និងរុស្ស៊ីក្នុងការសាងសង់ស្ថានីយអវកាសថ្មីហាក់ដូចជាពិបាកបន្តិច។ តែគេក៏ត្រូវហ៊ានទទួលស្គាល់ថា មានតែក្នុងវិស័យអវកាសមួយទេដែលរុស្ស៊ី និងអាមេរិករួមសហការណ៍គ្នាបានល្អណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ