កម្មកររោងចក្រស្តារឡៃស៍ ត្រៀមចេញតវ៉ាទៀត បើថៅកែមិនដោះស្រាយវិវាទការងារដែលនៅសេសសល់
កម្មកររោងចក្រកាត់ដេរស្តារឡៃស៍អឹភៃរឹលអះអាងថា ពួកគេនឹងរក្សាជំហរតវ៉ា ដរាបណាភាគីរោងចក្រចេញមកដោះស្រាយវិវាទការងារ និងយល់ព្រមដកតំណែងអ្នកគ្រប់គ្រងបច្ចុប្បន្នចេញ។ ការអះអាងបែបនេះ ធ្វើឡើងបន្ទាប់ពីថៅកែក្រុមហ៊ុនបានព្យូរ និងបញ្ឈប់ការងាររបស់កម្មករនិយោជិកជាង៣០០នាក់ និងបានបដិសេធការដកអ្នកគ្រប់គ្រងរោងចក្រតាមការទាមទាររបស់កម្មករ។ បើតាមក្រុមកម្មករ ដើម្បីបញ្ចប់វិវាទការងារនេះបានឆាប់ ល្គិកណាភាគីរោងចក្រយល់ព្រមនូវការទាមទារចំណុចខាងលើ។
ចុះផ្សាយនៅថ្ងៃ៖
ស្តាប់ - ០២:៤៤
វិវាទការងាររបស់កម្មកររោងចក្រកាត់ដេរ ស្តារឡៃស៍អឹភែរឹល (Starlight Apparel) បានអូសបន្លាយពេលជិតមួយខែ បន្ទាប់ពីភាគីរោងចក្របានព្យូរ និងបញ្ឈប់ការងាររបស់កម្មករជាង៣០០នាក់ ដោយមិនបានទូទាត់ប្រាក់កិច្ចសន្យាការងារឱ្យបានត្រឹមត្រូវ។ អ្នកស្រី អិន គឹមលាង ជាកម្មកររោងចក្រស្តារឡៃស៍បានបញ្ជាក់មកវិទ្យុបារាំងអន្តរជាតិRFIថា បច្ចុប្បន្នកម្មករបានវិលចូលធ្វើការឡើងវិញ និងរង់ចាំការដំណោះស្រាយជាមួយថៅកែរោងចក្រ។
នៅទន្ទឹមនឹងការរង់ចាំដំណោះស្រាយ អ្នកស្រី គឹម លាងថា កម្មករនៅបន្តទាមទារនូវលក្ខខណ្ឌមួយចំណុចទៀតដែលនោះគឺ មិនតម្រូវឱ្យភាគីរោងចក្រ ព្យួរការងារស្ត្រីមានផ្ទៃពោះ និងថ្នាក់ដឹកនាំសហជីព ហើយត្រូវដោះស្រាយការទូទាត់ប្រាក់សំណងឱ្យស្របតាមច្បាប់ស្ដីពីការងារ ព្រមទាំងស្នើឱ្យដកប្រធានគ្រប់គ្រងឈ្មោះម៉េង សុជាតិ និងប្រធានរដ្ឋបាលលោក ស៊ុន វាសនាចេញពីការងារ បន្ទាប់ពីអ្នកទាំងពីរបានគេងកម្លាំងពលកម្មរបស់កម្មករ និងគៀបសង្កត់សិទ្ធិកម្មករ។
បើតាមអ្នកស្រី អិន គឹមលាង ប្រសិនបើចំណុចនេះ ភាគីថៅកែមិនយល់ព្រម និងមិនបានដោះស្រាយជូនទេ នោះកម្មករទាំងអស់នឹងបន្តចេញតវ៉ា ហើយនឹងរៀបចំញត្តិដាក់ទៅកាន់ក្រសួងស្ថាប័នពាក់ព័ន្ធបន្តទៀត។
ជុំវិញរឿងនេះ អនុប្រធានសហជីពអំណាចយុវជនកម្ពុជា លោក រស់ សំបូរបានថ្លែងថា ស្ថានភាពវិវាទការងារត្រូវបានដោះស្រាយជាបន្តបន្ទាប់ ខណៈភាគីក្រសួងការងារបានសម្រុះសម្រួលឱ្យតំណាងសហជីព និងតំណាងរោងចក្រ ងាកមកដោះស្រាយគ្នាជាលក្ខណៈផ្ទៃក្នុងនៅចំណុចដែលមិនទាន់ឯកភាព។
ចំណុចដែលមិនទាន់ឯកភាពគ្នានោះ លោក សំបូរបញ្ជាក់ថា គឺការទាមទារឱ្យក្រុមហ៊ុនដកអ្នកគ្រប់គ្រងរោងចក្រ និងប្រធានរដ្ឋបាល ដោយភាគីរោងចក្របដិសេធមិនទទួលយក ហើយខាងក្រសួងតម្រូវឱ្យភាគីទាំងពីរយកមកចរចារបែបផ្ទៃក្នុងវិញ។
បើផ្អែកតាមលទ្ធភាពនៃកិច្ចប្រជុំជាមួយក្រសួងការងារ ភាគីនិយោជកបានយល់ព្រមមិនស្នើសុំព្យូរកិច្ចសន្យាការងារកម្មករក្នុងអំឡុងពេលធ្វើកូដកម្មនោះទេ ហើយភាគីថៅកែសន្យាផ្តល់ប្រាក់រង្វាន់ធ្វើការទៀងទាត់៧ដុល្លារសម្រាប់ខែឧសភា ចំពោះបុគ្គលិកដែលវិលចូលធ្វើការវិញកាលពីថ្ងៃទី១៩ ខែមិថុនា។ ដោយឡែក ការវិលចូលធ្វើការវិញរបស់កម្មករ ក្រុមហ៊ុនអះអាងថា នឹងមិនមានការគុំគួន ឬរើសអើងឡើយ។
នៅចំពោះមុខការបញ្ជាក់ពីភាគីនិយោជក កម្មករព្រួយបារម្ភថា ការលើកឡើងរបស់ថៅកែបានតែមួយពេល ពីព្រោះពួកគេយល់ថា កម្មករដែលបានចេញតវ៉ាជាង៣០០០ពាន់នាក់នាពេលកន្លងមក អាចប្រឈមនឹងការព្យូរកិច្ចសន្យាការងារ។
សូមជម្រាបថា រោងចក្រស្តារឡៃស៍អឹភែរឹលមានទីតាំងស្ថិតនៅក្នុងឃុំវិហារសួគ៌ ស្រុកខ្សាច់កណ្ដាល ខេត្តកណ្ដាល និងមានកម្មករសរុបជាង ៤ពាន់នាក់ ក្នុងនោះជាង ៣០០០នាក់បានវិលធ្វើការវិញ ហើយជាង ៣០០រយនាក់ផ្សេងទៀត ត្រូវបានបញ្ឈប់ពីការងារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ