អារ៉ាប៊ីសាអូឌីត ចូលរួមជាមួយចិននិងរុស្ស៊ី ធ្វើជាប្រទេសដៃគូនៃអង្គការសហប្រតិបត្តិការសៀងហៃ
ផ្អែកតាមការចុះផ្សាយ កាលពីថ្ងៃពុធម្សិលមិញ របស់ទីភ្នាក់ងារព័ត៌មានផ្លូវការអារ៉ាប៊ីសាអូឌីត គឺអារ៉ាប៊ីសាអូឌីតដែលជាប្រទេសសម្ព័ន្ធមិត្តរបស់អាមេរិកនោះ នឹងចូលរួមធ្វើជាប្រទេសដៃគូសន្ទនា នៅក្នុងអង្គការសហប្រតិបត្តិការសៀងហៃ។ អង្គការនេះ គឺត្រូវបានផ្តួចផ្តើមបង្កើតឡើងដោយចិន និងរុស្ស៊ី។ ដំណឹងនេះ បានមកបញ្ជាក់បន្ថែម អំពីការខិតចូលកៀកគ្នាកាន់តែខ្លាំង រវាងចិននិងអារ៉ាប៊ីសាអូឌីត បន្ទាប់ពីចិន បានធ្វើជាអាជ្ញាកណ្តាល ជួយផ្សារភ្ជាប់ទំនាក់ទំនងឡើងវិញ រវាងអារ៉ាប៊ីសាអូឌីត និងអ៊ីរ៉ង់។
ចុះផ្សាយនៅថ្ងៃ៖
ស្តាប់ - ០២:០៨
អង្គការសហប្រតិបត្តិការសៀងហៃ ហៅកាត់ថា OCS បានចាប់បដិសន្ធិឡើងនៅឆ្នាំ២០០១ ដោយមានប្រទេសសមាជិកចំនួន៨ គឺ ចិន រុស្ស៊ី ឥណ្ឌា ប៉ាគីស្ថាន កាហ្សាក់ស្ថាន កៀជីគីស្ថាន តាជីគីស្ថាន និងអ៊ូសបេគីស្ថាន។ កម្មវត្ថុនៃអង្គការនេះ គឺដើម្បីពង្រឹងចំណងសហប្រតបត្តិការនយោបាយ សេដ្ឋកិច្ច និងសន្តិសុខ ដោយប្រជែងជាមួយស្ថាប័នអន្តរជាតិផ្សេងៗទៀត ដែលជាទូទៅគឺផ្តួចផ្តើមនិងដឹកនាំឡើងក្រុមប្រទេសលោកខាងលិច។
យោងតាមការចុះផ្សាយរបស់បណ្តាញព័ត៌មានផ្លូវការអារ៉ាប៊ីសាអូឌីត គឺរដ្ឋាភិបាលអារ៉ាប៊ីសាអូឌីត បានសម្រេចយល់ព្រម ចូលរួមធ្វើជាប្រទេស “ដៃគូសន្ទនា” នៅក្នុងអង្គការនេះ បន្ទាប់ពីបានឆ្លងកាត់ការអនុញ្ញាតពីព្រះចៅសាល់ម៉ាន់។
គួរបញ្ជាក់ថា បច្ចុប្បន្ននេះ ប្រទេសដែលមិនមែនជាសមាជិកពេញសិទ្ធិ តែចូលរួមជាប្រទេសសង្កេតការណ៍ ឬប្រទេសដៃគូសន្ទនា គឺមាន អេហ្ស៊ីប កាតា និងអ៊ីរ៉ង់ផងដែរ។ ការប្រកាសរបស់អារ៉ាប៊ីសាអូឌីត ចូលរួមជាមួយអង្គការសហប្រតិបត្តិការសៀងហៃនាពេលនេះ គឺធ្វើឡើង ៣សប្តាហ៍ក្រោយពេលដែលមានការប្រកាសពីកិច្ចព្រមព្រៀងផ្សះផ្សារគ្នាឡើងវិញ រវាងអ៊ីរ៉ង់ និងអារ៉ាប៊ីសាអូឌីត ដែលមានចិនជួយធ្វើជាអាជ្ញាកណ្តាល។
ក្នុងពេលនិយាយទូរស័ព្ទជាមួយលោកស៊ី ជីនពីង កាលពីថ្ងៃអង្គារ ព្រះអង្គម្ចាស់ម៉ូហាម៉េត បេនសាល់ម៉ាន់ បានថ្លែងអបអរសប្បាយចិត្តណាស់ ដែលអ៊ីរ៉ង់និងអារ៉ាប៊ីសាអូឌីតជានាគ្នាវិញ ព្រោះវានឹងជួយដល់ស្ថិរភាពតំបន់ដើមបូព៌ា។ លោកស៊ី ជីនពីងវិញ បានអះអាងថា ការភ្ជាប់ទំនាក់ទំនងឡើងវិញរវាងអារ៉ាប៊ីសាអូឌីត និងអ៊ីរ៉ង់ ដែលមានចិនជាអ្នកជួយនេះ គឺនឹងចូលរួមដើរតួនាទីសំខាន់ នៅក្នុងការពង្រឹងសាមគ្គីភាព និងសហប្រតិបត្តិការក្នុងតំបន់។
គួរកត់សំគាល់ថា វត្តមានចេញមុខចេញមាត់ របស់លោកប្រធានាធិបតីចិន នៅក្នុងការផ្សះផ្សារគ្នា រវាងប្រទេសគូប្រជែងអ៊ីស្លាមទាំង២នេះ បានធ្វើឲ្យមានការតាមដានជាខ្លាំង ពីសំណាក់ក្រុមប្រទេសលោកខាងលិច ជាពិសេសគឺពីសហរដ្ឋអាមេរិក ខណៈដែលជានិច្ចជាកាលគឺសហរដ្ឋអាមេរិកទេ ដែលជាអ្នកចេញមុខមាត់ចាត់ចែងកិច្ចការ នៅតំបន់ដើមបូព៌ា ហើយអារ៉ាប៊ីសាអូឌីត គឺជាសម្ព័ន្ធមិត្តរបស់អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ