តើសង្គ្រាមអាចនឹងឆេះរាលដាលដែរឬទេ ក្រោយការវាយប្រហាររបស់អ៊ីរ៉ង់ទៅលើអ៊ីស្រាអែល?
គ្រប់គ្នាដឹងយ៉ាងច្បាស់ ថាអ៊ីរ៉ង់និងអ៊ីស្រាអែល គឺជាសត្រូវស៊ីសាច់ហុតឈាមនឹងគ្នា ជាយូរលង់មកហើយ។ តែយ៉ាងណា អ៊ីរ៉ង់មិនដែលប្រើប្រាស់កម្លាំង វាយប្រហារដោយផ្ទាល់ទៅលើអ៊ីស្រាអែលទេ បើគិតចាប់ពីរបបបដិវត្តអ៊ីស្លាមអ៊ីរ៉ង់បានឡើងកាន់អំណាចនៅឆ្នាំ១៩៧៩។ កន្លងមក អ៊ីរ៉ង់បានត្រឹមប្រើប្រាស់កងកម្លាំងដៃជើងរបស់ខ្លួន ដូចជាក្រុមហេសបូឡាលីបង់ ក្រុមហ៊ូទីយេម៉ែន និងក្រុមហាម៉ាសជាដើម ឲ្យវាយប្រហារទៅលើអ៊ីស្រាអែលជំនួសខ្លួន។ តែនៅលើកនេះ វាគឺជាលើកទី១ហើយ ដែលអ៊ីរ៉ង់បញ្ជាដ្រូន និងបាញ់មីស៊ីលចេញពីទឹកដីខ្លួន ឆ្ពោះទៅអ៊ីស្រាអែលដោយផ្ទាល់។ ស្ថិតក្នុងបរិបទដែលកាន់តែតានតឹងខ្លាំងបែបនេះ មានការព្រួយបារម្ភខ្លាំងឡើងអំពីសង្គ្រាមដែលអាចឆេះរាលដាលដោយចំហ រវាងគូសត្រូវទាំង២នេះ។
ចុះផ្សាយនៅថ្ងៃ៖
ស្តាប់ - ០៥:៥២
មានសំណួរជាច្រើន នៅពីក្រោយការសម្រេចចិត្តវាយប្រហាររបស់អ៊ីរ៉ង់ ទៅលើអ៊ីស្រាអែល។ តើអ៊ីរ៉ង់ពិតជាចង់ប្រកាសសង្គ្រាមដោយផ្ទាល់ និងដោយចំហរជាមួយអ៊ីស្រាអែលមែនឬ?
អ៊ីរ៉ង់បញ្ជាដ្រូន និងបាញ់មីស៊ីលដោយផ្ទាល់ទៅអ៊ីស្រាអែល វាគឺជាលើកទី១ពិតមែនហើយ។ តែបើយើងត្រលប់ទៅមើល ប៉ុន្មានថ្ងៃកន្លងមកនេះ យើងឃើញថាធាតុពិតទៅ ការវាយប្រហាររបស់អ៊ីរ៉ង់នេះ មិនបានធ្វើឲ្យគេភ្ញាក់ផ្អើលប៉ុន្មានឡើយ។ កាលពីថ្ងៃទី៣មេសា អាយ៉ាតូឡា អាលីខាមឺណី មគុទេសន៍ដឹកនាំកំពូលនៃរបបអ៊ីស្លាមផ្តាច់ការអ៊ីរ៉ង់ បានស្រែកប្រកាសគំរាមថាអ៊ីរ៉ង់នឹងសងសឹក ពិន័យអ៊ីស្រាអែល ចំពោះទង្វើឧក្រិដ្ឋដែលអ៊ីស្រាអែលបានបាញ់មីស៊ីលកំទេចស្ថានកុងស៊ុលអ៊ីរ៉ង់នៅក្នុងទីក្រុងដាម៉ាស បណ្តាលឲ្យស្លាប់មន្ត្រីទាហានកងឆ្មាំបដិវត្តអ៊ីរ៉ង់ចំនួន៧នាក់។
ជាមួយគ្នានេះដែរ ប៉ុន្មានថ្ងៃមកនេះ ក្រុមមន្ត្រីជំនាញចារកិច្ចមិនថាអាមេរិក បារាំង អង់គ្លេស ឬអ៊ីស្រាអែល សុទ្ធតែបានប្រកាសឲ្យដឹងជាមុនថា អ៊ីរ៉ង់នឹងបើកការវាយប្រហារសងសឹក មកលើអ៊ីស្រាអែលក្នុងពេលឆាប់ៗនេះ។ អ៊ីរ៉ង់ហាក់ដូចជាបានប្រកូកប្រកាស ឲ្យគេដឹងឯងដឹងមុន ដើម្បីត្រៀមខ្លួនទប់ទល់នឹងការវាយប្រហារទ្រង់ទ្រាយធំរបស់ខ្លួន។ អ៊ីរ៉ង់បានបើកការវាយប្រហារទ្រង់ទ្រាយធំមិនធ្លាប់មានពិតមែន តែដោយសារតែការបង្ហើបដំណឹងឲ្យគេដឹងមុនបែបនេះ គឺវាហាក់មានន័យថាអ៊ីរ៉ង់មិនចង់ឲ្យអ៊ីស្រាអែលរងគ្រោះខ្លាំង ព្រោះបានបង្ហើបឲ្យត្រៀមខ្លួនទុកមុន។
នៅចំពោះមុខក្រុមប្រឹក្សាសន្តិសុខ លោកអគ្គរដ្ឋទូតអ៊ីរ៉ង់ប្រចាំអង្គការសហប្រជាជាតិ បានលើកឡើងថា ការវាយប្រហាររបស់អ៊ីរ៉ង់ទៅលើអ៊ីស្រាអែល កាលពីយប់ថ្ងៃសៅរ៍ ឈានចូលថ្ងៃអាទិត្យទី១៤មេសា គឺជាការសងសឹកដោយសក្តិសមបំផុត ទៅនឹងទង្វើឧក្រិដ្ឋរបស់អ៊ីស្រាអែល។ មន្ត្រីទូតអ៊ីរ៉ង់ដដែល អះអាងថា ការវាយប្រហាររបស់អ៊ីរ៉ង់គឺជាទង្វើឆ្លើយតបក្នុងន័យការពារខ្លួន ដោយគោរពទៅតាមមាត្រា៥១ នៃកតិកាសញ្ញាអង្គការសហប្រជាជាតិស្តីពីការការពារខ្លួនដោយស្របច្បាប់។ ប្រមាណ៣ម៉ោង ក្រោយអ៊ីរ៉ង់ចាប់ផ្តើមបាញ់គ្រាប់ទៅលើអ៊ីស្រាអែល ប្រធានបេសកកម្មអ៊ីរ៉ង់ប្រចាំអង្គការសហប្រជាជាតិ បានបង្ហោះសារថា “សំណុំរឿងនេះបានចប់សព្វគ្រប់ហើយ” ពោលគឺសម្រាប់អ៊ីរ៉ង់ គឺអ៊ីរ៉ង់បានសងសឹកអ៊ីស្រាអែលរួចស្រេចបាច់ហើយ។ បើនិយាយឲ្យងាយស្តាប់ គឺមានន័យថារួចគ្នាត្រឹមនេះ។
ក្នុងន័យនេះ វាហាក់មានន័យថាអ៊ីរ៉ង់គ្មានផែនការណា បន្តវាយប្រហារលើអ៊ីស្រាអែលបន្ថែមទៀតទេ។ តែទន្ទឹមនឹងនេះ ទូតអ៊ីរ៉ង់នៅអង្គការសហប្រជាជាតិ បានប្រកាសគំរាមថា បើថ្ងៃមុខអ៊ីស្រាអែលហ៊ានធ្វើអ្វីខុសឆ្គងទៀត គឺអ៊ីរ៉ង់នឹងពិន័យឲ្យធ្ងន់ជាងនេះទៀត។ បន្ថែមពីនេះ អគ្គមេបញ្ជាការកងទ័ពអ៊ីរ៉ង់ឈ្មោះ Mohammad Bagheri បានលើកឡើងថា គេបានផ្ញើសារទៅកាន់សហរដ្ឋអាមេរិកហើយ ដោយប្រាប់ថា អាមេរិកត្រូវនៅឲ្យឆ្ងាយមិនត្រូវលូកដៃសហការជាមួយអ៊ីស្រាអែលជាដាច់ខាត។
គិតត្រឹមរសៀលថ្ងៃអាទិត្យទី១៤មេសា រដ្ឋាភិបាលអ៊ីស្រាអែលរបស់លោកណេតាន់យ៉ាហ៊ូ មិនទាន់បានប្រកាសអ្វីទាំងអស់ ថាតើអ៊ីស្រាអែលនឹងវាយប្រហារទៅលើអ៊ីរ៉ង់វិញឬយ៉ាងណា? គឺការឆ្លើយតបទៅវិញរបស់អ៊ីស្រាអែលនេះហើយ ដែលអាចកំណត់ថា សង្គ្រាមនឹងឆាបឆេះឬអត់។
លោកចូ បៃដិន បានទូរស័ព្ទនិយាយដោយផ្ទាល់ ជាមួយលោកណេតាន់យ៉ាហ៊ូ កាលពីយប់ថ្ងៃសៅរ៍។ ផ្អែកតាមសេតវិមាន គឺលោកចូ បៃដិន បានបញ្ជាក់ប្រាប់ទៅភាគីអ៊ីស្រាអែល ថាសហរដ្ឋអាមេរិកគាំទ្រអ៊ីស្រាអែលនិងជួយការពារអ៊ីស្រាអែលជានិច្ច។ តែទន្ទឹមគ្នានេះ ផ្អែកតាមការចុះផ្សាយរបស់គេហទំព័រ Axios ដែលស្រង់ប្រភពពីមន្ត្រីសេតវិមាន គឺក្នុងពេលនិយាយទូរស័ព្ទ លោកចូ បៃដិន បានប្រាប់ទៅលោកណេតាន់យ៉ាហ៊ូថា សហរដ្ឋអាមេរិកប្រឆាំងដាច់ខាត មិនឲ្យអ៊ីស្រាអែលវាយប្រហារសងសឹកទៅលើអ៊ីរ៉ង់វិញទេ។
យោងតាមការវិភាគជាច្រើន បានលើកឡើងថា ការពិតអ៊ីរ៉ង់ខ្លួនឯងដឹងយ៉ាងច្បាស់ថា ការវាយប្រហារដោយផ្ទាល់របស់ខ្លួនមកលើទឹកដីអ៊ីស្រាអែល ប្រាកដជារងការថ្កោលទោស ព្រមទាំងទណ្ឌកម្មពីសហគមន៍អន្តរជាតិ។ អ៊ីរ៉ង់ក៏ដឹងដែរ ថាអ៊ីស្រាអែលនឹងសងសឹកវិញ ក្នុងរូបភាពណាមួយ។ ដូច្នេះហើយទើបអ៊ីរ៉ង់បានវាយប្រហារ ទោះទ្រង់ទ្រាយធំក៏ដោយ តែក៏បញ្ចៀសមិនឲ្យអ៊ីស្រាអែលរងគ្រោះខ្លាំង ឬមានស្លាប់ជនស៊ីវីលឡើយ។ ពោលគឺ អ៊ីរ៉ង់ត្រូវបង្ខំចិត្តវាយប្រហារសងសឹកមកលើអ៊ីស្រាអែល ព្រោះពុំនោះទេ សម្តីស្រែកជេរស្រែកគំរាមកន្លងមករបស់ខ្លួនមកលើអ៊ីស្រាអែល វានឹងគ្មានន័យ។ បន្ថែមពីនេះទៀត អ៊ីរ៉ង់ត្រូវធ្វើឲ្យកូនចៅខ្លួននៅក្នុងតំបន់ ដែលមានដូចជាក្រុមហេសបូឡា និងក្រុមហ៊ូទីជាដើម មានការជឿជាក់ថាខ្លួនហានថាគឺហានធ្វើ។
ធាតុពិតទៅ របបផ្តាច់ការអ៊ីរ៉ង់ គ្មានហេតុផលអ្វីទៅធ្វើឲ្យសង្គ្រាមឆាបឆេះពេញតំបន់ឡើយ ព្រោះថាអនាគតនៃរបបខ្លួន អាចនឹងរង្គោះរង្គើដួលរលំ។ អ៊ីរ៉ង់ស្រែកក្តែងៗ តែអ៊ីរ៉ង់ទំនងជាមិនឆោត ទៅធ្វើសង្គ្រាមដោយចំហជាមួយអ៊ីស្រាអែលនោះទេ។ អ៊ីរ៉ង់ដឹងថាកម្លាំងសព្វាវុធទំនើបរបស់អ៊ីស្រាអែលខ្លាំងជាងខ្លួន ហើយជាងនេះទៀត អ៊ីស្រាអែលអាចនឹងបានជំនួយ ពីមហាអំណាចលោកខាងលិច ព្រមទាំងប្រទេសអារ៉ាប់ខ្លះផង ដែលជាគូប្រជែងរបស់អ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ