អ៊ីរ៉ង់ដាក់កាមេរ៉ានៅតាមទីសាធារណៈដើម្បីតាមដានចាប់ស្រ្តីណាដែលមិនទទូរស្បៃលើក្បាល
អាជ្ញាធរអ៊ីរ៉ង់បង្កើនការរឹតបន្តឹងការអនុវត្តច្បាប់អ៊ីស្លាម នៅក្នុងប្រទេស។ នៅថ្ងៃសៅរ៍ទី ៨មេសា ប៉ូលិសអ៊ីរ៉ង់បានចេញសេចក្តីប្រកាសស្តីពីការបំពាក់កាមេរ៉ានៅតាមទីសាធារណៈ និងនៅតាមផ្លូវដំណើរដើម្បីតាមដាន កំណត់អត្តសញ្ញាណស្រ្តីណាដែលមិនទទូរក្រណាត់ ឬស្លៀកពាក់ មិនត្រឹមត្រូវតាមច្បាប់សាសនាអ៊ីស្លាម។ នៅក្នុងសេចក្តីថ្លែងការណ៍ដាច់ដោយឡែក កាលពីថ្ងៃទី ៣០មីនា រដ្ឋមន្រ្តីក្រសួងមហាផ្ទៃអ៊ីរ៉ង់បានអំពាវនាវឲ្យមហាជនអ៊ីរ៉ង់ រករឿង ស្តីបន្ទោសស្រ្តីណាដែលមិនទទូរស្បៃលើក្បាល នៅទីសាធារណៈ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៣
អំណើះតទៅ ប៉ូលិសអ៊ីរ៉ង់នឹងប្រើជំនួយកាមេរ៉ា នៅតាមផ្លូវ ដើម្បីតាមដានរកមុខស្រ្តីដែលមិនទទូរក្រណាត់លើក្បាល។ នៅក្នុងសេចក្តីប្រកាសកាលពីថ្ងៃសៅរ៍ ប៉ូលិសអ៊ីរ៉ង់និយាយថា គេនឹងបំពាក់កាមេរ៉ា នៅតាមទីសាធារណៈដើម្បីកំណត់មុខ អត្តសញ្ញាណរបស់ស្រ្តី ដែលស្លៀកពាក់ មិនត្រឹមត្រូវតាមច្បាប់អ៊ីស្លាម។
តាមទីភ្នាក់ងារព័ត៌មាន Mizan ដែលចុះផ្សាយសេចក្តីប្រកាសរបស់ប៉ូលិសអ៊ីរ៉ង់ ស្រ្តីណាដែលកាមេរ៉ាថតចាប់បានថា មិនបានទទូរក្រណាត់លើក្បាល នៅពេលចេញទៅតាមទីសាធារណៈ នឹងទទួលបានរូបថត ភ្ជាប់ជាមួយសារទូរស័ព្ទ ពីប៉ូលិស ដែលព្រមានពីផលវិបាក បើសិន នៅតែមិនព្រមស្លៀកពាក់ត្រឹមត្រូវតាមច្បាប់អ៊ីស្លាម។
តាមសេចក្តីប្រកាស ប៉ូលិសអ៊ីរ៉ង់សម្រេចចិត្តបំពាក់កាមេរ៉ា តាមដាននៅតាមទីសាធារណៈ នៅក្នុងគោលដៅ ទប់ស្កាត់និន្នាការប្រឆាំងច្បាប់អ៊ីស្លាមស្តីពីស្រ្តីទទូរក្រណាត់លើក្បាល។ នៅក្នុងសេចក្តីប្រកាសកាលពីថ្ងៃសៅរ៍ ប៉ូលិសអ៊ីរ៉ង់នៅបានអំពាវនាវគ្រប់ក្រុមហ៊ុន នៅក្នុងប្រទេស គោរព និងតាមដានឲ្យបានម៉ត់ចត់ ការស្លៀកពាក់របស់បុគ្គលិកស្រ្តីដែលស្របតាមច្បាប់អ៊ីស្លាម។
ប៉ូលិសអ៊ីរ៉ង់ប្រកាសបំពាក់កាមេរ៉ា នៅតាមផ្លូវដើម្បីរឹតបន្តឹង ការទទូរក្រណាត់លើក្បាល នៅពេលនេះ គឺបន្ទាប់ពីរូបវីដេអូជាច្រើន ស្តីពីស្រ្តីអ៊ីរ៉ង់ដែលគ្មានក្រណាត់ទទូរលើក្បាល ហើយកំពុងតវ៉ាប្រឆាំងនឹងប៉ូលិសសីលធម៌ ត្រូវគេបង្ហោះផ្សាយពេញបណ្តាញសង្គម។សម្រាប់ប៉ូលិសអ៊ីរ៉ង់ ការក្រាញប្រឆាំងនឹងការពាក់ ទទូរក្រណាត់លើក្បាល កំពុងប៉ះពាល់រូបភាពសាសនារបស់ប្រទេស និងញុះញង់ បង្កបញ្ហាអសន្តិសុខ។
នៅអ៊ីរ៉ង់ ចាប់តាំងផ្ទុះកើតមានព្រឹត្តិការណ៍ បះបោរប្រឆាំងរដ្ឋាភិបាល កាលពីឆ្នាំ មុន ដោយសារមរណភាពរបស់នាង ម៉ាសា អាមីនី ដែលស្លាប់ក្នុងពេលចាប់ខ្លួន របស់ប៉ូលិសសីលធម៌ ស្រ្តីកាន់តែច្រើនបោះបង់ទម្លាប់ទទូរក្រណាត់លើក្បាល។ នៅតាមភោជនីយដ្ឋាន នៅហាងទំនិញ និងនៅតាមទីសាធារណៈ ស្រ្តីអ៊ីរ៉ង់មួយចំនួន លែងទទូរក្រណាត់លើក្បាល បើទោះជាដឹងថា ពួកគេអាចប្រឈមនឹងការចាប់ខ្លួន បង់ពិន័យ ឬការគំរាមកំហែងសន្តិសុខ។
នៅក្នុងសេចក្តីប្រកាសចុងខែមីនា រដ្ឋមន្រ្តីក្រសួងមហាផ្ទៃអ៊ីរ៉ង់អំពាវនាវឲ្យពលរដ្ឋអ៊ីរ៉ង់ រករឿងស្រ្តីណាដែលមិនព្រមទទូរក្រណាត់លើក្បាល។ ការអំពាវនាវរបស់រដ្ឋមន្រ្តីមហាផ្ទៃអ៊ីរ៉ង់មានប្រសិទ្ធិភាព ព្រោះថា នៅសប្តាហ៍មុន វីដេអូនៅលើបណ្តាញសង្គមបង្ហាញបុរសម្នាក់ជះទឹកដោះគោរជូទៅលើស្រ្តីម្នាក់ដែលមិនពាក់ទទូរក្រណាត់លើក្បាលនៅក្នុងហាងទំនិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ