អ៊ីរ៉ង់វាយអ៊ីស្រាអែល៖ សហគមន៍អន្តរជាតិថ្កោលទោសអ៊ីរ៉ង់ និងព្រួយបារម្ភអំពីសង្គ្រាមឆេះរាលដាល
យប់ថ្ងៃសៅរ៍ឈានចូលថ្ងៃអាទិត្យទី១៤មេសា អ៊ីរ៉ង់បានបើកការវាយប្រហារទ្រង់ទ្រាយធំ ដោយផ្ទាល់និងជាលើកទី១ មកលើអ៊ីស្រាអែល។ ជាការវាយប្រហារ ដែលអ៊ីរ៉ង់អះអាងថាជាការសងសិក ចំពោះ “ទង្វើឧក្រិដ្ឋ” របស់អ៊ីស្រាអែល ដែលបានបាញ់មីស៊ីលទៅលើស្ថានកុងស៊ុលអ៊ីរ៉ង់នៅក្រុងដាម៉ាស កាលពីខែមីនា។ យ៉ាងណាក៏ដោយ ការវាយប្រហាររបស់អ៊ីរ៉ង់ទៅលើអ៊ីស្រាអែលនាពេលនេះ ត្រូវបានសហគមន៍អន្តរជាតិថ្កោលទោស និងថ្លែងការព្រួយបារម្ភជាខ្លាំង ថាអ៊ីរ៉ង់កំពុងប្រលែងលេងនឹងភ្លើងសង្គ្រាមដ៏គ្រោះថ្នាក់ ដែលអាចឆេះរាលដាលទូទាំងតំបន់ដើមបូព៌ា។
ចុះផ្សាយនៅថ្ងៃ៖
ស្តាប់ - ០៣:៣៣
ក្រុមប្រឹក្សាសន្តិសុខនៃអង្គការសហប្រជាជាតិ បានកោះប្រជុំបន្ទាន់ប៉ុន្មានម៉ោងក្រោយដឹងដំណឹង អំពីការវាយប្រហាររបស់អ៊ីរ៉ង់ មកលើអ៊ីស្រាអែល។ លោកអង់តូនីញូ ហ្គូតទែរស៍ បានថ្កោលទោសការវាយប្រហារនេះ ថាជាការបញ្ឆេះសង្គ្រាមដ៏គ្រោះថ្នាក់ និងបានអំពាវនាវឲ្យបញ្ឈប់សកម្មភាពរករឿងគ្នានេះជាបន្ទាន់។ លោកអគ្គលេខាធិការអង្គការសហប្រជាជាតិ បានលើកឡើងអំពីការព្រួយបារម្ភដ៏ធំ ទាក់ទិនការឆេះរាលដាលភ្លើងសង្គ្រាម ទូទាំងតំបន់ដើមបូព៌ា ហើយលោកសូមឲ្យគ្រប់ភាគី ត្រូវខាំមាត់អត់ធ្មត់ ដើម្បីបញ្ចៀសបញ្ហាគ្រោះមហន្តរាយសង្គ្រាមនេះ។
ថ្នាក់ដឹកនាំក្រុមប្រទេសសេដ្ឋកិច្ចនាំមុខ G7 បានជួបប្រជុំគ្នាជាបន្ទាន់ដែរ តាមប្រព័ន្ធវីដេអូខុនហ្វឺរិនស៍ ភ្លាមៗក្រោយបានដំណឹង។ លោកចូ បៃដិន ដែលកំពុងសម្រាកនៅរដ្ឋ Delaware បានប្រញេបប្រញាប់ត្រលប់មកសេតវិមានវិញភ្លាម ដើម្បីប្រជុំបន្ទាន់ជាមួយមន្ត្រីជំនាញសន្តិសុខ កាលពីយប់ថ្ងៃសៅរ៍ទី១៣មេសា។ ក្នុងសារបង្ហោះលើបណ្តាញសង្គមX លោកចូ បៃដិន បានចាត់ទុកការវាយប្រហាររបស់អ៊ីរ៉ង់មកលើអ៊ីស្រាអែល ថាជាទង្វើដ៏គួរឲ្យខ្មាសអៀន។ ជាមួយគ្នានេះ លោកប្រធានាធិបតីអាមេរិក បានអះអាងជាថ្មី អំពីការគាំទ្រដ៏រឹងមាំរបស់អាមេរិកចំពោះអ៊ីស្រាអែល ដោយកងទ័ពអាមេរិកបានចូលរួម “បាញ់ស្ទាក់បានសឹងតែទាំងស្រុង” នូវមីស៊ីលនិងដ្រូនរបស់អ៊ីរ៉ង់។
ពីខាងអឺរ៉ុបវិញ ប្រតិកម្មក៏មិនខុសគ្នាដែរ ដោយគេបានថ្លែងការព្រួយបារម្ភខ្លាំងបំផុត ស្តីពីសង្គ្រាមឆាបឆេះរាលដាលពេញតំបន់ដើមបូព៌ា នៅក្រោយការវាយប្រហារទ្រង់ទ្រាយធំនិងជាលើកទីមួយរបស់អ៊ីរ៉ង់ មកលើអ៊ីស្រាអែលនាពេលនេះ។ ទាំងបារាំង អង់គ្លេស និងអាល្លឺម៉ង់ សុទ្ធតែបានផ្ញើសារប្រកាសបញ្ជាក់ អំពីគោលជំហរគាំទ្រដ៏រឹងមាំចំពោះអ៊ីស្រាអែល។ លោកម៉ាក្រុង ប្រធានាធិបតីបារាំង បានសរសេរលើបណ្តាញសង្គមX ដោយថ្កោលទោសការវាយប្រហារ និងបានអំពាវនាវឲ្យភាគីទាំងសងខាង អត់ធ្មត់ដកថយរៀងខ្លួន ដើម្បីកុំឲ្យផ្ទុះសង្គ្រាម។ លោក Josep Borrell ប្រមុខការទូតអឺរ៉ុបបានថ្លែងថា ទង្វើរបស់អ៊ីរ៉ង់នៅពេលនេះ គឺជាទង្វើគ្មានការទទួលខុសត្រូវ និងគំរាមយ៉ាងខ្លាំងមកលើសន្តិសុខដំបន់ដើមបូព៌ា។
ដូចគ្នាដែរ អារ៉ាប៊ីសាអូឌីត ដែលជាគូប្រជែងក្នុងតំបន់របស់អ៊ីរ៉ង់ បានថ្លែងអំពាវនាវថាគ្រប់ភាគីត្រូវខាំមាត់អត់ធ្មត់ឲ្យបានខ្លាំងបំផុត ដើម្បីការពារប្រជាជននៅតំបន់ដើមបូព៌ាពីភ្លើងសង្គ្រាម។ នៅក្នុងលិខិតប្រកាស រដ្ឋមន្ត្រីការបរទេសអារ៉ាប៊ីសាអូឌីត បានអំពាវនាវផងដែរថា ក្រុមប្រឹក្សាសន្តិសុខ ត្រូវតែបំពេញតួនាទីនិងកាតព្វកិច្ចខ្លួននៅពេលនេះ នៅក្នុងការរក្សាសន្តិភាពនិងសន្តិសុខអន្តរជាតិ។ មិនខុសពីអារ៉ាប៊ីសាអូឌីត អេហ្ស៊ីបដែលជាមហាអំណាចដ៏ធំមួយទៀតប្រចាំតំបន់ដើមបូព៌ា ប្រាប់ទៅភាគីជម្លោះអ៊ីរ៉ង់-អ៊ីស្រាអែល ត្រូវតែដកថយរៀងៗខ្លួន កុំប្រើកំហឹងទល់កំហល់ឲ្យសោះ។ រដ្ឋមន្ត្រីការបរទេសអេហ្ស៊ីបអះអាងថា ខ្លួនកំពុងតែទាក់ទងនិយាយដោយផ្ទាល់ជាមួយថ្នាក់ដឹកនាំនៃភាគីជម្លោះទាំង២ ដើម្បីបន្ធូបន្ថយស្ថានការណ៍ ចៀសវាងសង្គ្រាមរាលដាលទូទាំងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ