បារាំងនិងអារ៉ាប៊ីសាអ៊ូឌីតបង្ហាញពីជំហររួមចំពោះវិបត្តិស៊ីរី
តំណាងអ.ស.បបានប្រកាសឲ្យដឹងថា កិច្ចចរចាសន្តិភាពនៅស៊ីរីនឹងត្រូវចាប់ផ្តើមបើកធ្វើឡើងវិញ នៅថ្ងៃទី១០មីនាខាងមុខ។ ក៏ប៉ុន្តែ រហូតមកទល់នឹងពេលបច្ចុប្បន្ននេះ ក្រុមឧទ្ទាមស៊ីរីនៅមិនទាន់បានឆ្លើយតបនៅឡើយទេថា តើពួកគេនឹងចូលរួមក្នុងការចរចានេះដែរឬទេ? នៅក្នុងពេលជាមួយគ្នានេះ បារាំង និងអារ៉ាប៊ីសាអ៊ូឌីត បានបង្ហាញពីជំហររួមគ្នា នៅក្នុងដំណោះស្រាយវិបត្តិស៊ីរី ជាពិសេស ទាក់ទងទៅនឹងជោគវាសនារបស់លោកបាស្ហា អាល់អាសាដ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
តើលោកបាស្ហាអាល់អាសាដអាចនៅបន្តកាន់តំណែងតទៅទៀត ឬត្រូវចុះចេញពីតំណែង? តើត្រូវចុះចេញភ្លាមៗ ឬចុះចេញនៅពេលក្រោយ? ទាំងនេះនៅតែជាចំណុចខ្ទាស់ដ៏ធំមួយ នៅក្នុងកិច្ចចរចាស្វែងរកដំណោះស្រាយបញ្ចប់សង្រ្គាមស៊ីវិលស៊ីរី។ កិច្ចចរចាដែលត្រូវជាប់គាំងតាំងពីឆ្នាំ២០១៤មក។
នៅក្រោយជំនួបនៅទីក្រុងប៉ារីស កាលពីថ្ងៃសៅរ៍ម្សិលមិញ រដ្ឋមន្រ្តីក្រសួងការបរទេសបារាំង និងសមភាគីអារ៉ាប៊ីសាអ៊ូឌីតបានបង្ហាញនូវជំហររួមគ្នា ទាក់ទងនឹងវិបត្តិនៅស៊ីរីនេះ។
ទាក់ទងនឹងជោគវាសនារបស់លោកបាស្ហា អាល់អាសាដ បារាំងនៅតែប្រកាន់ជំហរដដែល គឺលោកអាសាដ ដែលប្រើកម្លាំងទ័ពបាញ់សម្លាប់ប្រជាជនខ្លួនឯង នៅក្នុងចលនាបាតុកម្ម កាលពីឆ្នាំ២០១១ មិនសក្តិសមនៅធ្វើជាមេដឹកនាំស៊ិរីតទៅទៀតនោះទេ។ ក៏ប៉ុន្តែ ក្នុងពេលជាមួយគ្នា បារាំងក៏បានបញ្ជាក់ផងដែរថា គេក៏មិនចាំបាច់ទាមទារថា លោកអាសាដត្រូវតែចុះចេញពីតំណែងភ្លាមៗឥឡូវនេះនោះដែរ គឺអាចចុះចេញនៅពេលក្រោយ។
ប្រមុខការទូតអារ៉ាប៊ីសាអ៊ូឌីតវិញ ដែលជាប្រទេសគាំទ្រក្រុមឧទ្ទាមស៊ីរី បានបញ្ជាក់លម្អិតថា លោកអាសាដត្រូវតែចុះចេញពីតំណែង នៅពេលណាដែលការចរចាសម្រេចបានជាកិច្ចព្រមព្រៀង ហើយក្រោយពីរដ្ឋាភិបាលអន្តរកាលមួយត្រូវបានបង្កើតឡើង។
ក៏ប៉ុន្តែ ប្រេសិតពិសេសរបស់អ.ស.បបានឲ្យដឹងថា របៀបវារៈនៃកិច្ចចរចា ដែលត្រូវបើកធ្វើ នៅថ្ងៃទី១០មីនាខាងមុខនេះ មិនមាននិយាយដល់ជោគវាសនារបស់លោកបាស្ហាអាល់អាសាដនោះទេ។ របៀបវារៈសំខាន់ៗមានតែ៣ប៉ុណ្ណោះ គឺការបង្កើតរដ្ឋាភិបាលបណ្តោះអាសន្ន ការតាក់តែងរដ្ឋធម្មនុញ្ញថ្មី និងការរៀបចំបោះឆ្នោតសភា និងប្រធានាធិបតី នៅក្នុងរយៈពេល ១៨ខែ។ ចំពោះជោគវាសនារបស់លោកអាសាដវិញ ប្រេសិតពិសេសរបស់អ.ស.ប បានបញ្ជាក់ថា គេគួរតែទុកឲ្យប្រជាជនស៊ីរីខ្លួនឯងជាអ្នកសម្រេច ដែលនេះគឺជាជំហរមួយស្រដៀងគ្នាទៅនឹងអ្វីដែលលោកប្រធានាធិបតីរុស្ស៊ីតែងតែបានទាមទាររហូតមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ