ឡាវសាងសង់ទំនប់វារីអគ្គិសនីថ្មីលើទន្លេមេគង្គ ទោះបីមានការរិះគន់ពីក្រុមអ្នកការពារបរិស្ថាន
ប្រទេសឡាវនឹងសាងសង់ទំនប់វារីអគ្គិសនីថ្មីមួយទៀតលើដងទន្លេមេគង្គ ទោះបីជាមានការរិះគន់ ទិតៀនវាយប្រហារពីសំណាក់ក្រុមអ្នកបរិស្ថាន និងប្រជាជនរស់ក្នុងតំបន់ក៏ដោយ នេះជាព័ត៌មានចុះផ្សាយដោយ AFP នៅថ្ងៃអង្គារ ទី១២ ឧសភា។ ទំនប់វារីអគ្គិសនីថ្មីនេះនឹងសាងសង់ដោយក្រុមហ៊ុនយក្សចិនឈ្មោះ China Datang Corporation និងត្រូវចំណាយប្រាក់សាងសង់ប្រមាណជាង ២ ០០០លានដុល្លារ។ ក្រុមអ្នកការពារបរិស្ថាន និងប្រជាជនរស់ក្នុងតំបន់បានបារម្ភពីការប៉ះពាល់ដល់បរិស្ថាន និងបរិហារពីការលូកដៃកាន់តែខ្លាំងរបស់ចិនលើការគ្រប់គ្រងទន្លេមេគង្គ។
ចុះផ្សាយនៅថ្ងៃ៖
ស្តាប់ - ០២:៣៨
« សាណាខាម » នេះជាឈ្មោះទំនប់វារីអគ្គិសនីថ្មីស្ថិតចម្ងាយប្រមាណ ១៥០គីឡូម៉ែត្រនៅប៉ែកខាងជើងទីក្រុងវៀងច័ន្ទដែលរដ្ឋាភិបាលឡាវគ្រោងសាងសង់ក្នុងឆ្នាំ ២០២០។ ប្លង់សាងសង់ទំនប់វារីអគ្គិសនីថ្មីមួយនេះត្រូវបានរដ្ឋាភិបាលឡាវបញ្ជូនទៅឲ្យគណៈកម្មការទន្លេមេគង្គ និងទីភ្នាក់ងារអន្តររដ្ឋាភិបាលនៃការគ្រប់គ្រងទន្លេ នេះបើតាមព័ត៌មានចុះផ្សាយដោយ AFP ក្នុងថ្ងៃអង្គារ ទី១២ ឧសភា។ ទំនប់វារីអគ្គិសនីសាណាខាមនឹងត្រូវសាងសង់ដោយក្រុមហ៊ុនយក្សចិនឈ្មោះ China Datang Corporation និងត្រូវចំណាយប្រាក់សាងសង់ប្រមាណជាង ២ ០០០លានដុល្លារ។ តាមគណៈកម្មការទន្លេមេគង្គ សាណាខាមនឹងអាចផលិតថាមពលអគ្គិសនីបាន ៦៨៤មេហ្គាវ៉ាត់នៅពេលដាក់ឲ្យដំណើរការក្នុងឆ្នាំ ២០២៨។
ជាប្រទេសតូចក្រីក្រមួយ ឡាវបានពឹងលើប្រាក់ចំណូលបានមកពីថាលពលវារីអគ្គិសនី។ មហិច្ឆតាក្រុងវៀងច័ន្ទ គឺក្លាយជាធុងអាគុយនៅអាស៊ីអាគ្នេយ៍ដោយសង្ឃឹមនាំចេញថាមពលអគ្គិសនីប្រមាណជា ២០ ០០០មេហ្គាវ៉ាត់ទៅកាន់ប្រទេសជិតខាងពីពេលនេះទៅឆ្នាំ ២០៣០។ គួរបញ្ជាក់ថា សាណាខាមជាទំនប់វារីអគ្គិសនីទី៦ ក្នុងចំណោមទំនប់វារីអគ្គិសនីទាំង ៩ ដែលមាននៅលើទន្លេមេគង្គនៃប្រទេសឡាវ ក្នុងនោះ មានទំនប់វារីអគ្គិសនីចំនួនពីរបានដាក់ឲ្យដំណើរការនាប៉ុន្មានខែកន្លងទៅ ទោះបីជាមានការរិះគន់ពីក្រុមអង្គការបរិស្ថានក៏ដោយ។
ក្រុមអង្គការបរិស្ថានបានព្រួយបារម្ភពីការធ្លាក់ចុះបរិមាណត្រី និងការធ្លាក់ចុះកម្រិតទឹកទន្លេនៅតាមកន្លែង និងបានចង្អុលមុខចិនពីបទបង្ខាំងទឹកទន្លេមេគង្គស្ថិតក្នុងប្រទេសខ្លួន។ បើផ្អែកលើការសិក្សាមួយរបស់ក្រុមហ៊ុនអាមេរិកាំង Eyes on Earth ចេញផ្សាយនាពាក់កណ្តាលខែមេសា ចិនបានខ្ទប់ទឹកទន្លេមេគង្គក្នុងបរិមាណយ៉ាងច្រើនសម្បើមកាលពីឆ្នាំ ២០១៩ ជាមួយនឹងទំនប់វារីអគ្គិសនីចំនួន ១១កន្លែងស្ថិតក្នុងប្រទេសខ្លួន។ តែចិនបានបដិសេធលើការចោទប្រកាន់ដោយធានាពីការធ្វើអ្វីគ្រប់យ៉ាងដែលអាចធ្វើបានដើម្បីធានាពីចរាចរណ៍ទឹកទន្លេមេគង្គសមហេតុផល។
ដោយមិននិយាយចំឈ្មោះប្រទេសណាមួយ លោក Pianporn Deetes មកពីអង្គការក្រៅរដ្ឋាភិបាលឈ្មោះ International River បានគូសបញ្ជាក់ថា ទន្លេមេគង្គដែលមានប្រវែងជិត ៥.០០០ គីឡូម៉ែត្រត្រូវការឲ្យមានការផ្អាកសាង់សង់ទំនប់វារីអគ្គសនីជាបន្ទាន់ និងមិនត្រូវឲ្យមានរចនាសម្ព័ន្ធបំផ្លិចបំផ្លាញណាមួយដែលហុចប្រយោជន៍ឲ្យអ្នកខ្លះ តែបែរជាបានបង្កសេចក្តីវិនាស និងធ្វើឲ្យប៉ះពាល់ដល់ក្រុមសហគមន៍រស់នៅក្នុងតំបន់ទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ