ថៃ ៖ ហ្វេសប៊ុកបិទគណនីរបស់ក្រុមអ្នកប្រជាធិបតេយ្យ តាមបញ្ជារបស់រដ្ឋាភិបាល តែសន្យាទៅតវ៉ា
ហ្វេសប៊ុកនឹងធ្វើការតវ៉ាតាមផ្លូវច្បាប់ ប្រឆាំងនឹងបញ្ជារបស់រដ្ឋាភិបាលថៃ ដែលបង្ខំឱ្យប្រព័ន្ធសង្គមបិទគណនីរបស់ក្រុមអ្នកគាំទ្រចលនាប្រជាធិបតេយ្យ។ ជាគណនីដ៏មានប្រជាប្រិយភាព ឧទ្ទិសដល់ចលនាគាំទ្រលទ្ធិប្រជាធិបតេយ្យដែលកំពុងពុះកញ្ជ្រោលខ្លាំងក្នុងប្រទេសថៃ តាំងពីខែកក្កដាមក ក្នុងទម្រង់ជារលកបាតុកម្មដ៏ធំប្រឆាំងនឹងរដ្ឋាភិបាលផង ប្រឆាំងនឹងរបបរាជានិយមផង។
ចុះផ្សាយនៅថ្ងៃ៖
ស្តាប់ - ០២:២១
ទើបបង្កើតឡើងនៅខែមេសា ឆ្នាំ២០២០ ប្រមូលសមាជិកបានដល់ទៅជាងមួយលាននាក់ គណនីរបស់ក្រុម"Royalist Marketplace" ត្រូវបានក្រុមហ៊ុនហ្វេសប៊ុក សម្រេចចិត្តដោយបង្ខំ បិទខ្ទប់តាំងពីថ្ងៃចន្ទទី ២៤សីហា មក តាមបទបញ្ជារបស់រដ្ឋាភិបាលថៃ។ នេះបើតាមការអះអាងរបស់អ្នកនាំពាក្យហ្វេសប៊ុក ដោយបានពន្យល់បន្ថែមថា សំណើរបស់រដ្ឋាភិបាលថៃ ជាបទបញ្ជាបញ្ច្រាសនឹងច្បាប់អន្តរជាតិ។ ក្រុមហ៊ុនបណ្តាញសង្គមអាមេរិក នឹងខិតខំធ្វើគ្រប់យ៉ាងដើម្បីជួយ និងការពារ ច្បាប់សម្រាប់គ្រប់អ្នកប្រើប្រាស់អ៊ីនធ័រនែតទាំងអស់។ ហ្វេសប៊ុកកំពុងរៀបចំសំណុំបែបបទតវ៉ា ប្រឆាំងនឹងបញ្ជារបស់រដ្ឋាភិបាលក្រុងបាងកកតាមផ្លូវច្បាប់ហើយ។ នេះបើតាមអ្នកនាំពាក្យក្រុមហ៊ុនដដែល។
ទោះបីហ្វេសប៊ុកបានសន្យាធ្វើការតវ៉ាក្តី ក៏សម្រាប់លោក ប៉ាវីន ចាចាវ៉ាល់ប៉ុងប៉ុន សកម្មជនប្រជាធិបតេយ្យថៃកំពុងនិរទេសខ្លួននៅជប៉ុន និងជាអ្នកសម្របសម្រួលគណនី "Royalist Marketplace" ម្នាក់ យល់ថាហ្វេសប៊ុកកំពុងចូលរួមចំណែកជំរុញឱ្យមានភាពផ្តាច់ការនៅប្រទេសថៃ និងទទួលស្គាល់តាកតិចត្រួតត្រាព័ត៌មានរបស់រដ្ឋាភិបាលថៃ។ “ការបិទគណនីនេះជាការរារាំងដំណើរការប្រជាធិបតេយ្យ និងសេរីភាពនៃការបញ្ចេញមតិ នៅថៃ”។ នេះបើតាមលោក ប៉ាវីន ចាចាវ៉ាល់ប៉ុងប៉ុន ដែលបានលម្អិតទៀតថា គណនី ជាវេទិកាជែកអំពីរបបរាជានិយម តួនាទីរបស់រាជានិយម និង ផ្លូវដែលត្រូវធ្វើកំណែទម្រង់។
ជាប្រធានបទដ៏រសើបបំផុតនិងការពារដោយច្បាប់យ៉ាងតឹងតែបំផុតមួយនៅលើពិភពលោក របបរាជានិយមថៃបានប្តូរផ្លាស់ តាំងពីព្រះមហាក្សត្ររ៉ាម៉ាX បានឡើងស្នងរាជបន្តពីបិតានៅឆ្នាំ២០១៦មក។ ព្រះមហាក្សត្រគ្រប់គ្រងទ្រព្យសម្បត្តិដោយផ្ទាល់ និងដាក់កងទ័ពស្ថិតនៅក្រោមបញ្ជាផ្ទាល់ទៀត។ តាំងពីកក្កដាមក តាមគំរូហុងកុង ចលនាប្រជាធិបតេយ្យនិស្សិតបាននាំគ្នាធ្វើបាតុកម្មបរិហាររបបរាជានិយម និងរដ្ឋាភិបាល ដោយទាមទារឱ្យនាយករដ្ឋមន្ត្រីដែលជាអតីតនាយឧត្តមសេនីយ៍យោធា ចុះចេញពីតំណែង រំលាយសភានិងរដ្ឋធម្មនុញ្ញឆ្នាំ២០១៧ដែលផ្តល់អំណាចដ៏មហិមាដល់សមាជិកព្រឹទ្ធសភាតែងតាំងឡើងដោយយោធា។ Anon Numpa មេដឹកនាំចលនាម្នាក់ ត្រូវបានអាជ្ញាធរថៃចាប់ខ្លួនជាថ្មី នៅថ្ងៃអង្គារនេះ ជាគម្រប់លើកទីបី ក្នុងរយៈពេលតែប៉ុន្មានសប្តាហ៍។ តាំងពីផ្ទុះបាតុកម្មមក សកម្មជនប្រជាធិបតេយ្យយ៉ាងហោច១១នាក់ត្រូវបានចាប់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ