APEC៖លោកស៊ី ជីនពីងចង់បញ្ជូលចិនទៅក្នុងកិច្ចព្រមព្រៀងដោះដូរសេរីអន្តរប៉ាស៊ីហ្វិក
ថ្ងៃសុក្រ ទី២០ វិច្ចិកាជាថ្ងៃទី២ នៃជំនួបកំពូល APEC តាមអនឡាញដែលប្រទេសម៉ាឡេស៊ីធ្វើជាម្ចាស់ផ្ទះ។ ប្រធានាធិបតីចិនលោកស៊ី ជីនពីងបានថ្លែងនាឱកាសនោះថា ប្រទេសចិននឹងសិក្សាពីលទ្ធភាពក្នុងការភ្ជាប់ខ្លួនទៅនឹងកិច្ចព្រមព្រៀងភាពជាដៃគូអន្តរប៉ាស៊ីហ្វិកទូលំទូលាយ និងរីកចម្រើនដែលហៅកាត់ជាភាសាអង់គ្លេស CPTPP។ មហិច្ឆិតាថ្មីរបស់លោកស៊ី ជីនពីងបានធ្វើឡើង ក្រោយពីចិនទើបបានចុះហត្ថលេខាលើមហាកិច្ចព្រមព្រៀងពាណិជ្ជកម្មសេរីហៅកាត់ « RCEP » ជាមួយ ១៤ប្រទេស។ កំណត់សម្គាល់មួយទៀតនៅក្នុងជំនួបកំពូល APEC ថ្ងៃទី២ គឺការចូលរួមរបស់ប្រធានាធិបតីអាមេរិកផុតអាណត្តិលោកដូណាល់ ត្រាំ។ លោកត្រាំដែលមិនបានចូលរួមជំនួបកំពូល APEC តាំងពីឆ្នាំ ២០១៧។
ចុះផ្សាយនៅថ្ងៃ៖
ស្តាប់ - ០២:២៨
CPTPPដែលប្រធានាធិបតីចិនចង់ចូលរួមពេលនេះ គឺជាឈ្មោះកិច្ចព្រមព្រៀងថ្មីដែលធ្វើបច្ចុប្បន្នភាពចេញពីសន្ធិសញ្ញាដោះដូរសេរីអន្តរប៉ាស៊ីហ្វិកហៅកាត់ជាភាសាអង់គ្លេស TPP។ ពីដំបូងឡើយ TPP ដែលមានសមាជិក ១២ប្រទេស ក្នុងនោះមានប្រទេសអាស៊ានចំនួន ៤ គឺវៀតណាម សិង្ហបុរី ម៉ាឡេស៊ី និងព្រុយណេ ជាគំនិតផ្តួចផ្តើមរបស់អតីតប្រធានាធិបតីអាមេរិកលោកបារ៉ាក់ អូបាម៉ាដើម្បីប្រឈមទប់នឹងឥទ្ធិពលរបស់ប្រទេសចិននៅអាស៊ី។ តែប្រធានាធិបតីអាមេរិកផុតអាណត្តិបច្ចុប្បន្នលោកដូណាល់ ត្រាំបានដកសហរដ្ឋអាមេរិកចេញពី TPP វិញក្នុងឆ្នាំ ២០១៧។ ទីបំផុត CPTPPបានចុះហត្ថលេខាដោយប្រទេសសមាជិកនៅសល់ទាំង ១១ប្រទេសដោយគ្មានសហរដ្ឋអាមេរិក។
គឺចំពេលអវត្តមានសហរដ្ឋអាមេរិកនៅក្នុង CPTPP ដែលប្រធានាធិបតីចិនលោកស៊ី ជីនពីងចង់ផ្តើមគិតគូរបញ្ចូលចិនទៅក្នុង CPTPP។ ថ្លែងនាឱកាសជំនួបកំពូល APEC ក្នុងថ្ងៃសុក្រ ទី២០ វិច្ឆិកា លោកស៊ីបានអំពាវនាវឲ្យសមាជិក CPTPP ទាំងអស់បន្តការធ្វើសមាហរណកម្មសេដ្ឋកិច្ចតំបន់ និងបង្កើតតំបន់ពាណិជ្ជកម្មសេរីអាស៊ីប៉ាស៊ីហ្វិក។ លោកស៊ីបានថ្លែងធានាថា ចិននឹងពិចារណាចូលរួមយ៉ាងសកម្មជាមួយ CPTPP។ មហិច្ឆិតារបស់លោកស៊ី ជីនពីងចង់ចូលរួមជាមួយ CPTPP ពេលនេះបានធ្វើឡើង មួយសប្តាហ៍ក្រោយពីចិនបានចុះហត្ថលេខាលើមហាកិច្ចព្រមព្រៀងពាណិជ្ជកម្មសេរីហៅកាត់ « RCEP » ជាមួយ ១៤ប្រទេស។
« RCEP » គឺជាកិច្ចព្រមព្រៀងដោះដូរសេរីធំជាងគេក្នុងលោក ព្រោះមានជាប់ពាក់ព័ន្ធនឹងប្រជាជនជាង ២ ០០០លាននាក់ និងមានទំហំផលិតផលសរុបដល់ទៅ ៣០% នៃផលិតផលសរុបក្នុងលោក។ លោកស្រី Deborah Elms អ្នកជំនាញពាណិជ្ជកម្មអន្តរជាតិប្រចាំក្នុងប្រទេសសិង្ហបុរីបានយល់ឃើញថា បើចិនចូលជាសមាជិក CPTPP ប្រទេសផ្សេងទៀតអាចនឹងធ្វើតាមចិនដែរ។ យ៉ាងណាក៏ដោយ គេនៅមិនទាន់ដឹងពីចំណាប់អារម្មណ៍របស់ប្រទេសសមាជិក CPTPP នៅឡើយទេ។ អ្វីដែលគេអាចនិយាយបាន បើចិនក្លាយជាសមាជិករបស់ CPTPP នៅថ្ងៃណាមួយ សហរដ្ឋអាមេរិកបាត់បង់ទាំងកិច្ចព្រមព្រៀងពាណិជ្ជកម្មសេរី « RCEP » និងកិច្ចព្រមព្រៀងភាពជាដៃគូអន្តរប៉ាស៊ីហ្វិកទូលំទូលាយ និងរីកចម្រើន« CPTPP »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ