រដ្ឋាភិបាលអូស្ត្រាលីសងសឹក ដោយលែង ផ្សាយពាណិជ្ជកម្មលើវេទិកាសង្គមរបស់ហ្វេសប៊ុក
ខឹងនឹងក្រុមហ៊ុនហ្វេសប៊ុកដែលបានបិទខ្ទប់ មិនឲ្យគេអាច មើល និងចូលចែករំលែកព័ត៌មាននៅលើបណ្តាញហ្វេសប៊ុក រដ្ឋាភិបាលអូស្តា្រលី បានចាត់វិធានការសងសឹកវិញ ដោយបានសម្រេច មិនជួល ទំព័រផ្សាយពាណិជ្ជកម្មរបស់ហ្វេសប៊ុក សម្រាប់យុទ្ធនាការចាក់វ៉ាក់សាំងបង្ការជំងឺកូវីដ ដែលបានចាប់ផ្តើម កាលពីថ្ងៃអាទិត្យ ទី ២១កុម្ភៈ ២០២១។
ចុះផ្សាយនៅថ្ងៃ៖
ស្តាប់ - ០១:៤៣
រដ្ឋមន្រ្តីសុខាភិបាលអូស្ត្រាលី លោក Greg Hunt បានប្រកាសនៅថ្ងៃចន្ទ ទី ២២កុម្ភៈនេះថា ក្រសួងរបស់លោកបានឈប់ធ្វើយុទ្ធនាការផ្សព្វផ្សាយចាក់វ៉ាក់សាំង នៅតាមបណ្តាញសង្គមហ្វេសប៊ុក ទៀតហើយ។ សម្រាប់យុទ្ធនាការចាក់វ៉ាក់សាំង នៅអូស្ត្រាលី រដ្ឋាភិបាលអូស្ត្រាលី បានវិនិយោគថវិកាប្រមាណ ២០លានដុល្លារ ដើម្បីផ្សព្វផ្សាយ លើកទឹកចិត្ត ប្រជាជនឲ្យចូលរួមទទួលវ៉ាក់សាំង និងដើម្បី ប្រឆាំងព័ត៌មានក្លែងក្លាយ ព័ត៌មានបោកបន្លំ របស់ក្រុមអ្នកប្រឆាំងវ៉ាក់សាំង។ តាមរដ្ឋមន្រ្តី សុខាភិបាលអូស្ត្រាលី ដើម្បី បំផុសបំផុលឲ្យប្រជាជនមកទទួលវ៉ាក់សាំង ក្រសួងនៅបន្តផ្សាយពាណិជ្ជកម្ម តាមមធ្យោបាយផ្សេង ប៉ុន្តែ មិនមែនទំព័រផ្សាយពាណិជ្ជកម្មរបស់ក្រុមហ៊ុនហ្វេសប៊ុក។
ការប្រកាសឈប់ផ្សាយពាណិជ្ជកម្ម របស់ក្រសួងសុខាភិបាលអូស្ត្រាលី នៅលើបណ្តាញហ្វេសប៊ុក ធ្វើឡើង នៅក្រោយ ក្រុមហ៊ុនហ្វេសប៊ុកបានសម្រេចបិទខ្ទប់ មិនឲ្យគេអាចចូល អាន ឬចែករំលែកព័ត៌មានរបស់កាសែតអូស្ត្រាលី នៅលើបណ្តាញសង្គមរបស់ខ្លួន តាំងពីថ្ងៃព្រហស្បតិ៍ ទី ១៨កុម្ភៈ ដើម្បីប្រឆាំងនឹងគម្រោងច្បាប់ថ្មីរបស់រដ្ឋាភិបាល អូស្ត្រាលី ដែលចាប់តម្រូវឲ្យក្រុមហ៊ុនបច្ចេកវិទ្យា ដូចជាហ្វេសប៊ុក ជាដើម បង់លុយឲ្យបណ្តាញសារព័ត៌មាន អូស្ត្រាលី ដែលបានផ្សព្វផ្សាយព័ត៌មានរបស់ពួកគេ នៅលើបណ្តាញហ្វេសប៊ុក។ ផ្ទុយពីហ្វេសប៊ុក ក្រុមហ៊ុនGoogle បានរកឃើញកិច្ចព្រមព្រៀងបង់លុយ ឲ្យក្រុមហ៊ុនសារព័ត៌មានអូស្ត្រាលី ដូចជា News Corp និងកាសែតGuardian ជាដើម។
នៅពេល សេចក្តីព្រាងច្បាប់ស្តីពីការចាប់តម្រូវឲ្យក្រុមហ៊ុនបច្ចេកវិទ្យា បង់ប្រាក់ទៅឲ្យក្រុមហ៊ុនសារព័ត៌មានអូស្ត្រាលី ត្រូវដាក់ទៅឲ្យសភាអូស្ត្រាលី ពិភាក្សា នៅសប្តាហ៍នេះ ក្រុមហ៊ុនហ្វេសប៊ុក បានអះអាងថា ខ្លួនកំពុងពិភាក្សា ជាមួយក្រុមហ៊ុនកាសែត និងរដ្ឋាភិបាលអូស្ត្រាលី ដើម្បី រកច្រកចេញពីជម្លោះលើកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ