កីឡាអូឡាំពិកតូក្យូ ៖ ទស្សនិជនក្នុងស្រុក អាចចូលមើលការប្រកួតបាន តែ...
ការប្រកួតកីឡាអូឡាំពិក ពីថ្ងៃទី ២៣កក្កដា ដល់ថ្ងៃទី ៨ សីហា ២០២១ នៅទីក្រុងតូក្យូ នឹងមិនប្រព្រឹត្តទៅដោយបិទទ្វារទាំងស្រុងឡើយ។ នៅថ្ងៃ ចន្ទទី ២១ មិថុនានេះ គណៈកម្មការរៀបចំកីឡាអូឡាំពិកក្រុងតូក្យូ បានសម្រេចចិត្ត អនុញ្ញាតឱ្យទស្សនិកជនក្នុងស្រុក ចូលមើលការប្រកួតបាន។ ប៉ុន្តែមណ្ឌលប្រកួតនីមួយៗ អាចទទួលទស្សនិកជន ត្រឹមតែ៥០%នៃចំនួនកៅអីសរុប និងយ៉ាងច្រើនបំផុតត្រឹម ១ម៉ឺននាក់។
ចុះផ្សាយនៅថ្ងៃ៖
កាលពីខែមីនា គណៈកម្មការរៀបចំកីឡាអូឡាំពិក បានសម្រេចចិត្ត ហាមឃាត់ជាលើកទីមួយ ក្នុងប្រវត្តិអូឡាំពិក មិនឱ្យទស្សនិកជនបរទេសចូលរួមតាមដានការប្រកួតដោយផ្ទាល់ទេ ព្រោះមានហានិភ័យសុខភាពខ្ពស់ពេក។ ចុះចំពោះទស្សនិកជនក្នុងស្រុកវិញ ?! បន្ទាប់ពីរារែកអស់ជាច្រើនខែ នៅ៣២ថ្ងៃមុនការបើកព្រឹត្តិការណ៍កីឡាអូឡាំពិក អ្នករៀបចំកម្មវិធី និងអាជ្ញាធរជប៉ុនបាន អារកាត់សេចក្តី ព្រមឱ្យទស្សនិកជនក្នុងស្រុកចូលមើលការប្រកួត និងអមដោយលក្ខខណ្ឌមួយចំនួនផង។
ចំនួនទស្សនិកជន ក្នុងកន្លែងប្រកួតមិនត្រូវឱ្យលើសពី១ម៉ឺននាក់ និងមិនត្រូវឱ្យមានច្រើនលើសពាក់កណ្តាល នៃសមត្ថភាពទទួលមនុស្សរបស់មណ្ឌលប្រកួតទេ។
ការប្រកួតអាចនឹងត្រូវធ្វើដោយបិទទ្វារតែម្តងផង ប្រសិនបើការឆ្លងជំងឺកូវីដ១៩ មានសន្ទុះជាថ្មីឡើងវិញនៅជប៉ុន ឬប្រសិនបើស្ថានភាពរាតត្បាតជំរុញឱ្យរដ្ឋាភិបាលប្រកាសដាក់ប្រទេសក្នុងភាពអាសន្នឬចាត់វិធានការប្រឆាំងនឹងកូវីដ១៩ ក្រោយថ្ងៃទី ១២កក្កដា២០២១។ នេះបើតាមការលម្អិតបន្ថែមរបស់គណៈកម្មការរៀបចំកីឡាអូឡាំពិកនៅក្នុងសេចក្តីថ្លែងការណ៍រួម ចេញផ្សាយក្រោយជំនួបប្រជុំ៥ភាគី ដែលរួមមាន ៖ គណៈកម្មការរៀបចំអូឡាំពិកតូក្យូ ២០២០ រដ្ឋាភិបាលជប៉ុន រដ្ឋាភិបាលក្រុងតូក្យូ គណៈកម្មការអូឡាំពិកអន្តរជាតិ និងគណៈកម្មការប៉ារ៉ាឡាំពិកអន្តរជាតិ។
ជំនួបប្រជុំក៏បានចេញសេចក្តីណែនាំបន្ថែម ដល់ទស្សនិកជន ថាត្រូវពាក់ម៉ាស់ជាប់រហូត និងមិនត្រូវនិយាយឮ ឬស្រែកហោកញ្ជៀវទេ នៅពេលទស្សនា។ ត្រូវធ្វើដំណើរត្រង់ ចេញពីផ្ទះទៅកន្លែងប្រកួតនិងត្រលប់ពីកន្លែងប្រកួតទៅផ្ទះវិញ។ វិធានការលម្អិតនៃការចូលទស្សនាការប្រកួត នឹងត្រូវផ្សព្វផ្សាយនៅពីរបីថ្ងៃខាងមុខ។
ទាក់ទងនឹងការចូលរួមមើលកម្មវិធីប្រកួតកីឡាប៉ារ៉ាឡាំពិក ដែលប្រព្រឹត្តតចាប់ពីថ្ងៃ ២៤សីហាដល់ថ្ងៃទី ៥កញ្ញាវិញ គណៈកម្មការនឹងផ្តល់សេចក្តីសម្រេចនៅថ្ងៃ១៦កក្កដា ត្រូវជាមួយសប្តាហ៍មុនការបើកកម្មវិធីកីឡាអូឡាំពិក។
សូមបញ្ជាក់ថាសេចក្តីសម្រេចអនុញ្ញាតឱ្យមានទស្សនិកជនចូលមើលការប្រកួតកីឡាអូឡាំពិកនេះ ផ្ទុយទាំងស្រុងទៅនឹងសេចក្តីណែនាំរបស់អ្នកជំនាញសុខភាព។ កាលពីថ្ងៃទី ១៨ មិថុនា ទឹប្រឹក្សាកូវីដ១៩របស់រដ្ឋាភិបាលជប៉ុនលោក ស្ហ៊ីហ្សេរុ អូមី បានអះអាងថាការប្រកួតកីឡាអូឡាំពិកគួរតែគ្មានទស្សនិកជន ព្រោះនេះជាមធ្យោបាយកាត់បន្ថយការរីកសាយភាយនៃមេរោគកូរ៉ូណាថ្មីដ៏មានប្រសិទ្ធភាពជាងគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ