កីឡាអូឡាំពិកតូក្យូប្រព្រឹត្តទៅបិទទ្វារ ស៊ីហ្កេមនៅវៀតណាមលើកពេលទៅឆ្នាំក្រោយ
ប្រឈមនឹងការស្ទុះឡើងនៃករណីឆ្លងកូវីដ១៩ រដ្ឋាភិបាលជប៉ុនបានសម្រេចចិត្តនៅព្រហស្បតិ៍ទី ៨កក្កដា ដាក់ក្រុងតូក្យូ ក្នុងភាពអាសន្នជាថ្មី ក្នុងអំឡុងពេលនៃការប្រកួតកីឡាអូឡាំពិកតែម្តង។ ទន្ទឹមគ្នានេះដែរ គណៈកម្មការរៀបចំការប្រកួតកីឡាអាស៊ីអាគ្នេយ៍ SEA Games បានប្រកាសលើក កម្មវិធីប្រកួតកីឡាស៊ីហ្កេមលើកទី ៣១ នៅប្រទេសវៀតណាម ទៅធ្វើនៅឆ្នាំ២០២២វិញ។
ចុះផ្សាយនៅថ្ងៃ៖
ស្តាប់ - ០២:១៥
ការប្រកួតកីឡាស៊ីហ្កេមគ្រោងធ្វើ ពីថ្ងៃទី ២១វិច្ឆិកា ដល់ថ្ងៃទី ២ធ្នូ ២០២១ នៅក្រុង ហាណូយ ក្រុងហូជីមិញ និង១០ខេត្តក្រុងផ្សេងទៀតនៃប្រទេសវៀតណាម ទំនងជាមិនអាចប្រព្រឹត្តដូចការគ្រោងទុកទេ។ ដោយហេតុមានការគំរាមកំហែងខ្លាំងពីជំងឺរាតត្បាតកូវីដ១៩ រដ្ឋាភិបាលវៀតណាមសំណូមពរលើកពេលទៅធ្វើនៅខែមេសា ឬឧសភា ឆ្នាំ២០២២វិញ ត្រង់ចន្លោះព្រឹត្តិការណ៍កីឡាអូឡាំពិករដូវរងារក្រុងប៉េកាំង នៅខែកុម្ភៈ២២ និងកីឡា ខំមិនវៀល នៅកក្កដា។ កីឡាស៊ីហ្កេម តែងទាក់ទាញអ្នកចូលរួមប្រមាណជិត២ម៉ឺននាក់ ក្នុងនោះ ៧០០០នាក់ជាអត្តពលិក មកពី១១ប្រទេសនៅតំបន់អាស៊ីអាគ្នេយ៍។
ចំនួនអ្នកវិជ្ជមានកូវីដ១៩យ៉ាងខ្លាំង នារយៈពេលប៉ុន្មានថ្ងៃចុងក្រោយនេះ នៅវៀតណាម។ ជិត ២៣៥០០នាក់ នៅថ្ងៃព្រហស្បតិ៍ទី៨កក្កដា ទល់នឹងប្រមាណ៣០០០នាក់កាលពីខែដើមខែមេសា។ ជាកំរិតដ៏ទាបទេបើប្រៀបទៅនឹងប្រទេសជិតខាង ប៉ុន្តែអត្រាអ្នកទទួលវ៉ាក់សាំងក៏ទាបខ្លាំងជាងបំផុតដែរនៅក្នុងតំបន់។ ហេតុដូច្នេះហើយបានជាអាជ្ញាធរត្រូវមានវិធានការខ្លាំង។
ដើម្បីទប់ស្កាត់ការចម្លង អាជ្ញាធរវៀតណាមបានសម្រេចបិទខ្ទប់ក្រុងហូជីមិញ ចាប់ពីថ្ងៃសុក្រទី ៩កក្កដាសម្រាប់រយៈពេលពីរសប្តាហ៍ និងបានដាក់បម្រាមមិនឱ្យធ្វើដំណើរតាមផ្លូវគោក ពីរដ្ឋធានីទៅកាន់ទាំង១៤ក្រុងផ្សេងនៃប្រទេស។
ដូចគ្នានេះដែរ នៅប្រទេសជប៉ុន នៅពីរសប្តាហ៍មុនការបើកកីឡាអូឡាំពិក រដ្ឋាភិបាលជប៉ុនបានសម្រេចនៅថ្ងៃព្រហស្បតិ៍ទី ៨កក្កដា២០២១ នេះដាក់ក្រុងតូក្យូ ក្នុងភាពអាសន្នជាថ្មីនិងជាលើកទីបួន ពេញមួយអំឡុងពេលប្រកួតកីឡាអូឡាំពិកអន្តរជាតិតែម្តង។ ដាក់ក្រុងក្នុងភាពអាសន្នរបស់ជប៉ុន ថ្វីបើមិនតឹងតែងខ្លាំងដូចបណ្តាប្រទេសដទៃទៅលើពិភពលោក ដោយមានត្រឹមការណែនាំឱ្យលក់គ្រឿងស្រវឹងឬត្រូវឆាប់បិទហាងមែន ប៉ុន្តែគណៈកម្មការរៀបចំកម្មវិធីអូឡាំពិកត្រូវធ្វើសេចក្តីដ៏លំបាកខ្លាំងមួយទៀត ការប្រកួតត្រូវប្រព្រឹត្តដោយបិទទ្វារ គ្មានទស្សនិកជនចូលរួមសោះ មិនមែនឱ្យចូលកន្លះសាលដូចសេចក្តីសម្រេចកាលពីថ្ងៃទី២១មិថុនា២០២១ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ