ចិនចាត់វិធានការថ្មីប្រឆាំងក្រុមហ៊ុនបង្រៀនសិស្សក្រៅម៉ោង
បន្ទាប់ពីរឹងបន្តឹងវិស័យបច្ចេកវិទ្យា អាជ្ញាធរចិនចាប់ផ្តើមងាកមកមួលខ្ចៅវិស័យអប់រំម្តង។ នៅថ្ងៃចន្ទទី ២៦កកក្កដានេះ ទីផ្សារភាគហ៊ុនរបស់សាលាឯកជនបានធ្លាក់ថ្លៃយ៉ាងខ្លាំង ដោយរដ្ឋាភិបាលកុម្មុយនិស្តចិនបានដាក់វិធានការថ្មី តម្រូវឱ្យក្រុមហ៊ុនបើកបង្រៀនសិស្សក្រៅម៉ោង ត្រូវចុះឈ្មោះក្នុងបញ្ជី ដូចសមាគមនានាដែលបង្កើតឡើងដោយគ្មានបំណងរកប្រាក់កម្រៃ។ ហេតុអ្វីបានជាចិនសម្រេចធ្វើយ៉ាងដូច្នេះ ?
ចុះផ្សាយនៅថ្ងៃ៖
ឪពុកម្តាយចិន មានទម្លាប់និងមិនខ្លាចនឹងចំណាយថវិកាជួលគ្រូមកបង្រៀនកូនបន្ថែមឡើយ ដើម្បីឱ្យបានពិន្ទុ និងរៀនពូកែ ជាងគេ។ គំនិតងប់ងល់ចង់ឃើញកូនមានជោគជ័យ និងបានរៀនសូត្រខ្ពង់ខ្ពស់ខ្លាំង បានធ្វើឱ្យវិស័យអប់រំចិនក្លាយជាឧស្សាហកម្មដែលមានលក្ខណៈប្រកួតប្រជែងខ្លាំង និងស្រួចស្រាវបំផុត។ ការបង្រៀនក្រៅម៉ោង ការរៀនត្រៀមប្រលង ជាទីផ្សារដែលធំណាស់នៅក្នុងប្រទេសចិន និងមានប្រកួតប្រជែងក្នុងទីផ្សារភាគហ៊ុនផង។ ក្រុមហ៊ុនខ្លះមានឈ្មោះល្បីដល់សហរដ្ឋអាមេរិក។ បើតាមការិយាល័យ L.E.K. Consulting ទីផ្សាររៀនគួរមានទំហំដល់ទៅ ២៦០ពាន់លានដុល្លារនៅឆ្នាំ២០១៨។
ប៉ុន្តែទម្ងន់ការងាររបស់សិស្សានុសិស្សចិន និងតម្លៃសិក្សាដ៏ខ្ពស់ នៅក្នុងប្រទេសចិន រងការរិះគន់កាន់តែខ្លាំងឡើងៗ។ ដូច្នេះដើម្បីសម្រាលបន្ទុកការងាររបស់ក្មេង និងបន្ធូរសម្ពាធហិរញ្ញវត្ថុរបស់អ្នកជាឪពុកម្តាយ រដ្ឋាភិបាលចិន បានសម្រេចចាត់វិធានការថ្មី តម្រូវឱ្យក្រុមហ៊ុនរកស៊ីបង្រៀនក្មេងក្រៅម៉ោង ចុះឈ្មោះក្នុងបញ្ជីជាសមាគមដែលគ្មានបំណងរកប្រាក់កម្រៃ និងពុំអាចទទួលបង្រៀនក្មេងនៅថ្ងៃចុងសប្តាហ៍ ថ្ងៃបុណ្យឈប់សម្រាក និងក្នុងពេលវិស្សមកាលទេ។
ក្រុមហ៊ុនបង្រៀនក្មេងក្រៅម៉ោង ក្លាយជាសមាគមដែលគ្មានបំណងរកកម្រៃ ជាវិធានការមួយដែលប៉េកាំងសម្រេចឡើងក្នុងអត្ថន័យចង់ជំរុញអត្រាកំណើត លើផ្ទៃនៃវិបត្តិសេដ្ឋកិច្ចដើរបន្ថយល្បឿន។ បន្ទុកហិរញ្ញវត្ថុជាឧបសគ្គដ៏ចំបងមួយ ដែលរារាំងគូស្វាមីភរិយាក្មេងៗចិនច្រើនយកកូនលើសពីម្នាក់ បើទោះបីជាពេលនេះចិនបានលុបច្បាប់កូនទោល និងអនុញ្ញាតឱ្យគ្រួសារមួយមានកូនដល់បីនាក់ក៏ដោយ។
ប៉ុន្តែ គ្រាន់តែបានឃើញវិធានការថ្មីភ្លាម ភាគហ៊ុនរបស់ក្រុមហ៊ុនបង្រៀនក្មេង បានដាំក្បាលចុះយ៉ាងខ្លាំង។ ក្រុមហ៊ុន New Oriental Education ដែលជាសាលាបង្រៀនថែមម៉ោងឯកជនជើងឯក បានបាត់បង់ភាគហ៊ុនអស់៤០% នៅថ្ងៃចន្ទនេះ។ Koolearn Technology ជំនាញខាងបង្រៀនតាមអនឡាញ ខាតអស់៣៥% ចំណែកសាលារៀនត្រៀមចូលមហាវិទ្យាល័យបរទេស China Maple Leaf Educational ធ្លាក់ចុះអស់១៦% នៅក្នុងទីផ្សារមូលប័ត្រហុងកុង។ ជាសរុបភាគហ៊ុនសាលារៀនគួរ នៅទីផ្សារមូលប័ត្រហុងកុងបានធ្លាក់ចុះអស់៣%នៅរសៀលថ្ងៃចន្ទទី ២៦កក្កដានេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ