អាមេរិកគំរាមចាត់វិធានការថ្មីបន្ថែមដើម្បីប្រឆាំងនឹងរបបសឹកភូមា
បន្ទាប់ពីឥណ្ឌូណេស៊ី ប្រមុខការបរទេសអាមេរិកលោក អង់តូនី ប្ល៊ីងកិន ទៅបំពេញទស្សនកិច្ចនៅក្នុងប្រទេសម៉ាឡេស៊ីនាថ្ងៃពុធ ទី១៥ ធ្នូនេះ។ ពីទីក្រុងគូឡាឡាំពួ លោក ប្ល៊ីងកិន និយាយថាអាមេរិកកំពុងតែពិចារណាពីវិធានការថ្មីដើម្បីដាក់សម្ពាធរបបយោធាភូមាឲ្យដើរវិលទៅរកគន្លងប្រជាធិបតេយ្យវិញ។
ចុះផ្សាយនៅថ្ងៃ៖
ស្តាប់ - ០២:២០
ភាពវឹកវរនៅក្នុងប្រទេសភូមាបានកើតឡើងចាប់តាំងពីខែកុម្ភៈ នៅពេលដែលរដ្ឋាភិបាលស៊ីវិលរបស់អ្នកស្រី អ៊ុងសាន ស៊ូជី ត្រូវបានពួកយោធាទម្លាក់ចេញពីអំណាច។ មកទល់នឹងពេលនេះ នៅតែមានការរាយការណ៍ជាច្រើនអំពីសកម្មភាពបង្រ្កាបរបស់កងទ័ពភូមាទៅលើក្រុមអ្នកប្រឆាំង។
ថ្លែងក្នុងអំឡុងទស្សនកិច្ចនៅក្នុងប្រទេសម៉ាឡេស៊ី ប្រមុខការទូតអាមេរិកលោកប្ល៊ីងកិន បានទទួលស្គាល់ថាស្ថានភាពក្នុងប្រទេសភូមានៅមិនទាន់ល្អប្រសើរមកវិញនៅឡើយទេ។ ក្រោមហេតុផលនេះ ទីក្រុងវ៉ាស៊ីនតោនកំពុងរិះរកមធ្យោបាយបន្ថែមដើម្បីដាក់សម្ពាធរបបសឹកភូមាឲ្យវិលបែរងាកមកយដើរលើគន្លងប្រជាធិបតេយ្យវិញ។
វិធានការបន្ថែមដែលទីក្រុងវ៉ាស៊ីនតោនកំពុងពិចារណា អាចជាការដាក់ទណ្ឌកម្មលើបុគ្គលឬជារួមលើរបបសឹក ក៏ប៉ុន្តែលោកប្រមុខការបរទេសអាមេរិកមិនបានបញ្ជាក់ប្រាប់លម្អិតនោះទេថាតើវិធានការថ្មីអាចនឹងមានអ្វីខ្លះ។
យ៉ាងណាក៏ដោយ លោក ប្ល៊ីងកិន បានឲ្យដឹងថាសហរដ្ឋអាមេរិកកំពុងត្រិះរិះត្រង់ចំណុចតើការប្រព្រឹត្តលើជនជាតិរ៉ូហ៊ីងយ៉ា នៅភូមាអាចជាអំពើប្រល័យពូជសាសន៍ដែរឬអត់។ ក្រុមជនជាតិភាគតិចរ៉ូហ៊ីងយ៉ាកាន់សាសនាអ៊ីស្លាមនេះ ប្រឈមនឹងការរើសអើងយ៉ាងខ្លាំងនៅក្នុងប្រទេសភូមា ហើយពួកគេរាប់សែននាក់បានរត់ភៀសខ្លួនទៅកាន់ប្រទេសជិតខាងបង់ក្លាដែស ក្នុងឆ្នាំ ២០១៧ បន្ទាប់ពីរងការបង្ក្រាបពីយោធាភូមា។
គួរបញ្ជាក់ថា ការគំរាមដាក់ទណ្ឌកម្មបន្ថែមរបស់អាមេរិកប្រឆាំងនឹងរបបសឹកភូមាធ្លាក់មកនៅប៉ុន្មានថ្ងៃបន្ទាប់ពីអង្គការសហប្រជាជាតិ ព្រមានពីការកើនឡើងគួរឲ្យព្រួយបារម្ភនៃការរំលោភសិទ្ធិមនុស្សនៅភូមា ដោយកងទ័ពរបបសឹកនៅតែព្យាយាមតាមប្រមាញ់បង្ក្រាបក្រុមអ្នកប្រឆាំងយ៉ាងសកម្ម។
ថ្មីៗនេះមានរបាយការណ៍បង្ហាញដែរថាកងទ័ពភូមាបានចងនិងដុតសម្លាប់អ្នកភូមិចំនួន ១១ នាក់ ក្នុងនោះមានទាំងកុមារទៀតផង។ សហរដ្ឋអាមេរិកដែលយល់ថារបាយការណ៍គួរឲ្យទុកចិត្តបានសម្តែងការខឹងសម្បាយ៉ាងខ្លាំង។ ក៏ប៉ុន្តែរបបយោធាភូមាបានចេញមុខបដិសេធចំពោះការអះអាងរបស់របាយការណ៍ខាងលើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ